Ki l’influence bann creature spirituel ena lor nou?

Sa lartik-la examine bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.

1. Kisannla bann ange été?

Bann ange c’est bann creature spirituel ki vive dan le ciel. Zot ena enn la vie superieur ar bann dimoune. Vrai Bondié, ki enn l’esprit Li-mem, ti crée bann ange avant ki Li ti crée la terre. (Job 38:4, 7; Matthieu 18:10) Jéhovah ti crée plusieurs million ange tout autour Li.​—Lire Psaume 103:20, 21; Daniel 7:9, 10.

2. Eski bann ange aide bann dimoune?

Bann ange ti aide enn dimoune juste, ki ti appel Lot. Li ti vive dan enn la ville ki Bondié ti’nn decide pou detruire parski so bann habitant ti bien mauvais. Deux ange ti dire Lot ek so famille sauvé, quitte la ville allé. Certain dimoune ti considere sa l’avertissement-la couma enn badinage ek pa ti prend sa compte. Mais Lot ek so bann tifi ti gagne la vie sauve parski zot ti obeir l’avertissement ki Bondié ti donné a travers bann ange.​—Lire Genèse 19:1, 13-17, 26.

Dapré la Bible, bann ange pé aide bann dimoune zordi kan zot pé dirige travail bann serviteur Bondié ki pé preche avek fidelité la bonne nouvelle lor so Royaume. (Matthieu 24:14) Ena aussi enn l’avertissement dan sa bon nouvelle ki zot pé preché-la. Pareil couma l’avertissement ki Lot ti gagné, sa l’avertissement-la pa enn badinage. Li sorti kot Bondié a travers bann ange.​—Lire Révélation 1:1; 14:6, 7.

Bondié kapav servi bann ange pou fortifié nou kan nou pé faire face ar bann l’epreuve. Li ti servi enn ange pou fortifié Jésus.​—Lire Luc 22:41-43.

Bientot Bondié pou servi bann ange dan enn lot fason​—pou detruire bann mauvais dimoune ki responsable la souffrance. Sa pou amenn enn grand soulagement pou l’humanité.​—Lire 2 Thessaloniciens 1:6-8.

3. Ki l’influence bann demon kapav ena?

Pareil couma beaucoup dimoune lor la terre finn agir dan enn mauvais fason kan zot finn desobeir Bondié, dan le ciel aussi beaucoup ange finn rebellé kont Bondié. (2 Pierre 2:4) Appel bann ange desobeissant, bann demon. Zot chef, c’est Satan le Diable. Satan ek so bann demon pé embete bann dimoune lor la terre.​—Lire Révélation 12:9.

Satan inn servi bann business malhonnete, bann gouvernement humain ek bann fausse religion pou influence bann dimoune ek pou detourne zot ar Bondié. Alors, Satan responsable l’injustice, la violence ek souffrance ki pé affecté bann dimoune zordi.​—Lire 1 Jean 5:19.

4. Couma bann demon pé embete bann dimoune?

Satan inn embete beaucoup dimoune par l’enseignement ki soi-disant bann ki’nn mort vinn bann l’esprit ki kapav koz ar zot. Selman, la Bible dire ki bann mort pa kapav faire nanyé. (Ecclésiaste 9:5) Mais bann demon souvent embete bann dimoune kan zot imite la voix bann dimoune ki nou content ek ki’nn mort. (Isaïe 8:19) Bann demon embete aussi bann dimoune a travers horoscope, bann sorcier, ek bann ki predire l’avenir. Bondié averti nou ki nou bizin rejette tou sa bann pratik-la. Alors, si nou ena n’importe ki kitsoz ki ena enn rapport avek bann demon ek avek spiritisme, nou bizin jette zot.​—Lire Deutéronome 18:10, 11; Actes 19:19.

Si nou content Jéhovah, nou pa pou bizin peur bann demon. Kan nou etudié Parole Bondié ek faire seki li dire, nou pé oppose-nou ar Satan le Diable ek nou pé vinn proche ar Bondié. Jéhovah pli puissant ki bann demon. So bann ange fidele kapav fortifié nou kan nou bizin l’aide.​—Lire Psaume 34:7; Jacques 4:7, 8.

Pou gagne plus renseignement, guette chapitre 10 dan livre Ki la Bible enseigné vrai-mem?, publié par bann Témoins de Jéhovah.