Anou aprann ar Parole Bondié
Ki pou arrivé kan pou ena Jour Jugement?
Sa lartik-la examine bann question ki kitfois ou finn deja demann-ou-mem ek li montré kot-sa ou kapav trouve bann reponse dan ou la Bible. Bann Témoins de Jéhovah pou bien content pou examine sa bann reponse-la avek ou.
1. Ki été Jour Jugement?
Couma nou trouvé dan zimage a droite, beaucoup dimoune pensé ki, kan pou ena Jour Jugement, pou amenn plusieurs milliard nâme devant trone Bondié pou Li juge zot dapré bann action ki zot finn faire dan zot la vie. Apré, Bondié pou recompense certain kan Li pou donne zot la vie dan le ciel, ek lezot pou tourmenté dan l’enfer. Selman, la Bible montré ki l’objectif Jour Jugement, c’est pou sauve bann dimoune ek pou tire l’injustice. (Psaume 96:13) Bondié inn etabli Jésus en tant ki Juge pou retabli la justice lor la terre.—Lire Isaïe 11:1-5; Actes 17:31.
2. Couma Jour Jugement pou retabli la justice?
Kan premier zom, Adam, par expré ti rebellé kont Bondié, li ti faire tou so bann descendant vinn esclave peché, souffrance ek la mort. (Romains 5:12) Pou corrige sa l’injustice-la, Jésus pou ressuscite plusieurs milliard dimoune ki’nn mort. Livre Révélation faire nou koné ki sa pou arrivé pendant Regne mille an Christ Jésus.—Lire Révélation 20:4, 11, 12.
Révélation chapitre 20 mentionne “bann rouleau” kot pou ena bann nouveau instruction ki Bondié pou donné. Bondié pou juge bann ki pou ressuscité dapré bann kitsoz ki pou ena dan sa bann rouleau-la, pa dapré seki zot ti faire avant zot mort. (Romains 6:7) Parmi bann ki pou ressuscité ek ki pou gagne possibilité pou aprann lor Bondié, pou ena “bann dimoune ki juste ek bann dimoune ki pa juste, toulé-deux,” couma l’apotre Paul ti dire.—Lire Actes 24:15.
3. Ki pou arrivé pendant Jour Jugement?
Bann dimoune ki finn mort sans ki zot finn gagne l’occasion pou aprann konn Jéhovah ek pou servi Li, pou gagne possibilité pou changé ek faire seki bon. Si zot faire sa, zot resurrection pou enn ‘resurrection pou gagne la vie.’ Parkont, certain parmi bann dimoune ki pou ressuscité pa pou envie aprann bann principe Jéhovah. Alors, zot resurrection pou enn ‘resurrection pou enn jugement.’—Lire Jean 5:28, 29; Isaïe 26:10; 65:20.
A la fin Jour Jugement, ki pou duré mille an, Jéhovah pou’nn faire bann dimoune obeissant ré-gagne zot condition parfait, pareil couma sa ti été au commencement. (1 Corinthiens 15:24-28) C’est enn l’avenir extraordinaire pou tou bann dimoune obeissant, pa vrai? Dan enn l’epreuve final, Bondié pou faire Satan le Diable sorti dan l’abime, kot li ti fermé pendant mille an. Satan pou essaye encore enn fois detourne bann dimoune ar Jéhovah, mais bann ki pa pou ecoute Satan, pou gagne la vie eternel lor la terre.—Lire Isaïe 25:8; Révélation 20:7-9.
4. Ki bienfait enn lot jour jugement pou faire bann dimoune gagné?
La Bible servi aussi l’expression “jour jugement” pou faire reference ar destruction sa systeme dan ki nou pé vive-la. Sa jour jugement-la pou arrivé enn sel coup, pareil couma deluge dan lepok Noé, ki ti efface net enn mauvais generation. Heureusement, bientot pou ena destruction “bann dimoune ki pena okenn respé pou Bondié” ek apré pou ena enn nouveau societé bann dimoune lor la terre, kot “pou ena la justice.”—Lire 2 Pierre 3:6, 7, 13.