Laisse Jéhovah faire ou gagne vrai liberté
“Examine en profondeur la loi parfait, la loi ki donne la liberté.”—JACQ. 1:25.
ESKI OU KAPAV EXPLIKÉ?
Ki la loi faire nou gagne vrai liberté, ek kisannla ki gagne bann bienfait ar sa la loi-la?
Couma nou kapav gagne vrai liberté?
Ki liberté pé attann bann ki reste lor chemin ki amenn vers la vie?
1, 2. (a) Ki pé arrive bann liberté ki ena dan le monde, ek kifer? (b) Ki liberté bann serviteur Jéhovah bientot pou gagné?
NOU pé vive dan enn lepok kot pli allé bann dimoune pé rod gagne toujours plus, zot pa obeir la loi ek zot pé vinn pli violent. (2 Tim. 3:1-5) A cause sa, bann gouvernement faire plus la loi, equipe bann policier pli bien ek installe bann camera pou veille bann dimoune. Dan certain pays, bann dimoune installe bann systeme alarme dan zot lakaz, mette plus cadenas dan zot la porte ek zot mette mem bann fencing electrik autour zot la cour pou zot kapav plus en securité. Beaucoup refuse pou sorti a-soir ou-soit pou laisse zot zenfant joué dehors li-jour ou a-soir, sans ki enn kikenn veille zot. Oui, li clair ki bann dimoune pé perdi zot liberté, ek sa situation-la pa parette pou amelioré.
2 Dan jardin Éden, Satan ti pretann ki sel moyen pou enn dimoune gagne vrai liberté c’est kan li pa depann lor Jéhovah. Seki ti arrivé apré, montré nou ki vrai-mem Satan ti koz enn gros menti! En realité, plus bann dimoune pa prend compte bann limite moral ek spirituel ki Jéhovah inn fixé, plus la societé souffert. Sa mauvais condition-la affecté aussi bann serviteur Jéhovah. Selman, nou ena l’espoir ki bientot, bann dimoune pou nepli esclave ar peché ek ar seki pé detruire zot, ek zot pou gagne seki la Bible appel “liberté extraordinaire bann zenfant Bondié.” (Rom. 8:21) En realité, Jéhovah finn deja commence prepare so bann serviteur pou sa liberté-la. Dan ki fason?
3. Ki la loi Jéhovah inn donne bann disciple Christ, ek ki bann question nou pou examiné?
3 Nou gagne la reponse dan seki Jacques, enn ecrivain la Bible ti appel “la loi parfait, la loi ki donne la liberté.” (Lire Jacques 1:25.) Lezot traduction la Bible traduire sa phrase-la par “la loi ki faire nou libre” (The New English Bible) ek “la loi parfait la liberté” (The New American Bible). Bien sur, li normal ki bann dimoune associé la loi avek bann interdiction, pa avek liberté. Alors, ki été “la loi parfait, la loi ki donne la liberté”? Ek couma sa la loi-la libere nou?
LA LOI KI LIBERE NOU
4. Ki été “la loi parfait, la loi ki donne la liberté,” ek kisannla ki gagne bann bienfait ar sa la loi-la?
4 “La loi parfait, la loi ki donne la liberté” c’est pa la Loi mosaïk parski sa la Loi-la ti montré ki bann Israélite ti ena peché ek Christ ti accompli sa la Loi-la. (Mat. 5:17; Gal. 3:19) Alors, ar ki la loi, Jacques ti pé faire reference? Li ti pé pense “la loi Christ,” ki ti appel aussi “la loi la foi” ek “la loi enn peuple libre.” (Gal. 6:2; Rom. 3:27; Jacq. 2:12) Sa vedir ki “la loi parfait” implik tou seki Jéhovah demann nou pou faire. Bann chretien oint ek bann membre “lezot brebis” toulé-deux gagne bann bienfait ar sa la loi-la.—Jean 10:16.
5. Kifer la loi la liberté li pa enn fardeau?
5 Sa “la loi parfait[-la]” pa pareil couma bann la loi ki ena dan beaucoup pays, parski li pa compliké ni li mette enn fardeau lor bann dimoune. Mais, dan la loi parfait ena bann commandement simple ek bann principe de base. (1 Jean 5:3) Jésus ti dire: “Mo joug, li doux ek mo charge, li leger.” (Mat. 11:29, 30) En plus, dan “la loi parfait” pa necessaire ki ena enn longue la liste bann kitsoz ki pa gagne droit faire, ou-soit bann punition, parski sa la loi-la basé lor l’amour ek li gravé dan l’esprit ek leker bann dimoune, pa lor bann tablette roche.—Lire Hébreux 8:6, 10.
COUMA “LA LOI PARFAIT” LIBERE NOU
6, 7. Ki nou kapav dire lor bann principe Jéhovah, ek kifer la loi la liberté libere nou?
6 Bann limite ki Jéhovah inn fixé pou so bann creature intelligent c’est pou zot prop bienfait ek pou zot protection. Prend par exemple bann la loi physik ki dirige l’energie ek la matiere. Bann dimoune pa plaigné ki sa bann la loi-la agace zot. Au contraire, zot bien content ki ena sa bann la loi-la, zot reconette ki bizin ena bann la loi naturel pou faire zot gagne bann bienfait. Bann principe moral ek spirituel ki Jéhovah donne nou ek ki trouve dan “la loi parfait” Christ, zot aussi zot faire bann dimoune gagne bann bienfait.
7 En plus ki li protege nou, la loi la liberté permette nou pou satisfaire tou nou bann bon desir, sans ki nou faire-nou-mem di-tort ou-soit ki nou al kont droit ek liberté lezot dimoune. Alors, pou nou vinn vrai-mem libre—pou nou kapav faire seki nou envie—nou bizin developpe bann bon desir ki en accord avek personnalité Jéhovah ek so bann principe. Sa vedir ki nou bizin aprann pou content seki Jéhovah content ek pou ena la haine pou seki Li detesté. Ek la loi la liberté aide nou pou faire sa.—Amos 5:15.
8, 9. Ki bienfait, bann ki reste attaché ar la loi la liberté, gagné? Donne enn l’exemple.
8 Parski nou imparfait, nou bizin lutté pou controle nou bann mauvais desir. Selman, a mesure ki nou reste attaché ar la loi la liberté, nou senti-nou libre depuis asterla-mem. Anou prend enn l’exemple: Jay, enn missié ki ti commence etudié la Bible, ti esclave cigarette. Kan li ti aprann ki sa l’habitude-la pa ti faire Bondié plaisir, li ti bizin prend enn decision. Eski li ti pou contigne soumette-li ar desir so lekor ou-soit eski li ti pou soumette-li ar Jéhovah? Avek sagesse, li ti choisir pou servi Bondié, mem si so lekor ti bien envie gagne nicotine. Ki li ti ressenti kan li ti’nn reussi surmonte sa l’habitude-la? Plitar li ti dire: “Mo ti senti-moi extra libre ek bien content.”
9 Jay ti aprann par l’experience ki bann liberté ki le monde offert, ki faire bann dimoune “pense bann kitsoz ki ena enn rapport avek la chair,” en realité sa faire bann dimoune vinn esclave. Mais bann liberté ki Jéhovah donné, faire bann dimoune “pense bann kitsoz spirituel” ek rann zot libre ek amenn zot vers “la vie ek la paix.” (Rom. 8:5, 6) Kot-sa Jay ti trouve la force pou surmonte sa l’habitude ki ti rann li esclave-la? Pa par li-mem, mais grace a Bondié. Jay dire: “Regulierement, mo ti etudié la Bible, mo ti prié pou gagne l’esprit saint, ek mo ti rod l’aide rempli ar l’amour ki congregation ti donne moi.” Sa bann mem disposition-la kapav aide nou si nou pé rod vrai liberté. Anou guetté couma.
EXAMINE EN PROFONDEUR PAROLE BONDIÉ
10. Ki sa vedir “examine en profondeur” la loi Bondié?
10 Dan Jacques 1:25 nou lire: “Enn kikenn ki examine en profondeur la loi parfait, la loi ki donne la liberté, ek ki perseveré ladan . . . pou heureux kan li faire sa.” Mot grec ki’nn servi pou traduire “examine en profondeur” vedir “baissé pou guette dan,” seki implik faire bann grand zeffort. Oui, si nou envie ki la loi la liberté influence nou l’esprit ek nou leker, nou bizin faire nou part pou etudié la Bible avek serieux ek medite lor seki nou lire dan la priere.—1 Tim. 4:15.
11, 12. (a) Couma Jésus ti mette l’accent lor l’importance pou faire la verité vinn nou fason vive? (b) Couma l’exemple enn jeune soeur montré ki danger bann jeune surtout bizin evité?
11 En mem temps, nou bizin “perseveré,” ou-soit contigne applik Parole Bondié, coumsa nou pou faire la verité vinn nou fason vive. Jésus ti exprime mem pensée kan li ti dire certain ki ti croire en li: “Si zot contigne garde mo parole, zot vrai-mem mo bann disciple, ek zot pou konn la verité, ek la verité pou libere zot.” (Jean 8:31, 32) Enn livre reference dire ki dan sa verset-la, “konn” vedir aussi apprecié, parski “seki sa dimoune-la inn ‘koné’ ena valeur ou-soit l’importance pou li.” Alors, nou “konn” la verité dan enn fason complet kan nou faire li vinn nou fason vive. Lerla, nou pou kapav dire ki “parole Bondié” pé “agir” dan nou, pé forme nou personnalité pou ki nou imite pli bien nou Papa ki dan le ciel.—1 Thess. 2:13.
12 Demann-ou-mem: ‘Eski vrai-mem mo konn la verité? Eski mo finn faire li vinn mo fason vive? Ou-soit eski mo encore envie gagne certain “liberté” ki ena dan sa le monde-la?’ Kan li pense so jeunesse, enn soeur ki ti elevé par bann parent chretien, ti ecrire: “Kan ou grandi dan la verité, Jéhovah touletan la. Mais moi, jamais mo ti vrai-mem aprann pou konn Li. Jamais mo ti aprann pou ena la haine pou bann kitsoz ki Li pa content. Jamais mo ti croire ki seki mo ti faire ti ena l’importance pou Li. Ek jamais mo ti aprann pou tourne-moi vers Li kan mo ti dan probleme. Mo ti compte lor mo prop l’intelligence, asterla mo koné ki sa ti vrai-mem bete, parski mo pa ti konn nanyin.” Heureusement ki sa soeur-la plitar ti realisé ki li ti ena enn mauvais fason pensé, ek li ti faire bann grand changement. Li ti mem vinn enn pionnier permanent.
L’ESPRIT SAINT KAPAV AIDE OU POU VINN LIBRE
13. Couma l’esprit saint aide nou pou gagne liberté?
13 Dan 2 Corinthiens 3:17, nou lire: “La kot ena l’esprit Jéhovah, la ena la liberté.” Couma l’esprit saint aide nou pou gagne nou liberté? L’esprit saint produire en nou bann qualité couma: “L’amour, la joie, la paix, patience, bienveillance, bonté, la foi, douceur, maitrise de soi.” (Gal. 5:22, 23) Sans sa bann qualité-la, surtout l’amour, okenn societé pa pou kapav vrai-mem libre—enn realité ki nou trouve bien dan le monde kot nou pé vive zordi. Li interessant pou noté ki apré ki l’apotre Paul ti cite bann qualité ki forme partie dan fruit l’esprit, li ti ajouté: “Pena okenn la loi ki kont sa bann kitsoz-la.” Ki li ti pé rod dire? Pena okenn la loi ki kapav empeche fruit l’esprit Bondié grandi dan nou la vie. (Gal. 5:18) Apré tou, pou ki raison ti pou bizin ena enn la loi coumsa? Jéhovah envie ki touletan nou developpe bann qualité chretien ek manifesté sa bann qualité-la sans okenn limite.
14. Dan ki sens l’esprit sa le monde-la faire bann dimoune vinn esclave?
14 Bann ki laisse-zot attiré par l’esprit sa le monde-la ek ki satisfaire bann desir zot lekor, kitfois pensé ki zot libre. (Lire 2 Pierre 2:18, 19.) Mais, kan nou guette la realité, c’est le contraire ki nou trouvé. Bizin enn tonne la loi ek reglement pou controle zot bann mauvais desir ek zot comportement. L’apotre Paul dire: “La loi finn faire, pa pou enn dimoune juste mais pou bann ki desobeir la loi ek ki pena okenn discipline.” (1 Tim. 1:9, 10) Zot aussi esclave peché, ek zot ena tendance pou faire ‘bann kitsoz ki zot lekor pousse zot pou faire,’ ek lekor enn dimoune li enn maitre bien cruel. (Éph. 2:1-3) Dan enn certain sens, bann dimoune ki rod satisfaire zot bann desir, zot couma bann insecte ki al direct dan enn bol di-miel ek zot reste bloké ladan. Sa bann dimoune-la laisse-zot influencé par zot desir, ek zot pa tardé pou vinn esclave peché.—Jacq. 1:14, 15.
CONGREGATION FAIRE OU VINN LIBRE
15, 16. Ki bann bienfait nou gagné kan nou frequente congregation, ek ki liberté nou ena?
15 Kan ou ti commence frequente la congregation, ou pa ti vinn coumadir dan enn club. Au contraire, ou ti vinn dan congregation parski Jéhovah ti attire ou. (Jean 6:44) Ki ti pousse Li pou faire sa? Eski Bondié ti trouve ou couma enn dimoune juste ki ti ena la crainte pou Li? Kitfois ou pou dire: “Non, pa ditou!” Alors, ki Bondié ti trouvé? Li ti trouve enn leker ki ti pou obeir so la loi ki libere bann dimoune, enn leker ki ti pou soumette ar so bon l’influence. Dan congregation, Jéhovah finn prend ou soin kan Li finn nourri ou lor plan spirituel, coumsa Li finn libere ou ar bann fausseté ek bann superstition ki bann religion enseigné, ek Li finn enseigne ou couma pou developpe personnalité chretien. (Lire Éphésiens 4:22-24.) Ki resultat sa finn ena? Ou ena privilege pou forme partie dan sel peuple dan le monde ki vrai-mem “enn peuple libre.”—Jacq. 2:12.
16 Reflechi lor la: kan ou ensam avek bann ki content Jéhovah avek tou zot leker, eski ou peur? Eski a chaque fois ou guette derriere ou? Kan ou pé koz avek ou bann frere ek soeur dan la Salle du Royaume, eski ou trappe ou bann kitsoz personnel bien fort tension zot perdi? Au contraire, ou senti-ou a l’aise ek sans tracas. Eski ou ti pou ena mem sentiment si ou ti avek lezot dimoune dan enn lot place? Kitfois non! En plus, liberté ki ou pé profité zordi parmi peuple Bondié, c’est zis enn avant-gout liberté ki pou ena dan l’avenir.
“LIBERTÉ EXTRAORDINAIRE BANN ZENFANT BONDIÉ”
17. Couma eski liberté bann dimoune ena enn rapport avek ‘revelation bann garson Bondié’?
17 Kan Paul ti koz lor liberté ki Jéhovah finn reservé pou so bann serviteur lor la terre, li ti ecrire: “La creation pé attann avek beaucoup impatience ler kot pou revele bann garson Bondié.” Apré li ti ajouté: “La creation li aussi pou nepli esclave ar seki pé detruire li ek li pou gagne liberté extraordinaire bann zenfant Bondié.” (Rom. 8:19-21) Dan sa verset-la, “la creation” represente bann dimoune ki ena l’esperance pou vive lor la terre, bann ki pou gagne bann bienfait kan “pou revele” bann garson Bondié ki’nn oint ar l’esprit saint. Sa revelation-la pou commencé kan sa bann “garson” ki’nn ressuscité dan le ciel-la, ensam avek Christ, pou tire tou bann mauvais dimoune lor la terre ek pou protege “enn grand la foule” pou zot rente dan le monde nouveau.—Rév. 7:9, 14.
18. Couma eski bann dimoune obeissant pou gagne plus liberté, ek ki liberté zot pou gagné finalement?
18 Bann dimoune ki pou gagne la vie sauve pou konn enn lot liberté—zot pou liberé ar l’influence Satan ek bann demon. (Rév. 20:1-3) Sa pou vrai-mem enn grand soulagement! Apré sa, bann 144,000 le roi ek pretre ki pou avek Christ, pou contigne libere bann dimoune kan tigit-tigit zot pou applik bann bienfait sacrifice Jésus, ziska ki peché ek l’imperfection disparette net. (Rév. 5:9, 10) Bann dimoune ki pou reste fidele dan l’epreuve pou konn liberté parfait ki Jéhovah ti ena dan so projet pou zot—“liberté extraordinaire bann zenfant Bondié.” Reflechi lor la! Ou pou nepli bizin lutté pou faire seki bon devant lizié Jéhovah, parski ou lekor, ou leker ek ou l’esprit pou vinn parfait ek ou personnalité pou’nn changé; ou pou kapav imite bann qualité Bondié dan enn fason parfait.
19. Zordi, ki nou bizin contigne faire pou nou reste lor chemin ki pou faire nou gagne enn vrai liberté?
19 Eski ou pé attann avek impatience pou gagne “liberté extraordinaire bann zenfant Bondié”? Si oui, alors laisse ‘la loi parfait ki donne liberté’ contigne influence ou l’esprit ek ou leker. Oui, etudié la Bible avek serieux. Vive la verité. Prié pou gagne l’esprit saint. Profite bien bann disposition ki ou gagné dan congregation ek aussi nourriture spirituel ki Jéhovah donné. Pa laisse Satan embete ou, pareil couma li ti embete Ève kan li ti faire li croire ki fason agir Jéhovah trop severe. Pena doute ki Satan le Diable bien malin. Mais, li possible ki nou pa “laisse Satan trompe nou, parski nou konn bien so bann l’intention,” c’est seki nou pou guetté dan prochain lartik.—2 Cor. 2:11.
[Zimage page 14]
Eski mo encore bien envie gagne certain “liberté” ki ena dan le monde?
[Zimage page 14]
Eski mo’nn faire la verité vinn mo fason vive?