Eski Bondie Trakase kan Nou Soufer?

KOUMA LI’NN KAPAV LES SA ARIVE?

Michelle: Zordi mo pe les sa trak-la avek tou dimounn dan ou landrwa. So tit se Eski ou ti pou content konn la verité? Sa se pou ou.

Sophia: Eski li koz lor relizion sa?

Michelle: Wi. Get lor so premie paz ena sis kestion. Lekel kestion ki​—

Sophia: Mo aret ou lamem. Ou pou perdi ou letan koz ar mwa.

Michelle: Kifer ou dir sa?

Sophia: Be laverite se, mo pa mem sir ki mo krwar dan Bondie.

Michelle: Abe, mo apresie ki ou’nn fran avek mwa. Eski mo kapav demann ou si touletan ou’nn pans koumsa?

Sophia: Non, depi tipti mo ti pe al legliz. Me sa fer bien lontan mo’nn aret ale.

Michelle: Ah ok. Ofet, mo apel Michelle.

Sophia: Mwa, Sophia.

Michelle: Bien kontan pou zwenn ou Sophia.

Sophia: Mo’si.

Michelle: Mo pa la pou fors ou pou aksepte mo bann krwayans, Sophia. Me, mo ti anvi kone kanmem. Eski ena enn kitsoz ki’nn sirtou fer ou doute ki Bondie existe?

Sophia: Wi. Fer 17 an depi ki mo mama inn fer enn aksidan loto.

Michelle: Mo bien sagrin pou tann sa. Eski li ti blese?

Sophia: Wi, depi sa aksidan-la li paralize.

Michelle: Bien tris. Sirman sa bien afekte ou.

Sophia: Wi. Akoz sa mo demann momem, si Bondie existe, kouma Li’nn kapav les sa arive? Kifer Bondie les nou soufer koumsa?

ESKI LI MOVE NOU DEMANDE KIFER?

Michelle: Li pa move ki ou ena sa bann santiman-la ek poz bann kestion koumsa. Kan nou soufer, li bien normal pou nou demande kifer. Ofet, mem sertin zom ek fam fidel dan lepok Biblik ti poz zotmem sa kestion-la!

Sophia: Abon!

Michelle: Wi. Eski mo kapav montre ou enn lexanp dan Labib?

Sophia: Wi mo ti pou kontan.

Michelle: Remark seki enn profet fidel ki apel Habaqouq ti demann Bondie dan Habaqouq sapit 1, verse 2 ek 3: “Ziska kan, O Jéhovah, mo pou bizin kriye o-sekour san ki to tande? Ziska kan mo pou demann twa led kont laviolans san ki to amenn delivrans? Kifer to fer mwa trouv seki move?” Eski ou trouv sa bann kestion-la parey kouma seki ou’nn poz oumem?

Sophia: Wi zot parey.

Michelle: Bondie zame pa’nn repros Habaqouq pou so bann kestion, ni dir li ki li ti bizin ena plis lafwa.

Sophia: Interesan sa.

JÉHOVAH DETESTE SOUFRANS

Michelle: Labib ansegn nou ki Bondie remark nou bann soufrans ek ki Li pa indiferan ar sa.

Sophia: Ki ou pe rod dir?

Michelle: Les mo montre ou enn lexanp dan Exode 3:7. Eski ou kapav lir sa verse-la?

Sophia: Ok. Li dir: “Ek Jéhovah ti azoute: “Wi, mo finn trouve kouma mo pep pe pas mizer dan l’Égypte, ek mo finn tann zot kriye akoz bann ki pe fors zot pou travay, parski mo konn bien bann douler ki zot pe siporte.’”

Michelle: Mersi. Dapre sa verse-la, eski Bondie trouve kan so pep soufer?

Sophia: Wi, paret ki Li trouve.

Michelle: Ek Li pa zis konn lao-lao ki pe pase. Reget dernie parti sa verse-la. Bondie dir: “Mo konn bien bann douler ki zot pe siporte.” Eski se bann parol enn Bondie ki pena okenn santiman, ouswa ki pa interese ar so pep sa?

Sophia: Non, mo pa krwar.

Michelle: Biensir, get enn sitiasion ek resanti kitsoz kan nou get sa sitiasion-la, se de zafer diferan.

Sophia: Vre sa.

Michelle: Anmemtan ki nou pe reflesi lor la, les nou lir lor enn lot sitiasion kot pep Bondie ti pe soufer. Li trouv dan Isaïe 63:9. Premie parti sa verse-la dir: “Pandan tou zot soufrans, Li osi Li ti soufer.” Alor eski ou pa panse ki sa ti afekte Bondie kan so pep ti pe soufer?

Sophia: Wi, mo ena linpresion ki se samem li pe rod dir.

Michelle: An-verite, Sophia, se ki Bondie bien interese ar nou, ek Li deteste trouv nou soufer. Kan nou soufer, Li soufer ansam ar nou.

KIFER LI’NN ATANN?

Michelle: Avan mo ale, ena enn lot panse mo ti pou kontan partaz avek ou.

Sophia: Dakor.

Michelle: Get seki Labib ansegn nou lor pouvwar Bondie. Sa panse-la li trouv dan Jérémie 10:12. Ou kapav lir li silvouple?

Sophia: Biensir. Li dir: “Limem sa Kikenn ki’nn fer later par so lafors, sa Kikenn ki’nn etabli later prodiktif dan enn fason solid par so sazes, ek sa Kikenn ki par so lintelizans inn tal lesiel.”

Michelle: Mersi. Les nou reflesi enn kou lor sa verse-la. Eski Bondie ti bizin enn gran pouvwar pou kree sa gran liniver-la ek tou seki ena ladan?

Sophia: Be wi.

Michelle: Aster, si Bondie ena pouvwar pou kree tou kitsoz toutotour nou, eski nou pa atann ki Li ena osi pouvwar pou eliminn nou bann soufrans?

Sophia: Wi.

Michelle: Repans ou mama. Kifer sa fatig ou pou trouv li soufer?

Sophia: Parski mo kontan li. Se mo mama.

Michelle: Ek si ou ti ena pouvwar pou geri li zordi, eski ou ti pou fer li?

Sophia: Biensir.

Michelle: Reflesi ki sa oule dir. Labib ansegn nou ki Bondie trouv nou bann soufrans, Li konpran seki nou resanti, ek Li ena boukou pouvwar. Alor, ou kapav mazine ki kantite metriz Bondie bizin ena pou pa azir ek eliminn nou bann soufrans deswit!

Sophia: Zame mo ti pans koumsa avan.

Michelle: Eski li posib ki Li ena enn bon rezon pou pa azir aster-la mem pou tir nou bann soufrans?a

Sophia: Hmm, mo sipoze Li bizin ena.

Michelle: Mo pe tann ou telefonn sone, les mo revini enn lot fwa, ek lerla nou kapav kontign sa konversasion-la.

Sophia: Mersi. Mo pou bien kontan.b