Juge Lezot en Avance​—Enn Probleme Mondial

KAN li ti tipti, Jonathan ki’nn né dan l’Amérique mais ki ena bann parent Coréen, ti victime discrimination racial. A mesure ki li ti pé grandi, li ti rod enn l’endroit kot bann dimoune pa ti pou juge li en avance dapré so trait ou-soit so race. Li ti travail couma docteur dan enn lavil dan le nord Alaska, dan l’États-Unis, kot beaucoup so bann patient ti ena mem trait ki li. Mem si la-bas ti faire bien frais, li ti esperé ki kitfois li ti pou nepli bizin faire face ar discrimination ki ti pli pire ki sa freser ki ti ena laba-la.

Tou l’espoir ki li ti kapav ena ti tombe dan de l’eau kan li ti soigne enn madame 25 an. Kan madame-la ti sorti dan coma, ek li ti trouve figure Jonathan, li ti commence dire li bann parole blessant ek ti zour li. Sa madame-la ti faire sa parski depuis ki li ti jeune li ti aprann pou ena la haine pou bann Coréen. Sa situation-la ti malheureusement rappel Jonathan ki tou zeffort ki li ti faire pou change l’endroit ek vive parmi bann dimoune ki ressemblé li pa ti empeche li vinn victime discrimination.

Seki’nn arrive Jonathan montré enn realité bien triste. Partout lor later ena discrimination. Avredir, partout kot ena dimoune ena discrimination.

Malgré ki ena discrimination partout, beaucoup dimoune pa hesité pou condamne sa. Sa li vrai-mem contradictoire. Couma enn kitsoz ki dimoune condamné kapav existé partout? Alors, li clair ki beaucoup ki pa d’accord ar discrimination pa conscient ki zot-mem zot juge lezot en avance. Eski sa kapav concerne ou aussi? Couma ou pou reponn sa question?

ENN PROBLEME PERSONNEL

Ki nou rann-nou compte ou-soit non, li difisil pou koné si nou pé juge enn certain categorie dimoune en avance dan nou leker. La Bible dire kifer: “Leker pli traite ki n’importe ki lezot kitsoz.” (Jérémie 17:9, Holman Christian Standard Bible) A cause sa, nou kapav embete nou-mem ek croire ki nou accepté tou sorte qualité dimoune. Ou-soit nou kapav pensé ki nou ena enn bon raison pou considere certain categorie dimoune dan enn fason negatif.

Kitfois li difisil pou trouvé ki nou juge lezot en avance dan nou leker. Pou comprend sa, anou prend enn l’exemple: Faire coumadir ou pé marché lor enn chemin tousel dan noir, ek deux jeune gens ki ou pa koné pé vinn dan ou direction. Zot parette costaud ek enn ladan coumadir ena enn kitsoz dan so la main.

Eski ou fini tire conclusion ki sa bann jeune gens-la zot enn menace pou ou? C’est vrai ki bann l’experience ki ou’nn faire dan le passé kapav faire ou senti ki ou bizin prend bann precaution, mais eski seki’nn arrive ou li vrai-mem enn bon raison pou pensé ki sa deux jeune gens-la zot dangereux? Ou-soit eski ou pé demann ou-mem: ‘Ki race ou-soit ki communauté sa bann dimoune-la été?’ Ou reponse pou sa question-la kapav montré couma dan enn certaine fason ou’nn affecté par sa defaut pou juge lezot en avance-la.

Si nou honnete avek nou-mem, nou pou reconette ki nou tou dan enn certaine fason ena sa defaut pou juge lezot en avance-la. Mem la Bible koz lor enn fason ki bann dimoune souvent juge lezot en avance kan li dire: “Bann dimoune juge lezot dapré zot l’apparence.” (1 Samuel 16:7, Contemporary English Version) Parski nou tou ena sa tendance-la​—souvent avek bann consequence bien grave​—eski ena kit l’espoir ki enn jour nou pou kapav surmonte ou-soit elimine discrimination dan nou lavi? Eski pou arrive enn jour kot partout lor later bann dimoune pou nepli juge lezot en avance?