Resurrection Jésus​—Eski Vrai-mem Sa Ti Arrivé?

INN gagne 2,500 an, Herodote, enn historien Grec ti raconte enn zistoire lor bann Égyptien dan so lepok. Li ti ecrire: “Dan bann grand fête ki bann dimoune riche ti organisé, apré diner, enn missié ti passé ek ti sarié enn cercueil kot ti ena zimage enn dimoune mor ki’nn penn ek sculpté dan di-bois, ek ki ti mesure enn demi-metre a enn metre longueur. Li ti montré sa zimage-la tou bann ki ti la, ek li ti dire: ‘Boire ek amusé, mais guette sa bien; parski kan zot mor zot pou vinn pareil coumsa.’”

C’est pa zis bann Égyptien ki ti ena sa l’attitude-la envers lavi ek lamor. Azordi, sa l’expression “Mangé, boire, ek amusé[-la]” inn vinn bien commun. Bann dimoune dire: ‘Si lavi arrete avek lamor, kifer nou pa profite li tant ki nou kapav? Kifer nou bizin faire zeffort pou faire seki droite?’ Si tou fini avek lamor, alors vive zis pou zordi li faire sens. L’apotre Paul ti dire mem zaffaire kan li ti decrire l’attitude bann dimoune ki pa ti croire dan resurrection: “Si bann dimoune mor pa pou relevé, ‘anou mangé-boire, parski demain nou pou mor.’”​—1 Corinthiens 15:32.

Bien sur, Paul li-mem pa ti croire ki ti pou blié bann dimoune ki’nn mor pou touletan. Li ti ena l’assurance ki bann mor ti pou kapav ré-vive, avek l’espoir ki zot pa pou mor jamais. Sa l’assurance-la ti basé lor enn l’evenement bien important, enn verité ki dapré li, pa ti kapav dementi​—resurrectiona Jésus Christ. En realité, sa resurrection-la ti pli grand l’evenement ki ti fortifié la foi bann premier disciple.

Mais, couma resurrection Jésus concerne nou? Couma nou koné ki sa ti arrivé vrai-mem? Anou guetté couma Paul ti raisonne lor la kan li ti ecrire bann Chretien ki ti vive dan Corinthe.

KI TI POU ARRIVÉ SI CHRIST PA TI RELEVÉ?

Certain Chretien ki ti vive dan ancien la ville Corinthe ti ena bann doute concernant sa sujet-la, ek lezot pa ti croire ditou ki ena enn resurrection physik. Dan premier lettre ki li ti ecrire sa bann Chretien-la, Paul ti mentionne bann consequence ki ti pou ena si resurrection pa ti enn kitsoz vrai. Li ti ecrire: “Si vrai-mem pena resurrection bann mor, Christ aussi pa finn relevé. Mais si Christ pa finn relevé, pou nanyé ki nou pé preché, ek pou nanyé ki nou ena la foi. En plis, pou trouve nou couma bann fausse temoin Bondié . . . zot la foi pa servi nanyé; zot ankor dan zot peché. . . . Aussi, bann ki’nn dormi dan lamor ensam avek Christ inn fini net.”​—1 Corinthiens 15:13-18.

“Li ti apparette ar plis ki cinq cent frere en mem temps . . . Apré sa li ti apparette ar Jacques, apré ar tou bann zapotre; mais en dernier li ti apparette ar moi aussi.”​—1 Corinthiens 15:6-8

Paul ti commence so declaration avek enn raisonnement ki pa ti kapav contredire: Si bann mor pa pou relevé, alors Christ, ki finn mor, pa finn relevé. Supposé Christ pa ti relevé, ki ti pou arrivé? Alors, preche la bonne nouvelle ti pou dan vide ek enn kitsoz bien fausse. Apré tou, resurrection Christ ti enn kitsoz important lor ki la foi bann Chretien ti basé, ek sa ti ena enn lien direct avek certain bann l’enseignement principal la Bible couma souveraineté Bondié, so nom, so Royaume, ek nou delivrans. Si pa ti’nn ena sa resurrection-la, message ki Paul ek lezot zapotre ti preché ti pou zis bann parole en l’air ki pena okenn valeur.

Ti pou ena aussi lezot consequence. Si Christ pa ti’nn relevé, la foi bann chretien ti pou dan vide ek basé lor enn kitsoz ki fausse. En plis, Paul ek lezot pa ti pou’nn zis koz menti lor resurrection Jésus, mais aussi lor sa kikenn ki zot ti dire ti ressuscite li-la, Bondié, setadir Jéhovah. Pli pire, sa declaration ki Christ “finn mor pou nou bann peché[-la]” ti pou aussi enn kitsoz fausse​—parski si Sauveur-la li-mem pa finn sap dan lamor, li pa ti pou kapav sap lezot. (1 Corinthiens 15:3) Sa ti pou rod dire ki bann Chretien ki’nn mor, certain couma bann martyr, finn mor avek enn fausse l’espoir ki enn jour zot ti pou ressuscité.

Paul ti tire sa conclusion-la: “Si c’est zis dan sa lavi-la ki nou finn mette nou l’espoir dan Christ, parmi tou dimoune, nou-mem ki faire plis pitié.” (1 Corinthiens 15:19) Pareil couma bann lezot Chretien, Paul finn perdi beaucoup kitsoz, konn persecution, faire face ar bann difficulté ek lamor parski li ti croire dan resurrection ek tou seki sa ti pou rann possible. Alors, sa pa ti pou ena okenn sens si resurrection ti zis enn kitsoz fausse!

BANN RAISON POU OU CROIRE

Pou Paul, seki bann chretien ti croire pa ti fausse. Li ti koné ki Jésus ti’nn relevé parmi bann mor ek li ti faire enn resumé bann preuve pou bann Corinthiens kan li ti dire: “Christ finn mor pou nou bann peché, couma bann l’Ecriture finn dire; ek ki li ti enterré, oui, ek li finn relevé troisieme jour, couma bann l’Ecriture finn dire; ek li ti apparette ar Céphas, apré ar bann douze.”b Paul ti aussi ajouté: “Apré sa li ti apparette ar plis ki cinq cent frere en mem temps, la plupart parmi zot ankor vivant ziska ler, mais certain finn endormi dan lamor. Apré sa li ti apparette ar Jacques, apré ar tou bann zapotre; mais en dernier li ti apparette ar moi aussi.”​—1 Corinthiens 15:3-8.

Paul ti dire avek l’assurance ki Christ ti mor pou nou bann peché, ti enterré, ek ti ressuscité. Ki ti donne Paul sa l’assurance-la? Enn raison c’est ti ena plusieurs dimoune ki ti temoigné ki zot ti trouve Jésus apré so resurrection. Jésus ki ti’nn ressuscité ti apparette ar certain dimoune (parmi ti ena Paul li-mem), ar bann ti groupe dimoune, ek mem ar enn la foule 500 dimoune. Ek pena doute ki avant, beaucoup parmi zot pa ti croire kan zot ti tann dire ki Jésus inn ressuscité! (Luc 24:1-11) La plupart sa bann temoin-la ti ankor vivant dan lepok Paul ek ti kapav demann zot pou confirmé si Jésus ti apparette apré so resurrection. (1 Corinthiens 15:6) Nou kapav pa prend compte temoignage enn ou-soit deux dimoune, mais pa 500 ou-soit plis.

Remarké aussi, ki Paul ti mentionne deux fois ki lamor, l’enterrement, ek resurrection Jésus ti “couma bann l’Ecriture finn dire.” Sa bann l’evenement-la confirmé ki bann prophetie ki ena dan bann l’Écritures Hébraïques concernant le Messie ti realisé, ek sa ti prouvé ki Jésus ti Messie ki Bondié ti promette.

Malgré temoignage bann dimoune ek seki ena dan bann l’Ecriture, ti ena, ek ena ankor dimoune ki douté ki Jésus inn relevé. Certain dire ki so bann disciple ti kokin so lekor ek ti pretann ki zot ti trouve so resurrection. Pourtant, bann disciple Jésus pa ti ena ni pouvoir ni l’autorité pou influence bann soldat Romain ki ti pé veillé devant l’entrée so tombe. Lezot pretann ki kan Jésus ti apparette apré so resurrection, sa ti zis bann imagination. Mais ena enn kitsoz ki contredire sa theorie-la: Jésus ti apparette ar plusieurs dimoune ek dan diferan moment. Aussi, eski li raisonnable pou croire ki enn kitsoz ki zis dan l’imagination bann dimoune ti pou cuit ek servi poisson, pareil couma Jésus ki’nn ressuscité ti faire dan Galilée? (Jean 21:9-14) Ou-soit, eski sa l’imagination-la ti pou invite bann dimoune ki ti la, pou touche li?​—Luc 24:36-39.

Malgré sa, ena lezot ki pretann ki resurrection Jésus ti enn kitsoz fausse ki ti’nn inventé par so bann disciple. Mais ki profit zot ti pou gagné si zot ti faire sa? Kan bann disciple ti pé rann temoignage lor resurrection Jésus, sa ti kapav faire zot gagne bann moquerie, souffert, ek mem perdi lavi. Kifer eski zot ti pou prend bann grand risk coumsa pou soutenir enn kitsoz fausse? En plis, zot ti commence rann temoignage dan Jérusalem, devant lizié zot bann opposant, ki ti pé rod n’importe ki l’occasion pou condamne zot.

C’est sa resurrection-la-mem ki ti donne bann disciple courage pou rann temoignage lor zot Seigneur malgré bann persecution pli violent ki ti kapav ena. La resurrection ti vinn enn element important dan croyance bann Chretien. Bann premier Chretien pa ti riské zot lavi zis pou rann temoignage lor enn enseignant sage ki bann dimoune ti’nn assassiné. Zot ti riské zot lavi pou annonce resurrection Jésus parski sa ti prouvé ki li-mem Christ, Garson Bondié, enn kikenn ki vivant ek puissant ki ti soutenir zot ek guide zot. Grace a so resurrection, zot aussi zot ti pou relevé parmi bann mor. En realité, si Jésus pa ti relevé, vrai religion Chretien pa ti pou existé. Si Jésus pa ti’nn ressuscité, kitfois jamais nou pa ti pou’nn tann koz lor li.

Mais, couma resurrection Christ concerne nou azordi?