Zot Ti Porte-Zot Volontaire pou Servi​—Dan Mexique

LI ENCOURAGEANT pou trouvé ki enn quantité jeune Témoins pé simplifié zot la vie pou zot faire plus dan zot ministere. (Mat. 6:22) Ki bann changement zot inn faire? Ar ki obstacle zot inn faire face? Pou nou koné, anou faire connaissance avek certain ki asterla pé servi dan Mexique.

“NOU TI BIZIN FAIRE ENN CHANGEMENT”

Dustin ek Jassa, toulé-deux Américain, ti marié en Janvier 2007. Pa trop longtemps apré, zot ti reussi realise enn rêve ki zot ti ena depuis longtemps​—acheté enn bateau ek vive lor la toute longue l’année. Zot ti amarre zot bateau pré ar la ville Astoria, dan l’Oregon, en Amérique, enn joli l’endroit ki ti entouré ar bann colline ki ti rempli ar pié ek bann montagne ki ti recouvert ar la neige. Sa la ville-la pa trop loin ar l’Ocean Pacifique. Dustin dire: “N’importe kot-sa ou ti guetté, bann paysage ti extraordinaire!” Sa couple-la ti pensé ki zot ti pé amenn enn la vie simple, ki zot ti pé compte lor Jéhovah. Zot ti dire: ‘Apré tou, nou pé vive lor enn bateau apepré huit metre, nou pé travail a mi-temps, nou pé servi dan enn congregation ki koz enn lot langue, ek de temps en temps, nou faire pionnier auxiliaire.’ Mais apré enn certain temps, zot ti rann-zot compte ki zot ti pé embete-zot-mem. Dustin dire: “Au lieu ki nou ti pé soutenir congregation, la plupart du temps, nou ti pé repare nou bateau. Nou ti koné ki si nou ti vrai-mem envie mette Jéhovah en premier dan nou la vie, nou ti bizin faire enn changement.”

Jassa ajouté: “Avant mo mariage, mo ti reste Mexique, ek la-bas, mo ti dan enn congregation kot ti koz Anglais. Mo ti bien content servi la-bas ek mo ti bien envie retourné.” Pendant zot l’adoration en famille, pou augmente zot desir pou al servi dan enn lot pays, Dustin ek Jassa ti lire bann recit ki koz lor bann frere ek soeur ki finn demenagé pou al dan lezot l’endroit kot ti ena beaucoup dimoune interessé. (Jean 4:35) Dustin dire: “Nou ti envie konn sa mem la joie-la.” Kan zot ti tann dire ki dan Mexique, enn nouveau groupe ti bizin l’aide, Dustin ek Jassa ti prend enn decision. Zot ti quitte zot travail, vann zot bateau, ek zot ti al Mexique.

“PLI BON KITSOZ KI’NN ARRIVE NOU”

Dustin ek Jassa ti quitte Astoria ek ti al reste dan enn la ville ki appel Tecomán​—toujours pré ar l’Ocean Pacifique mais apepré 4,345 kilometre pli loin dan le sud. Dustin dire: “Au lieu ki ti ena enn la brise frais ek bann joli montagne, ti faire bien chaud ek partout kot ou guetté, ti ena bann pié citron.” Au commencement, zot pa ti reussi trouve enn travail. Zot pa ti ena assez l’argent, alors zot ti bizin mange di-riz ek haricot deux fois par jour, semaine apré semaine. Jassa dire: “Mais zis couma nou ti commence fatigué ar sa qualité repas-la, nou bann etudiant la Bible ti commence donne nou mangue, banane, papaye ek bien sur, bann sac rempli ar citron!” Avek le temps, sa couple-la ti gagne enn travail lor Internet. Zot ti travail pou enn lekol ki ti basé dan Taïwan pou enseigne bann lezot langue. Asterla, zot salaire permette zot gagne seki zot bizin pou vive.

Ki Dustin ek Jassa pensé lor zot nouveau la vie? Zot dire: “Sa demenagement-la, c’est pli bon kitsoz ki finn arrive nou. Nou relation avek Jéhovah ek avek sakenn nou camarade inn vinn pli fort ki nou ti pou kapav pensé. Toulé-jour nou faire beaucoup kitsoz ensam​—nou sorti dan predication, nou discuté couma pou aide nou bann etudiant la Bible, nou prepare nou bann reunion. En plus, nou nepli ena bann pression couma nou ti ena longtemps.” Zot ajouté: “Asterla nou konn enn kitsoz ki avant nou pa ti trop comprend​—sa verité ki trouve dan promesse ki ena dan Psaume 34:8 ki dire: ‘Gouté ek guetté ki Jéhovah Li bon.’”

PLUSIEURS MILLIER VOLONTAIRE​—KI POUSSE ZOT POU FAIRE SA?

Plus ki 2,900 frere ek soeur​—marié ek celibataire​—finn demenagé pou al reste dan Mexique kot encore bizin bann proclamateur. Parmi, ena beaucoup ki ena plus ki 20 an ou-soit plus ki 30 an. Kifer tou sa bann Témoins-la ti disposé pou faire bann grand zeffort coumsa? Kan ti pose sa question-la enn groupe ladan, zot ti donne trois raison principal. Ki sa bann raison-la?

Pou montré l’amour pou Jéhovah ek pou nou prochain. Leticia ti prend bapteme kan li ti ena 18 an. Li dire: “Kan mo ti voué mo la vie ar Jéhovah, mo ti comprend ki mo ti bizin servi Li avek tou mo leker ek tou mo nâme. Alors, pou montré sa l’amour-la pou Jéhovah, mo ti envie servi encore plus mo le temps ek mo l’energie dan so service.” (Marc 12:30) Hermilo, ki’nn marié avek Leticia asterla, ti ena enn tipé plus ki 20 an kan li ti demenagé pou al servi kot ti bizin encore plus proclamateur. Li dire: “Mo ti realisé ki, pli bon fason pou montré mo l’amour pou mo prochain, c’est aide bann dimoune lor plan spirituel.” (Marc 12:31) Hermilo ti pé reste Monterrey, la-bas, li ti travail dan enn la banque ek li ti ena enn la vie bien confortable. Mais li ti quitte sa grand la ville-la pou al reste dan enn ti la ville.

Pou konn enn vrai la joie ki durable. Pa trop longtemps apré so bapteme, Leticia ti accompagne enn soeur pionnier ki ena l’experience, zot ti al preche dan enn la ville isolé pendant enn mois. Leticia raconté: “Mo ti bien etonné kan mo ti trouvé couma bann dimoune ti bien reagir ar message lor Royaume Bondié, sa ti donne moi enn grand la joie. La fin sa mois-la, mo ti dire-mo-mem: ‘C’est seki mo envie faire dan mo la vie!’” Li pareil aussi pou Essly, enn soeur celibataire, ki asterla ena inpé plus ki 20 an. Li dire ki, kan li ti encore college li ti zwenn plusieurs Témoins ki ti bien zelé ek ki ti al servi kot ti bizin plus proclamateur. Li ajouté: “Kan mo ti trouve la joie lor figure sa bann frere ek soeur-la, sa ti faire moi envie ena mem la vie ki zot.” Beaucoup soeur ti faire pareil couma Essly. En realité, dan Mexique, plus ki 680 soeur celibataire pé servi kot bizin plus proclamateur. C’est vrai-mem enn bon l’exemple pou bann jeune ek aussi pou bann ki agé!

Pou ena enn la vie ki ena enn but ek ki donne satisfaction. Kan li ti fini college, Essly ti gagne enn la bourse pou al université. So bann camarade ti encourage li pou accepté sa la bourse-la ek pou amenn enn “la vie normal” setadir gagne enn diplome, faire enn carriere, acheté enn l’auto, ek prend le temps pou voyagé. Pourtant, li pa ti suive zot conseil. Essly dire: “Plusieurs parmi mo bann camarade dan la verité ti rod sa bann kitsoz-la, ek mo ti remarké ki bann l’objectif spirituel ti nepli ena enn grand l’importance pou zot. Mo ti aussi remarké ki plus zot ti implik-zot dan sa le monde-la, plus zot ti stressé avek bann probleme ki zot ti gagné. Mo ti envie servi Jéhovah pendant ki mo encore jeune.”

Essly ti prend bann lezot cours apré ki li ti’nn quitte lekol, ek sa ti permette li trouve enn travail ki ti soutenir li dan so service pionnier. Apré sa, li ti demenagé pou al dan enn l’endroit kot ti bien bizin proclamateur. Mem si sa ti difficile, li ti aprann langue ki bann Otomi ek bann Tlapanèque kozé. Asterla, kan li pense sa trois l’année ki li finn passé pou preche dan bann l’endroit isolé, li dire: “Servi kot bizin plus proclamateur finn donne moi enn satisfaction ek enn vrai but dan mo la vie. Seki pli important, sa finn faire mo relation avek Jéhovah vinn pli solide.” Phillip ek Racquel, enn couple ki ena enn tipé plus ki 30 an ek ki sorti l’Amérique, d’accord avek sa. Zot dire: “Le monde pé change tellement vite ki beaucoup dimoune ena sentiment ki zot la vie pa stable. Mais sa donne nou la vie enn vrai but pou servi dan bann l’endroit kot encore ena beaucoup dimoune ki ecoute message ki sorti dan la Bible. Li vrai-mem enn grand satisfaction!”

COUMA FAIRE FACE AR BANN DIFFICULTÉ?

Bien sur, li pa toujours facile pou al servi kot bizin plus proclamateur. Enn difficulté, c’est couma ou pou soutenir-ou-mem lor plan financier. Pou faire sa, ou bizin disposé pou adapté ar bann situation local. Verónica, enn pionnier ki ena l’experience, expliké: “Dan enn l’endroit kot mo ti servi, mo ti prepare ek mo ti vann bann mangé ki pa ti coute cher. Dan enn lot l’endroit, mo ti vann bann linge ek mo ti coupe cheveux [bann dimoune]. Asterla, mo nettoye enn lakaz ek mo donne leson bann nouveau parent, pou montré zot couma pou communik avek zot zenfant.”

Li pa facile pou adapté ar enn lot culture ek bann different coutume, surtout kan ou vive parmi bann dimoune ki reste dan enn l’endroit isolé. Phillip ek Racquel ti trouve zot dan sa situation-la kan zot ti pé servi dan enn l’endroit kot bann dimoune koz langue Nahuatl. Phillip dire: “Zot culture ti bien different.” Ki ti aide zot pou adapté? “Nou ti concentré-nou lor bann kitsoz positif ki nou ti remarké parmi peuple Nahuatl​—par exemple, dan zot famille sakenn ti bien proche ar so camarade, zot ti bien sincere dan zot rapport entre zot, ek zot ti bien genereux.” Racquel ajouté: “Nou finn aprann beaucoup kitsoz dan sa l’endroit-la ek aussi kan nou ti pé servi avek nou bann frere ek soeur ki vive la-bas.”

COUMA OU POU PREPARE-OU?

Si ou envie al servi dan enn l’endroit isolé kot bizin proclamateur, ki ou kapav faire asterla pou prepare-ou? Bann frere ek soeur ki ena l’experience dan sa forme service-la dire: Avant ki ou al dan enn lot l’endroit, commence par simplifié ou la vie ek aprann pou contente-ou ar seki ou ena. (Phil. 4:11, 12) Ki kitsoz ou kapav faire encore? Leticia dire: “Mo pa ti choisir bann travail ki ti pou engage moi lor enn longue periode le temps ek ki ti pou oblige moi reste dan enn sel place. Mo ti envie kapav allé kan mo envie​—n’importe kan ek n’importe kot-sa bizin l’aide.” Hermilo dire: “Mo ti aprann pou cuit mangé, pou lavé, ek repassé.” Verónica dire: “Kan mo ti pé vive kot mo bann parent ek mo bann frere ek soeur, mo ti donne enn coude main pou nettoyé ek pou prepare bann mangé ki pa ti coute cher mais ki ti nourrissant. Mo ti aprann aussi pou faire l’economie.”

Levi ek Amelia ki sorti l’Amérique ek ki’nn marié depuis huit an raconté couma bann la priere sincere finn aide zot pou prepare-zot pou al servi dan Mexique. Levi dire: “Nou ti calculé comié l’argent nou ti pou bizin pou al servi dan enn lot pays pou enn an ek nou ti demann Jéhovah dan la priere pou aide nou pou gagne exactement sa somme-la.” Dan deux-trois mois, zot ti’nn kapav ramasse sa somme l’argent ki zot ti mentionné dan zot la priere-la, ek zot pa ti tardé pou demenagé. Levi dire: “Jéhovah ti reponn la priere precis ki nou ti faire, alors asterla c’est nou ki ti bizin faire nou part.” Amelia ajouté: “Nou ti pensé ki nou ti pou kapav reste zis enn an, mais nou la depuis sept an, ek nou pa pé pense pou allé! Vive ici permette nou pou trouvé personnellement couma Jéhovah aide nou. Toulé-jour nou trouvé couma Li bon envers nou.”

Adam ek Jennifer, enn couple ki sorti l’Amérique, pé servi dan enn territoire dan Mexique kot bann dimoune koz Anglais. Zot dire ki la priere aussi ti aide zot beaucoup. Zot donne sa conseil-la: “Pa attann ki ou situation vinn parfait. Koz ar Jéhovah dan la priere lor ou desir pou al servi dan enn lot pays, ek agir en accord avek ou la priere. Simplifié ou la vie, ecrire comité filiale ki dan sa pays kot ou envie allé-la, ek apré ki ou finn calcule bann depense, demenagé!”a Si ou faire sa, enn la vie extraordinaire ek bien riche lor plan spirituel pou attann ou.