“To nâme pou . . . abaisse-li ziska moi”

L’HUMILITÉ c’est enn qualité attirant. En general, nou senti-nou attiré ar bann dimoune ki humble. Mais malheureusement, li bien rare pou trouve bann dimoune ki vrai-mem humble dan le monde zordi​—surtout bann dimoune ki ena pouvoir ou-soit l’autorité lor lezot. Ki nou kapav dire lor Jéhovah, Personnage ki pli puissant dan l’univers? Eski Li humble? Anou examine seki prophete Jérémie ti dire dan Lamentations 3:20, 21.​—Lire.

Jérémie ti ecrire livre Lamentations kan nation Israël ti dan enn situation bien difficile. Li ti’nn fek trouve enn kitsoz ki ti faire li beaucoup la peine​—destruction Jérusalem, la ville ki li ti bien content, par bann Babylonien. Sa prophete ki ti bien bouleversé-la ti koné ki sa malheur-la ti enn jugement bien juste ki bann Israélite ti merité a cause zot bann peché. Mais eski Jérémie pa ti ena okenn l’espoir? Eski li ti ena l’impression ki Jéhovah ti trop loin ou-soit ti indifferent pou remark bann dimoune ki ti repenti ek pou tire zot dan desespoir? Anou ecoute Jérémie ki ti pé koz pou so peuple.

Mem si la plupart dimoune dan la peine, Jérémie li, li ena enn l’espoir. Li faire sa la priere-la ar Jéhovah: “Pena doute ki to nâmea [Jéhovah Li-mem] pou rappel ek pou abaisse-li ziska moi.” (Verset 20) Jérémie pena okenn doute. Li koné ki Jéhovah pa pou blié li​—ek aussi bann ki ti repenti parmi So peuple. Alors, ki Bondié Tout-Puissant pou faire?​—Révélation 15:3.

Jérémie sur ki Jéhovah pou ‘abaisse-Li’ ziska bann dimoune ki vrai-mem repenti. Enn lot traduction dire: “Ah, rappel, ek baisse toi ziska moi.” Sa bann parole-la aide nou pou trouve Jéhovah couma enn kikenn ki bon. Jéhovah, ki “Pli Grand lor la terre entier,” pou coumadir baissé ek pou releve so bann adorateur. Li pou tire zot dan zot situation desesperé ek pou faire zot ré-gagne so faveur. (Psaume 83:18) Grace a sa l’esperance-la, Jérémie kapav gagne enn vrai reconfort pou la peine ki li ena dan so leker. Sa prophete fidele-la bien decidé pou attann avek patience jour ki Jéhovah inn choisir pou Li delivré So peuple ki ti repenti.​—Verset 21.

Bann parole ki Jérémie ti ecrire enseigne nou deux kitsoz lor Jéhovah. Premierement, Li humble. (Psaume 18:35) Mem si Li ena “enn puissance extraordinaire,” Jéhovah disposé pou coumadir abaisse-Li ziska nou niveau, pou aide nou kan nou deprimé. (Job 37:23; Psaume 113:5-7) Eski sa pa encourage nou? Deuxiemement, Jéhovah ena misericorde; Li ‘disposé pou pardonne’ bann dimoune ki’nn faire peché mais ki’nn repenti ek pou ré-donne zot so faveur. (Psaume 86:5) Sa deux qualité-la​—l’humilité ek misericorde​—marche ensam.

Nou vrai-mem bien reconnaissant ki Jéhovah pa pareil couma bann dirigeant humain, ki teti ek ki insensible parski zot tellement fiere! Eski sa pa pousse ou pou rod aprann plus lor sa Bondié ki humble-la ek ki disposé pou “baissé” pou donne so bann adorateur enn l’espoir kan zot decouragé?

[Note]

[L’encadré page 32]

Jéhovah coumadir disposé pou abaisse-Li ziska nou niveau, pou aide nou kan nou deprimé