Faire face ar bann difficulté avek courage

1, 2. Ki bann difficulté beaucoup dimoune finn gagné, mais ki bann serviteur Bondié ti pou envie?

NOU pé vive dan enn lepok kot ena beaucoup probleme. Finn ena beaucoup catastrophe lor la terre. Tremblement de terre, tsunami, bann incendie, inondation, volcan, tornade, ek cyclone finn faire bann dimoune konn beaucoup malheur. En plus, bann probleme dan famille ek bann difficulté personnel faire beaucoup dimoune vive dan la peur ek faire zot chagrin. Li bien vrai kan la Bible dire ki “bann moment ek bann situation ki [nou] pa attann” kapav arrive nou tou.​—Eccl. 9:11.

² En general, bann serviteur Bondié finn reussi faire face ar sa bann malheur-la. Mais kan-mem, nou envie bien preparé pou faire face ar n’importe ki difficulté ki nou kapav gagné dan l’avenir, alors ki sa systeme-la pré pou disparette. Couma nou kapav faire face ar sa bann difficulté-la ek pa laisse zot accablé nou? Ki pou aide nou pou faire face avek courage ar bann difficulté ki nou gagné zordi?

APRANN AR L’EXEMPLE BANN KI TI ENA COURAGE

3. Dapré Romains 15:4, ki consolation nou kapav gagné kan nou pé faire face ar bann situation ki affecté nou?

³ Mem si bann situation difficile pé affecté pli beaucoup dimoune zordi ki avant, li pa enn kitsoz nouveau ki bann dimoune gagne sa qualité probleme-la. Anou guetté seki nou kapav aprann ar certain serviteur Bondié dan le passé, ki finn reussi faire face ar zot probleme avek courage.​—Rom. 15:4.

4. Ki bann probleme David ti enduré, ek ki ti aide li?

⁴ Anou prend l’exemple David. Parmi bann probleme ki li ti gagné, li ti bizin faire face ar colere enn le roi, ar l’attak bann l’ennemi, kidnapping so bann madame, bann dimoune dan so prop camp ti faire traitre ar li, ek li ti bien decouragé. (1 Sam. 18:8, 9; 30:1-5; 2 Sam. 17:1-3; 24:15, 17; Ps. 38:4-8) Seki nou lire dan la Bible lor la vie David montré ki sa bann probleme-la ti faire li bien souffert. Pourtant, sa pa ti detruire so spiritualité. Avek enn grand la foi, li ti dire: “Jéhovah Li forteresse mo la vie. Pou kisannla mo pou bizin ena la frayeur?”​—Ps. 27:1; lire Psaume 27:5, 10.

5. Ki ti aide Abraham ek Sara pou faire face ar enn la vie difficile?

⁵ Preské toute longue zot la vie, Abraham ek Sara ti vive enba bann la tente couma bann etranger dan bann pays etranger. Zot la vie pa ti toujours facile. Pourtant, zot ti bien decidé pou faire face ar bann probleme couma la famine ek bann danger ki zot ti gagné ar bann habitant lezot nation ki tout autour. (Gen. 12:10; 14:14-16) Couma zot ti reussi faire sa? Parole Bondié dire nou ki Abraham “ti pé attann enn la ville ki ena bann vrai fondation, enn la ville ki finn monté ek ki finn faire par Bondié.” (Héb. 11:8-10) Abraham ek Sara ti reste concentré lor bann kitsoz ki ti pou arrivé dan l’avenir. Zot pa ti laisse bann difficulté decourage zot.

6. Couma nou kapav imite Job?

⁶ Job ti faire face ar bann grand pression. Maziné seki li ti ressenti kan tou kitsoz dan so la vie ti parette pé devire enba la-haut. (Job 3:3, 11) Seki ti pli pire, c’est ki li pa ti bien comprend kifer li ti pé gagne tou sa bann malheur-la. Mais kan-mem, jamais li pa ti baisse lé-bras. Li ti garde so l’integrité ek so la foi en Bondié. (Lire Job 27:5.) C’est vrai-mem enn bon l’exemple ki nou kapav imité!

7. Ki l’experience Paul ti faire dan so service pou Bondié, mais ki ti donne li courage pou contigné?

⁷ Anou prend aussi l’exemple l’apotre Paul. Li ti bizin faire face ar bann ‘danger dan la ville, dan desert, ek lor la mer.’ Li koz lor ‘la faim ek la soif, li ti gagne frais ek pa ti ena assez linge.’ Paul mentionne aussi ki li ti passe ‘enn la nuit ek enn jour dan la mer,’ kitfois kan li ti faire enn naufrage. (2 Cor. 11:23-27) Malgré tousala, remark bon l’attitude ki li ti ena apré ki li ti passe pré ar la mort parski li ti servi Bondié: “Sa ti arrivé pou ki nou mette nou confiance, pa en nou-mem, mais en Bondié ki releve bann mort. C’est ar enn kitsoz aussi grand ki la mort ki Li finn delivré nou ek ki Li pou delivré nou.” (2 Cor. 1:8-10) Pena beaucoup dimoune ki finn faire sa quantité mauvais l’experience-la, pareil couma Paul. Pourtant, beaucoup parmi nou kapav comprend so bann sentiment ek gagne enn consolation ar courage ki li ti ena.

PA LAISSE OU ABATTE AR BANN PROBLEME

8. Couma bann probleme dan le monde zordi kapav affecté nou? Donne enn l’exemple.

⁸ Ena tellement beaucoup catastrophe, difficulté ek pression dan le monde zordi, ki beaucoup dimoune senti-zot abatte. Mem certain chretien finn senti-zot coumsa. Enn soeur ki appel Lania ek so mari, ti dan service a plein temps, en Australie. Kan docteur ti dire li ki li ena enn cancer du sein, sa nouvelle-la ti faire li gagne enn sok. Li dire: “Bann traitement ki mo ti gagné ti faire moi bien malade, ek mo ti perdi l’estime pou mo-mem.” En mem temps li ti bizin occupe so mari ki ti faire enn l’operation colonne vertebral. Si arrive nou enn situation coumsa, ki nou kapav faire?

9, 10. (a) Ki fodé pa nou permette Satan faire? (b) Couma nou kapav faire face ar bann difficulté, couma sa ti annoncé en Actes 14:22?

⁹ Li bon nou rappel ki Satan servi bann l’epreuve ki nou pé gagné pou affaibli nou la foi. Mais fodé pa nou laisse li faire nou perdi nou la joie. Proverbes 24:10 dire: “Eski to finn montré ki to decouragé kan malheur vinn lor toi? To pou ena enn tigit la force mem.” Kan nou medite lor bann l’exemple ki ena dan la Bible, pareil couma bann l’exemple ki nou finn examiné avant, sa pou aide nou pou ena courage kan nou pé faire face ar bann difficulté.

¹⁰ Fodé pa nou blié aussi ki nou pa kapav tire tou probleme ki nou gagné dan la vie. En realité, nou bizin attann pou gagne probleme. (2 Tim. 3:12) Dan Actes 14:22, la Bible dire nou: “Nou bizin passe par beaucoup difficulté pou rente dan royaume Bondié.” Au lieu ki ou decouragé, kifer ou pa considere sa bann difficulté-la couma bann l’occasion pou montré avek courage ki ou ena la foi ki Bondié kapav aide ou?

11. Couma nou kapav empeche bann probleme ki ena dan la vie accablé nou?

¹¹ Nou bizin concentré lor bann kitsoz positif. Parole Bondié dire nou: “Enn leker ki joyeux ena enn bon l’effet lor figure enn dimoune, mais a cause douleur ki ena dan leker, l’esprit li abatte.” (Prov. 15:13) Depuis longtemps, bann ki faire recherche dan domaine medical finn trouvé ki, kan enn dimoune ena enn l’esprit positif, sa ena enn bon l’effet lor so la santé. Beaucoup dimoune malade ki finn prend bann placebo, setadir bann fausse medecine kot kitfois ena zis di-sucre ladan, finn senti-zot pli bien zis parski zot ti pensé ki sa ti kapav gueri zot. Mais le contraire aussi vrai, si bann dimoune dire enn patient ki li pé prend enn medecine ki pou faire li di-tort, vrai-mem li pou senti-li pli malade. Si nou touletan pense lor bann kitsoz ki nou pa kapav changé dan nou la vie, sa pou decourage nou. Heureusement, Jéhovah pa donne nou bann “comprimé di-sucre.” Au contraire, kan nou dan bann difficulté, Li donne nou enn vrai l’aide par bann l’encouragement ki trouve dan so Parole, par nou bann frere ek soeur ki soutenir nou, ek par la force ki nou gagné ar so l’esprit saint. Kan nou reflechi lor sa bann kitsoz-la, sa pou ré-donne nou courage. Au lieu ki nou contigne pense bann kitsoz negatif, faire bann kitsoz pratik ki pou aide nou faire face avek chaque probleme ek anou contigne pense bann kitsoz positif ki ena dan nou la vie.​—Prov. 17:22.

12, 13. (a) Ki finn aide bann serviteur Bondié pou endure bann difficulté ki ena apré bann catastrophe? Donne enn l’exemple. (b) Couma bann catastrophe faire nou realisé ki kitsoz pli important dan nou la vie?

¹² Pa trop longtemps, certain pays finn konn bann catastrophe bien grave. Li bon pou noté ki beaucoup frere dan sa bann pays-la finn montré enn l’endurance extraordinaire. Sa pa vedir ki sa ti facile pou zot. En février 2010, ti ena enn grand tremblement de terre ek enn tsunami dan Chili. Sa finn detruire lakaz ek di-bien beaucoup frere ek soeur. Certain finn mem perdi zot travail. Malgré sa, bann frere ek soeur finn contigné reste actif lor plan spirituel. Lakaz Samuel, enn frere, ti detruire net. Li ti dire: “Mem dan bann situation terrible coumsa, mo madame ek moi jamais pa finn arrete assisté bann reunion, ni arrete preché. Mo pensé ki sa bann l’habitude-la finn aide nou pou pa decouragé.” Ensam avek beaucoup lezot frere ek soeur, zot finn mette sa catastrophe-la enn coté ek zot finn contigne zot service pou Jéhovah.

¹³ En septembre 2009, plus ki 80 pour cent enn la ville ki appel Manille, dan Philippines, finn inondé par bann gros la pluie. Enn missié ki ti riche, ek ki ti perdi beaucoup kitsoz, ti dire ki sa inondation-la ti affecté tou dimoune, ek ti faire “bann riche ek bann pauvre toulé-deux gagne bann difficulté ek bann souffrance.” Sa rappel nou bann parole bien sage ki Jésus ti dire: “Ramasse bann tresor dan le ciel, kot pena ni ti bebette ni la rouille pou rongé, ek kot bann voleur pa perce trou pou rentré ek kokin.” (Mat. 6:20) Kan nou amenn enn la vie ki tourne autour bann kitsoz materiel​—ki kapav disparette bien vite​—souvent sa amenn bann deception. Li beaucoup pli sage pou centré nou la vie lor nou bann relation avek Jéhovah, bann relation ki pou reste solide n’importe ki kapav arrivé!​—Lire Hébreux 13:5, 6.

BANN RAISON POU MONTRÉ COURAGE

14. Ki bann raison nou ena pou montré nou courage?

¹⁴ Jésus ti dire ki pou ena bann probleme pendant so presence, mais li ti dire aussi: “Fodé pa zot peur.” (Luc 21:9) Nou ena bann bon raison pou ena courage parski Jésus Christ, nou le Roi, ek Jéhovah, Createur l’univers, pé soutenir nou. Paul ti encourage Timothée kan li ti dire li: “Parski Bondié pa finn donne nou enn l’esprit capon, mais enn l’esprit ki ena la force, l’amour ek bon sens.”​—2 Tim. 1:7.

15. Donne bann l’exemple ki montré ki bann serviteur Bondié ti ena confiance en Li, ek expliké couma nou kapav ena mem courage ki zot.

¹⁵ Remark certain l’expression ki montré ki bann serviteur Bondié ti ena enn grand confiance en Li. David ti dire: “Jéhovah Li mo la force ek mo bouclier. Mo leker finn ena confiance en Li, ek Li finn delivré moi, a cause sa mo leker dan la joie.” (Ps. 28:7) Paul ti montré ki li ti ena enn grand confiance, kan li ti dire: “Dan tou sa bann kitsoz-la, nou gagne enn victoire total grace a sa kikenn ki’nn content nou-la.” (Rom. 8:37) Jésus aussi pareil, kan li ti koné ki bientot bann dimoune ti pou arrete li ek ti pou touye li, li ti montré ki li ti ena bann relation bien solide avek Bondié. Li ti dire: “Mo pa tousel, parski mo Papa avek moi.” (Jean 16:32) Ki sa bann serviteur Bondié-la finn montré par zot bann parole? Zot tou finn ena enn confiance total en Jéhovah. Si nou developpe mem confiance dan Bondié, sa kapav donne nou courage pou faire face ar n’importe ki difficulté.​—Lire Psaume 46:1-3.

PROFITE BANN DISPOSITION KI AIDE NOU POU ENA COURAGE

16. Kifer li important ki nou etudié la Bible?

¹⁶ Fodé pa ki enn chretien compte lor li-mem pou gagne courage. Li bizin plutot aprann pou konn Bondié ek pou compte lor Li. Nou kapav faire sa kan nou etudié so Parole, la Bible. Enn soeur ki gagne depression expliké seki aide li: “Mo lire ek mo ré-lire surtout bann passage la Bible ki bien reconfortant.” Eski nou finn applik conseil pou reserve enn jour chaque semaine pou faire nou l’adoration en famille? Si nou faire sa bann kitsoz-la, sa pou aide nou ena mem l’attitude ki enn psalmiste ki ti dire: “Mo vrai-mem content to la loi! Toute longue la journée, li reste dan mo pensée.”​—Ps. 119:97.

17. (a) Ki disposition kapav aide nou pou ena courage? (b) Couma enn lartik ki raconte la vie enn serviteur Bondié finn aide ou?

¹⁷ Nou ena aussi bann publication ki basé lor la Bible kot ena bann renseignement ki fortifié nou confiance en Jéhovah. Par exemple, bann lartik ki raconte la vie bann serviteur Bondié finn aide beaucoup frere ek soeur. Enn soeur dan l’Asie ena enn maladie ki appel “ trouble bipolaire de l’humeur ” (c’est enn forme depression ki change l’humeur enn dimoune dan enn fason ki pa normal). Li ti bien content kan li ti lire l’experience enn frere ki ti enn missionnaire avant, ek ki ti reussi faire face avek sa qualité depression-la. Sa soeur-la ti ecrire: “Sa ti aide moi pou comprend mo probleme ek ti donne moi enn l’espoir.”

18. Kifer nou bizin prié pli souvent ki nou kapav?

¹⁸ La priere kapav aide nou dan n’importe ki situation. L’apotre Paul ti montré valeur sa disposition-la kan li ti dire: “Pa tracassé pou okenn kitsoz, mais dan tou kitsoz, par la priere ek supplication avek bann remerciement, demann Bondié seki zot bizin; ek la paix Bondié ki depasse tou pensée, pou protege zot leker ek zot l’esprit, par moyen Christ Jésus.” (Phil. 4:6, 7) Eski nou profite bien sa disposition-la pou gagne la force kan nou dan bann situation difficile? Alex, enn frere ki reste en Angleterre ek ki finn souffert pendant longtemps a cause enn depression, ti dire: “Enn kitsoz ki bien important pou moi c’est koz avek Jéhovah dan la priere ek ecoute Li kan mo lire so Parole.”

19. Couma nou bizin considere bann reunion?

¹⁹ Enn lot disposition bien important ki aide nou, c’est bann reunion. Enn psalmiste ti ecrire: “Mo nâme finn ena enn grand desir, li finn mem attann avek impatience pou al dan bann la cour Jéhovah.” (Ps. 84:2) Eski nou ena mem sentiment? Lani, ki nou ti mentionné avant, explik so sentiment en rapport avek bann reunion. Li dire: “Mo pa ti demann-moi si mo ti pou assisté bann reunion ou-soit non. Mo ti koné ki mo ti bizin la-bas si mo ti envie ki Jéhovah aide moi pou faire face ar mo probleme.”

20. Couma predication aide nou kan nou ena probleme?

²⁰ Nou gagne aussi courage kan nou reste actif dan predication. (1 Tim. 4:16) Enn soeur dan l’Australie ki finn bizin faire face ar beaucoup probleme dire: “Preché, c’est dernier kitsoz ki mo ti envie faire, mais enn ancien ti invite moi pou preche ensam avek li. Mo ti allé. Pena doute ki c’est Jéhovah ki ti pé aide moi; chaque fois ki mo ti sorti dan predication, mo ti bien content.” (Prov. 16:20) Beaucoup finn trouvé ki, kan zot aide lezot pou ena la foi en Jéhovah, zot fortifié zot prop la foi. Kan zot faire sa, zot arrete pense zot prop probleme ek garde zot l’esprit fixé lor bann kitsoz ki pli important.​—Phil. 1:10, 11.

21. Ki nou kapav sur en rapport avek bann difficulté ki nou gagné?

²¹ Jéhovah inn donne nou beaucoup l’aide pou faire face ar nou bann probleme avek courage. Kan nou profite tou sa bann disposition-la ek kan nou medite lor l’exemple bann serviteur Bondié ki finn montré courage ek nou imite zot, nou kapav sur ki nou pou reussi faire face ar bann probleme. Mem si beaucoup lezot probleme kapav arrivé alors ki sa systeme-la pré pou disparette, nou kapav ena mem sentiment ki Paul, ki ti dire: “Pé jette nou en-bas, mais nou pa mort. . . . Nou pa baisse lé-bras.” (2 Cor. 4:9, 16) Grace a l’aide ki Jéhovah donne nou, nou kapav faire face avek courage ar bann difficulté ki nou gagné zordi.​—Lire 2 Corinthiens 4:17, 18.