Jésus, enn l’exemple l’humilité

1, 2. Pendant dernier la nuit ki Jésus ti passé lor la terre, ki leson important li ti enseigne so bann zapotre?

C’EST dernier la nuit ki Jésus reste lor la terre, ek li passe sa dan Jérusalem avek so bann zapotre, dan enn la chambre la-haut. Pendant ki zot pé prend zot repas, Jésus levé ek tire so manteau sans manche. Li mette enn serviette autour li. Apré, li vide de l’eau dan enn cuvette, li commence lave li-pied bann disciple ek li souye zot avek serviette-la. Apré sa, li remette so manteau sans manche. Kifer Jésus ti montré enn l’humilité coumsa?​—Jean 13:3-5.

² Jésus li-mem ti expliké: “Eski zot koné ki mo finn faire ar zot? . . . Alors, si moi, mem ki mo zot Seigneur ek zot Enseignant, mo finn lave zot li-pied, zot aussi, zot bizin lave li-pied zot camarade. Mo finn donne zot l’exemple, pou ki, pareil couma mo finn faire ar zot, zot aussi zot faire pareil.” (Jean 13:12-15) Kan li ti disposé pou faire sa travail humble-la, Jésus ti donne so bann zapotre enn leson important ki ti pou reste gravé dan zot l’esprit ek ki ti pou encourage zot pou manifesté l’humilité dan l’avenir.

3. (a) Couma Jésus ti mette l’accent lor l’importance l’humilité dan deux l’occasion? (b) Ki nou pou examiné dan sa lartik-la?

³ Kan Jésus ti lave li-pied bann zapotre, c’est pa premier fois ki li ti mette l’accent lor l’importance l’humilité. Avant sa, kan certain parmi bann zapotre ti manifesté enn l’esprit competition, Jésus ti mette enn ti zenfant pré kot li, ek Li ti dire zot: “Seki accueillir sa ti zenfant-la a cause mo nom, pé accueillir moi aussi, ek seki accueillir moi pé accueillir aussi sa kikenn ki’nn envoye moi-la. Parski seki agir couma enn kikenn ki pli tipti parmi zot tou, li-mem ki grand.” (Luc 9:46-48) Jésus ti koné ki bann Pharisien ti pé rod grandeur, a cause sa, plitar dan so ministere, Jésus ti dire: “Enn kikenn ki rod grandeur, li pou abaissé, ek enn kikenn ki abaisse-li, pou donne li grandeur.” (Luc 14:11) Li clair ki Jésus envie ki so bann disciple zot humble, setadir ki zot pena l’orgueil ek zot pa arrogant. Pou nou kapav imite Jésus, anou examine en detail so l’exemple l’humilité. Nou pou trouvé aussi ki c’est pa selman sa dimoune ki manifesté sa qualité-la ki gagne bann bienfait, mais aussi lezot dimoune.

“MO PA’NN TOURNE DAN ENN LOT DIRECTION”

4. Couma Garson Bondié ti manifesté l’humilité avant ki li ti vinn lor la terre?

⁴ Jésus, sel Garson ki Bondié ti crée direct, ti manifesté l’humilité avant-mem ki li ti vinn lor la terre. Dan le ciel, li ti passe enn longue periode le temps ki personne pa koné avek so Papa. Livre Isaïe, ki trouve dan la Bible, koz lor relation bien proche ki ti existé entre Garson Bondié ek so Papa. Li dire: “Souverain Seigneur Jéhovah Li-mem finn donne moi enn la langue pou koz couma bann ki’nn gagne l’enseignement, pou ki, par enn parole, mo kapav koné couma pou reponn enn kikenn ki fatigué. Toulé gramatin, Li ouvert mo zoreille pou mo kapav tendé pareil couma bann ki’nn enseigné. Souverain Seigneur Jéhovah Li-mem inn ouvert mo zoreille, ek moi mo pa’nn rebellé. Mo pa’nn tourne dan enn lot direction.” (Is. 50:4, 5) Garson Bondié ti montré enn l’attitude humble ek li ti ecoute bien seki Jéhovah ti enseigne li. Li ti ena enn grand desir ek li ti envie aprann ar vrai Bondié. Surement Jésus ti gagne l’occasion pou trouvé couma avek humilité, Jéhovah ti manifesté misericorde envers bann dimoune imparfait.

5. En tant ki Mikaël l’archange, couma Jésus inn donne enn l’exemple l’humilité ek modestie dan fason ki li ti agir avek Satan le Diable?

⁵ Pa tou bann ange dan le ciel ki ti ena mem l’attitude humble couma Jésus. Sa ange ki plitar ti vinn Satan le Diable-la, pa ti ena desir pou aprann ar Jéhovah. Li ti pensé ki li ti pli important ki lezot ek li ti ena l’orgueil. Finalement, li ti laisse sa bann defaut ki contraire ar l’humilité-la pousse li pou rebelle kont Jéhovah. Mais Jésus li, li ti satisfait ar position ki li ti ena dan le ciel ek li pa ti ena tendance pou servi so l’autorité dan enn mauvais fason. En tant ki Mikaël l’archange, Jésus pa ti depasse limite so l’autorité kan li ti ‘gagne enn desaccord avek Satan le Diable concernant lekor Moïse.’ Au contraire, Garson Bondié ti montré ki li ti ena l’humilité ek modestie. Li ti prefere ki Jéhovah, en tant ki Juge supreme l’univers, reglé sa dan fason ek dan ler ki Li trouve bon.​—Lire Jude 9.

6. Couma Jésus ti montré ki li ti ena l’humilité kan li ti accepté mission pou vinn couma Messie?

⁶ Parmi bann kitsoz ki Jésus ti aprann kan li ti dan le ciel, surement ti ena aussi bann prophetie ki concerne bann detail lor so la vie en tant ki Messie. Alors, kitfois li ti koné avant-mem, ki bann souffrance ti pé attann li. Pourtant, Jésus ti accepté mission pou vinn lor la terre ek pou mort couma Messie ki Bondié ti promette. Kifer? Pou montré l’humilité ki Jésus ti ena, l’apotre Paul ti ecrire: “Mem si li ti existé dan forme Bondié, li pa ti pense pou prend place Bondié, setadir pou vinn egal ar Bondié. Non, mais li ti laisse tou, li ti prend forme enn l’esclave ek li ti vinn pareil couma bann zom.”​—Phil. 2:6, 7.

EN TANT KI ENN HUMAIN, “LI TI ABAISSE LI-MEM”

7, 8. Dan ki fason Jésus ti montré l’humilité kan li ti tipti ek pendant so ministere lor la terre?

⁷ Paul ti ecrire: “Kan [Jésus] ti vinn couma enn humain, li ti couma enn zom, li ti abaisse-li-mem, ek li ti obeir ziska la mort, oui, la mort lor enn poteau souffrance.” (Phil. 2:8) Depuis li tipti, Jésus inn laisse nou enn l’exemple l’humilité. Mem si c’est bann parent imparfait​—Joseph ek Marie​—ki ti elevé li, Jésus ti “contigne soumette ar zot.” (Luc 2:51) C’est vrai-mem enn bon l’exemple pou bann jeune. Bondié pou beni zot si zot soumette ar zot parent.

⁸ Kan li ti enn adulte, Jésus ti montré ki li ti ena l’humilité kan li ti donne priorité volonté Jéhovah dan so la vie, pa so prop volonté. (Jean 4:34) Pendant so ministere, Jésus Christ ti servi nom personnel Bondié. Li ti aide bann dimoune sincere pou gagne enn connaissance exact lor bann qualité Jéhovah ek lor So projet pou l’humanité. Jésus ti aussi vive en accord avek seki li ti enseigné lor Jéhovah. Par exemple, dan la priere modele, premier kitsoz ki Jésus ti mentionné c’est: “Nou Papa ki dan le ciel, ki to nom sanctifié.” (Mat. 6:9) Alors, Jésus ti enseigne so bann disciple ki sanctification nom Jéhovah c’est sa ki bizin pli important pou zot. Li-mem li ti donne l’exemple. Vers la fin so ministere lor la terre, dan enn la priere, Jésus ti kapav dire ar Jéhovah: “Mo’nn faire zot [bann zapotre] konn to nom ek mo pou faire konn sa.” (Jean 17:26) En plus, toute longue so ministere, souvent Jésus ti dire ki li pa ti kapav faire nanyé sans l’aide Jéhovah.​—Jean 5:19.

9. Ki prophetie Zekaria ti annoncé concernant le Messie, ek couma Jésus ti realise sa prophetie-la?

⁹ En rapport avek le Messie, Zekaria ti prophetisé: “To bizin dan enn grand la joie, o toi tifi Sion! Pousse bann cri la victoire, o toi tifi Jérusalem! Guetté! To le roi li-mem pé vinn vers toi. Li juste, oui, li gagne la victoire; li ena l’humilité, ek li pé monte lor enn bourrik, enn zanimo adulte, garson enn femelle bourrik.” (Zek. 9:9) Sa ti accompli kan Jésus ti rente dan Jérusalem, avant Pâque, en l’an 33 nou lepok. La foule ti jette zot linge ek bann branche lor chemin. Oui, la ville en entier ti dan enn grand la joie kan li ti rente dan la ville. Mem kan la foule ti accueillir li couma le Roi, Jésus ti reste humble.​—Mat. 21:4-11.

10. Par so l’obeissance ziska la mort, ki Jésus ti prouvé?

¹⁰ Kan li ti lor la terre, Jésus Christ ti montré l’humilité ek l’obeissance ziska so la mort lor enn poteau souffrance. Dan sa fason-la, li ti prouvé ki bann dimoune kapav reste fidele ar Jéhovah mem dan pli pire situation. Jésus ti montré aussi ki Satan ti ena tort kan li ti pretann ki bann dimoune servi Jéhovah pou bann raison egoïste. (Job 1:9-11; 2:4) Kan Christ ti reste integre dan enn fason parfait, li ti aussi soutenir droit ki Jéhovah ena pou dirigé ek li ti montré ki fason ki Jéhovah dirigé, pli bon. Pena doute ki Jéhovah ti content kan Li ti trouve son Garson, ki humble, montré enn fidelité parfait.​—Lire Proverbes 27:11.

11. Ki possibilité bann dimoune ki ena la foi kapav gagné grace a la ranson?

¹¹ Par so la mort lor enn poteau souffrance, Jésus ti aussi paye la ranson pou l’humanité. (Mat. 20:28) Grace a sa, Jéhovah kapav pardonne nou peché dapré so bann principe juste, ek donne nou possibilité pou vive pou touletan. Paul ti ecrire: “Par enn sel action justification, resultat ki tou sorte qualité dimoune gagné, c’est ki declare zot juste pou gagne la vie.” (Rom. 5:18) Par so la mort, Jésus finn donne bann chretien oint possibilité pou gagne la vie immortel dan le ciel ek bann “lezot brebis,” la vie eternel lor la terre.​—Jean 10:16; Rom. 8:16, 17.

MO ENA “ENN LEKER HUMBLE”

12. Dan so rapport avek bann dimoune imparfait, couma Jésus ti montré douceur ek l’humilité?

¹² Jésus ti invite tou bann “ki pé rinté ek ki ena enn fardeau lor zot,” pou vinn vers li. Li ti dire: “Prend mo joug lor zot ek aprann ar moi, parski mo ena enn caractere doux ek enn leker humble, ek zot pou gagne reconfort pou zot nâme.” (Mat. 11:28, 29) L’humilité ek douceur Jésus ti pousse li pou montré-li bon ek pou pa faire preference envers bann dimoune imparfait. Li ti raisonnable dan seki li ti attann ar so bann disciple. Li ti felicite zot ek ti encourage zot. Jamais li ti donne zot l’impression ki zot ti bann bon nanyé ek ki zot pa ti ena valeur. Jésus pa ti brite, ni dominere. Au contraire, li ti donne so bann disciple l’assurance ki, si zot vinn proche ar li ek zot mette en pratik so l’enseignement, zot pou gagne reconfort, parski so joug doux ek so charge leger. Tou dimoune, zom ek femme, n’importe ki l’age zot ti ena, ti senti-zot a l’aise en so presence.​—Mat. 11:30.

13. Couma Jésus ti montré compassion envers bann ki ti ena enn la vie difficile?

¹³ Jésus ti ena compassion pou bann dimoune ordinaire en Israël parski zot ti ena enn la vie difficile ek li ti faire tou seki li ti kapav pou aide zot. Pré ar Jéricho, li ti zwenn deux aveugle ki ti pé demann charité. Enn ladan ti appel Bartimée ek la Bible pa dire couma lot-la ti appelé. Zot ti pé insisté pou ki Jésus aide zot, mais la foule ti criye ar zot pou zot reste trankil. Li ti pou bien facile pou ignore supplication sa deux aveugle-la! Mais au contraire, Jésus ti demann ki amenn sa deux aveugle-la vers li. Li ti ena pitié pou zot ek sa ti pousse-li pou faire zot retrouve clair. Oui, Jésus ti imite so Papa, Jéhovah, kan li ti montré l’humilité ek misericorde envers bann dimoune imparfait.​—Mat. 20:29-34; Marc 10:46-52.

“ENN KIKENN KI ABAISSE-LI, POU DONNE LI GRANDEUR”

14. Ki bienfait bann dimoune inn gagné grace a l’humilité Jésus?

¹⁴ L’humilité ki Jésus Christ ti manifesté ti faire beaucoup dimoune gagne la joie ek bann grand bienfait. Jéhovah ti bien content kan Li ti trouve so Garson ki Li content, soumette-li avek humilité pou faire So volonté. Bann zapotre ek bann disciple ti gagne enn grand reconfort par douceur ek l’humilité ki Jésus ti manifesté envers zot. So l’exemple, so l’enseignement ek so bann felicitation sincere ti encourage zot pou progressé lor plan spirituel. Bann dimoune ordinaire ti gagne bann bienfait ar l’humilité Jésus parski li ti aide zot, enseigne zot ek encourage zot. En realité, tou bann dimoune ki ena la foi en Jésus pou gagne bann benediction eternel grace a so sacrifice.

15. Couma Jésus ti gagne bann bienfait grace a so l’humilité?

¹⁵ Ki nou kapav dire lor Jésus? Eski li aussi li ti gagne bann bienfait grace a so l’humilité? Oui, parski Jésus ti dire so bann disciple: “Enn kikenn ki abaisse-li, pou donne li grandeur.” (Mat. 23:12) Sa bann parole-la finn realisé dan cas Jésus. Paul ti expliké: “Bondié finn donne [Jésus] enn pli grand position ek finn content pou donne li enn nom ki pli grand ki tou lezot nom, pou ki au nom Jésus tou genou pliyé dan le ciel ek lor la terre ek enba la terre, ek dimoune ki koz tou langage reconette en publik ki Jésus Christ, li-mem Seigneur pou la gloire Bondié, nou Papa.” Jéhovah ti donne so Garson enn grand position ek l’autorité lor bann creature ki dan le ciel ek lor la terre parski Jésus ti humble ek ti reste fidele kan li ti lor la terre.​—Phil. 2:9-11.

JÉSUS POU ‘LAGUERRE POU LA VERITÉ EK L’HUMILITÉ’

16. Couma nou koné ki Garson Bondié pou contigne manifesté l’humilité dan l’avenir?

¹⁶ Garson Bondié pou contigne manifesté l’humilité dan l’avenir. Enn psalmiste ti annoncé couma Jésus pou agir kont So bann l’ennemi en tant ki le Roi dan le ciel. Li ti chanté: “Joli couma to été, al vers la victoire, al laguerre pou la verité, l’humilité ek la justice.” (Ps. 45:4) Pendant Har-Maguédôn, Jésus Christ pou laguerre pou bann dimoune ki humble ek juste ek ki content la verité. Ki pou arrivé a la fin Regne mille an kan Jésus pou “fini detruire net tou gouvernement ek tou l’autorité ek tou puissance”? Eski li pou manifesté l’humilité? Oui, parski li pou “remette royaume ar so Bondié ek so Papa.”​—Lire 1 Corinthiens 15:24-28.

17, 18. (a) Kifer li important pou bann serviteur Jéhovah suive l’exemple l’humilité ki Jésus inn laissé? (b) Ki nou pou examiné dan prochain lartik?

¹⁷ Ki nou kapav dire lor nou? Eski nou pou imite l’exemple Jésus ek manifesté l’humilité? Dan ki situation nou pou été kan Jésus Christ en tant ki le Roi, pou vinn faire so jugement kan pou ena Har-Maguédôn? Li bien important ki nou manifesté l’humilité pou nou kapav gagne la vie sauve, parski Jésus pou sauve zis bann dimoune ki humble ek ki juste. En plus, pareil couma Jésus ek lezot dimoune ti gagne bann bienfait kan li ti manifesté l’humilité, nou aussi, si nou manifesté l’humilité, nou pou gagne bann bienfait dan plusieurs fason.

¹⁸ Ki kapav aide nou pou imite l’humilité Jésus? Couma nou kapav faire zeffort pou reste humble malgré bann difficulté ki nou kapav gagné? Nou pou examine sa bann question-la dan prochain lartik.