Pou Bann Ki Content Jéhovah, “Pena Okenn Obstacle ki Kapav Faire Zot Tombé”
“Bann ki content to la loi zot ena enn grand la paix, ek pou zot, pena okenn obstacle ki kapav faire zot tombé.”—PS. 119:165.
1. Couma l’exemple enn coureur montré ki nou aussi nou bizin bien decidé pou pa abandonné?
DEPUIS ki li ti adolescent, Mary Decker ti enn coureur professionnel ki ti bien populaire dan le monde. Beaucoup ti pensé ki, dan Jeux Olympik en 1984, li ti pou gagne medaille l’or dan final 3,000 metre. Selman, li pa’nn reussi traverse la ligne d’arrivé. Li ti maye dan lipié enn lot coureur ek li ti tombé. Li ti blessé ek ti bizin sarié li en dehors la piste, li ti en larme. Mais Mary pa ti abandonné. Dan moins ki enn an, li ti recommence galoupé. En 1985, dan enn paryaz galoupé ki bann madame ti faire, li ti etabli enn nouveau record mondial lor enn distance 1,500 metre.
2. Dan ki sens bann vrai Chretien zot dan enn paryaz galoupé, ek ki l’objectif nou bizin ena?
2 En tant ki Chretien, nou aussi nou dan enn paryaz galoupé ou-soit enn la course ki symbolik. Nou l’objectif c’est galoupé pou gagné. Nou la course li pa enn sprint kot nou bizin galoupe bien vite pou gagné. Li pa enn jogging aussi, kot nou galoupe doucement ek mem parfois arreté pou enn ti moment. Au contraire, nou kapav compare li ar enn marathon kot nou bizin l’endurance pou nou gagné. Dan lettre ki l’apotre Paul ti ecrire bann Chretien dan Corinthe, li ti servi l’exemple enn paryaz galoupé. Corinthe ti enn la ville ki ti bien populaire pou bann different sport ki ti organisé la-bas. Paul ti ecrire: “Eski zot pa koné ki dan enn paryaz galoupé, tou coureur galoupé, mais enn sel ki gagne prix? Galoupe enn fason ki zot reussi gagne sa.”—1 Cor. 9:24.
3. Couma li possible ki tou bann coureur gagne la course pou la vie eternel?
3 La Bible demann nou pou galoupe dan sa paryaz symbolik-la. (Lire 1 Corinthiens 9:25-27.) Prix ki’nn reservé c’est la vie eternel, soit dan le ciel pou bann Chretien oint, soit lor la terre pou lezot participant. Sa paryaz galoupé-la li pa pareil couma la plupart sport, ladan, tou bann ki participé ek ki enduré ziska la fin kapav gagne prix. (Mat. 24:13) C’est zis kan bann participant arrete galoupe dapré bann regle ou-soit zot pa traverse la ligne d’arrivé, ki zot perdi. En plus, c’est sel la course ki donne la vie eternel couma enn prix.
4. Kifer nou la course pou gagne la vie eternel, li difficile?
4 Li pa facile pou traverse la ligne d’arrivé. Nou bizin discipline-nou-mem ek bien decidé pou fini sa la course-la. Zis enn sel dimoune—Jésus Christ—ki’nn reussi traverse la ligne d’arrivé sans ki li tombé, mem pa enn sel fois. Mais disciple Jacques ti ecrire ki en tant ki bann disciple Christ, “nou tou, souvent nou faire erreur.” (Jacq. 3:2) Li bien vrai! Nou l’imperfection ek l’imperfection lezot kapav ralenti nou ek mem faire nou arrete galoupé pou enn ti moment. Alors, parfois nou kapav cogné, mank l’equilibre, ek mem ralenti. Nou kapav mem tombé; mais nou levé ek nou contigne galoupé. Certain finn tombé ek zot finn mem bizin l’aide pou relevé ek contigne zot la course ziska la ligne d’arrivé. Alors, li possible ki nou tombé pou enn ti moment ou-soit-mem ki nou tombé souvent.—1 Rois 8:46.
Si ou tombé, accepté l’aide ek relevé!
MEM SI OU TOMBÉ, RELEVÉ EK CONTIGNE GALOUPÉ
5, 6. (a) Kifer ‘pena okenn obstacle ki kapav faire enn Chretien tombé,’ ek ki pou aide li pou “relevé”? (b) Kifer certain pa relevé apré ki zot inn tombé?
5 Nou reaction kan nou tombé montré ki qualité dimoune nou été. Certain ki finn tombé, finn repenti ek finn contigne servi Bondié. Alors ki lezot pa finn repenti. Proverbes 24:16 dire: “Enn dimoune juste kapav tombé sept fois, mais pena doute, li pou relevé; mais bann mauvais dimoune pou tombé a cause malheur.”
6 Mem si nou tombé, nou kapav relevé. Tant ki nou faire Jéhovah confiance, Li pou disposé pou aide nou kan nou gagne probleme ou-soit kan nou faire bann erreur. Nou kapav sur ki Jéhovah pou aide nou pou “relevé” pou ki nou kapav contigne servi Li avek zele. C’est enn pensée bien encourageant pou tou bann ki content Jéhovah avek tou zot leker! Bann mauvais dimoune pena sa mem desir pou relevé-la. Zot pa demann Jéhovah so l’esprit saint pou aide zot ek zot pa rod l’aide So bann serviteur, kitfois-mem zot refuse sa l’aide-la. Mais pou bann ki ‘content la loi Jéhovah,’ pena okenn obstacle ki kapav faire zot tombe net ek disqualifié zot dan la course pou la vie.—Lire Psaume 119:165.
7, 8. Couma enn kikenn ki’nn “tombé,” kapav contigne gagne faveur Bondié?
7 Certain faire bann peché ki pa trop grave—kitfois-mem plusieurs fois—a cause bann faiblesse ki zot ena. Mais, Jéhovah considere zot toujours couma bann dimoune juste, si zot contigne “relevé,” setadir si zot repenti avek tou zot leker ek faire zeffort pou recommence servi Li avek fidelité. Nou kapav trouve sa dan fason ki Bondié ti agir avek nation Israël dan le passé. (Is. 41:9, 10) Proverbes 24:16, ki nou ti cité avant, pa mette l’accent lor enn kitsoz negatif—“tombé,” mais au contraire, li montré ki Jéhovah pou aide nou pou “relevé.” (Lire Isaïe 55:7.) Jéhovah ek Jésus Christ faire nou confiance ek zot encourage nou pou “relevé.”—Ps. 86:5; Jean 5:19.
8 Mem si enn coureur tombé dan enn marathon, kitfois li pou ena le temps pou li relevé ek fini so la course, si li agir vite. Dan nou la course pou la vie eternel, nou pa konn ‘jour ek ler’ ki sa la course-la pou fini. (Mat. 24:36) Mais kan-mem, si nou faire zeffort pou pa tombé, li pou pli facile pou nou contigne galoupé ek fini nou la course. Alors, ki nou kapav faire pou nou pa tombé?
BANN OBSTACLE KI KAPAV FAIRE NOU TOMBÉ
9. Ki bann obstacle ki kapav faire nou tombé, nou pou examiné?
9 Anou examine cinq obstacle ki kapav faire nou tombé—nou bann faiblesse personnel, bann desir la chair, bann injustice dan congregation, bann l’epreuve ou-soit bann persecution, ek l’imperfection lezot. Selman, rappel ki si nou finn tombé, Jéhovah ena beaucoup patience. Li pa pou pensé desuite ki nou infidele.
10, 11. Kont ki faiblesse personnel David ti bizin lutté?
10 Nou kapav compare nou bann faiblesse personnel ar bann ti roche ki lor la piste galoupé. Si nou examine bann l’evenement ki’nn arrivé dan la vie le Roi David ek l’apotre Pierre, nou pou remark deux parmi sa bann faiblesse-la—David pa ti touletan kapav controle-li-mem, ek parfois Pierre ti peur bann dimoune.
11 Le Roi David pa ti touletan controle-li-mem. C’est seki ti arrivé kan li ti commette l’adultere avek Bath-Shéba. Ek kan Nabal ti insulté li, David ti pré pou al touye Nabal. Oui, li ti perdi so controle, mais jamais li ti arrete faire zeffort pou faire Jéhovah plaisir. Avek l’aide lezot, li ti reussi ré-gagne so l’equilibre spirituel.—1 Sam. 25:5-13, 32, 33; 2 Sam. 12:1-13.
12. Mem si Pierre ti tombé, couma li ti contigne so la course?
12 Pierre ti peur bann dimoune, a cause sa parfois li ti tombé; pourtant, li ti reste fidele envers Jésus ek Jéhovah. Par exemple, li ti renié so Maitre, en publik, pa zis enn fois, mais trois fois. (Luc 22:54-62) Plitar, Pierre pa ti agir couma enn Chretien, li ti traite bann Chretien Non-Juif coumadir zot ti ena moins l’importance ki bann Chretien Juif ki ti circonci. Mais l’apotre Paul ti remark sa, li ti montré ki fodé pa faire preference dan congregation. Pierre ti ena enn mauvais l’attitude. Avant ki lezot Chretien ti commence imite so conduite, Paul ti donne li bann conseil bien franc, face-a-face. (Gal. 2:11-14) Eski Pierre ti tellement offensé ki li ti abandonne la course pou la vie? Non. Li ti reflechi bien lor conseil ki Paul ti donne li, ti mette sa en pratik, ek ti contigne so la course.
13. Couma enn mauvais la santé kapav faire nou tombé?
13 Parfois, enn mauvais la santé kapav rann nou la vie bien difficile. Sa aussi kapav vinn enn obstacle ki faire nou tombé. Sa kapav ralenti nou lor plan spirituel ek mem faire nou perdi nou l’equilibre ek senti-nou fatigué. Par exemple, enn soeur Japonais ti tombe malade 17 an apré so bapteme. Li ti tellement tracassé pou so la santé ki li ti vinn faible lor plan spirituel. Avek le temps, li ti vinn inactif. Deux ancien ti visite li pou encourage li ek lerla li ti recommence assisté reunion. Li dire: “Bann frere ti tellement bien accueillir moi ki sa ti touche moi ek ti faire moi ploré.” Zordi, nou soeur inn retourne dan la course.
14, 15. Ki bann grand zeffort nou bizin faire kan nou ena bann mauvais desir? Donne enn l’exemple.
14 Bann desir la chair finn faire beaucoup tombé. Kan nou tenté dan sa fason-la, nou bizin faire bann grand zeffort pou reste pur lor plan mental, moral, ek spirituel. Rappel conseil ki Jésus ti donne nou pou ‘jette loin’ ar nou, dan enn fason symbolik, n’importe ki kitsoz ki kapav faire nou tombé, mem si c’est nou lizié ou-soit nou la main. Eski sa pa concerne aussi bann pensée ek bann action immoral ki’nn faire certain abandonne zot la course?—Lire Matthieu 5:29, 30.
15 Enn frere ki ti grandi dan enn famille Chretien ti ecrire ki, depuis longtemps, li ti bizin lutté kont bann tendance homosexuel. Li ti dire: “Touletan mo ti senti-moi different. Coumadir, mo pa ti senti-moi a l’aise okenn part.” Kan li ti ena 20 an, li ti vinn pionnier permanent ek li ti enn assistant ministeriel dan congregation. Apré sa, li ti tombé lor plan spirituel, li ti gagne enn discipline, ek bann ancien ti aide li. Li ti reprend-li-mem ek li ti contigne so la course spirituel grace a la priere, l’etude la Bible, ek li ti faire zeffort pou aide lezot. Plusieurs l’année apré, li reconette: “Parfois, mo encore ena sa bann sentiment-la, mais mo pa laisse zot controle moi. Mo finn aprann ki Jéhovah pa pou laisse nou gagne enn tentation ki nou pa kapav supporté. Alors, mo croire ki Bondié koné ki mo kapav reussi.” Sa frere-la dire: “Tou sa bann zeffort ki mo’nn faire-la pou recompensé dan le monde nouveau. C’est seki mo pé attann avek impatience! Mais avant sa arrivé, mo pou contigne lutté.” Li bien decidé pou reste dan la course.
16, 17. (a) Ki’nn aide enn frere ki ti pensé li ti victime enn l’injustice? (b) Pou nou pa tombé, ki kitsoz nou bizin rappel?
16 Bann injustice ki lezot Chretien faire nou dan congregation, kapav faire nou tombé. En France, enn frere ki ti enn ancien, ti pensé ki li ti victime enn l’injustice ek sa ti faire li vinn amer. A cause sa, li ti arrete al reunion ek li ti vinn inactif. Deux ancien ti visite li ek ti prend le temps pou ecoute li. Zot pa ti arrete li kan li ti pé raconté seki, dapré li, finn arrivé. Zot ti encourage li pou jette so fardeau lor Jéhovah ek zot ti rappel li ki seki pli important c’est faire Jéhovah plaisir. Li ti bien reagir, li pa ti tardé pou retourne dan la course, ek li ti ré-vinn actif dan congregation.
17 Tou bann Chretien bizin rappel ki c’est Jésus Christ ki Chef congregation, pa bann dimoune imparfait. Jésus ena bann lizié ki “couma enn la flamme difé,” alors, li trouve tou kitsoz dan congregation exactement couma zot été, ek pli bien ki nou. (Rév. 1:13-16) Par exemple, seki nou, nou pensé enn l’injustice, en realité kitfois c’est nou ki finn mal interprete ou-soit nou finn mal comprend seki’nn arrivé. Jésus pou traite bann probleme ki ena dan congregation dan enn fason parfait ek dan bon moment. Alors, fodé pa nou laisse action ou-soit decision n’importe ki Chretien, faire nou tombé lor plan spirituel.
18. Couma nou kapav reste fidele dan bann l’epreuve ek dan bann situation difficile?
18 Deux lezot obstacle ki kapav faire nou tombé c’est bann l’epreuve ou-soit bann persecution ek l’imperfection lezot dan congregation. Dan parabole semeur, Jésus ti dire ki bann ‘tribulation ou-soit persecution’ a cause la parole, pou faire certain tombé. Nou famille, nou bann voisin, bann gouvernement kapav persecute nou a cause la verité. Ek si coumadir enn dimoune “pa’nn faire racine,” setadir si li pena enn bon spiritualité, li pou kapav tombé si li gagne sa bann persecution-la. (Mat. 13:21) Selman, si nou reste proche ar Jéhovah, message lor Royaume Bondié pou aide nou pou prend racine ek pou vinn solide dan la verité. Alors, kan nou gagne bann l’epreuve, anou faire zeffort pou prié Jéhovah ek pou medite lor bann kitsoz ki merite gagne l’honneur. (Lire Philippiens 4:6-9.) Jéhovah pou donne nou la force pou reste fidele pendant bann l’epreuve ek pou pa laisse bann situation difficile faire nou tombé.
Pa laisse nanyé empeche ou termine ou la course!
19. Kan enn kikenn offense nou, ki nou bizin faire pou nou pa tombé?
19 Li bien triste ki avek le temps, certain finn laisse l’imperfection lezot faire zot tombé ek abandonne zot la course. Certain finn tombé parski lezot inn faire bann kitsoz ki finn troublé zot conscience. (1 Cor. 8:12, 13) Si enn dimoune offense nou, eski a cause sa nou pou quitte la verité? La Bible conseil bann Chretien pou arrete jugé, pou pardonne lezot, pou arrete insisté lor zot bann droit personnel. (Luc 6:37) Kan enn kikenn offense ou, demann-ou-mem: ‘Eski mo pé juge lezot dapré mo bann preference personnel? Eski mo pou laisse l’imperfection mo bann frere faire moi quitte la course pou la vie?’ Nou l’amour pou Jéhovah pou aide nou pou pa laisse seki lezot faire empeche nou traverse la ligne d’arrivé.
GALOUPE AVEK L’ENDURANCE—EVITE TOMBÉ
20, 21. Ki ou bien decidé pou faire dan la course pou la vie eternel?
20 Eski ou bien decidé pou “termine [ou] la course”? (2 Tim. 4:7, 8) Alors, li bien important ki ou faire ou l’etude personnel. Etudié la Bible ek bann publication biblik, faire bann recherche, ek medité pou ou koné ki bann obstacle ki kapav faire ou tombé. Suppliye Bondié pou gagne so l’esprit saint pou ou kapav vinn fort lor plan spirituel. Rappel ki dan la course spirituel, mem si ou tombé ou kapav toujours levé ek retourne dan la course. Ou kapav mem tire leson ar bann erreur ki ou finn faire pou ou galoupe pli bien dan la course.
21 La Bible montré ki nou bizin termine nou la course si nou envie gagne prix ki Bondié donné, setadir la vie eternel. Dan nou la course, nou bizin actif. Li pa coumadir nou dan enn bus ki pé zis sarié nou vers la victoire. C’est nou-mem ki bizin galoupé. A mesure ki nou faire sa, Jéhovah pou donne nou “enn grand la paix.” (Ps. 119:165) Nou kapav sur ki Li pou contigne beni nou asterla ek nou pou gagne bann benediction eternel dan l’avenir, si nou fini nou la course.—Jacq. 1:12.