Pornografi​—Danzere Ouswa Non?

Zordi lemond ranpli ar pornografi.a Nou kapav trouv sa dan bann reklam, lamod, bann fim, lamizik, bann magazinn, televizion, bann zwe video, portab, bann laparey elektronik, bann sit Internet, ek asterla dan bann servis kot partaz bann foto lor internet. Li paret ki azordi bann dimounn pe aksepte fasilman pornografi. Dan nou lepok, boukou dimounn dan boukou pei pe gagn kontak avek pornografi plis ki avan.​—Get lankadre “Bann Sif Konsernan Pornografi.”

Avek letan, pornografi pe pran diferan form. Profeser Gail Dines ekrir: “Zordi bann zimaz pornografik inn vinn telman kri, ki seki bann dimounn ti pe konsider kouma indesan lontan, zordi inn vinn enn kitsoz normal.”

Kouma ou konsider sa bann tandans-la? Eski pornografi li enn pastan ki pa fer ditor, enn pwazon ki amenn lamor, ouswa li ant, setadir li fer enn tigit ditor me li pa amenn lamor? Jésus ti dir: “Tou bon pie raport bann bon frwi, me tou pie pouri raport bann frwi ki pena valer.” (Matthieu 7:17) Ki frwi pornografi prodir? Pou gagn bann repons, anou examinn sertin kestion inportan lor pornografi.

Ki lefe pornografi ena lor bann dimounn?

SEKI BANN EXPER DIR: Kan enn dimounn gagn kontak avek pornografi, sa vinn koumadir enn ladrog pou li. Sertin serser ek terapist konpar pornografi ar bann ladrog kouma kokainn.

Brian,b ki ti abitie get pornografi lor Internet, dir: “Nanye pa ti kapav aret mwa. Mo pa ti kapav kontrol mo bann panse. Mo ti gagn bann tranbleman ek mo latet ti fermal. Mo ti fer zefor pou arete, me plizir lane apre mo ti ankor esklav pornografi.”

Bann dimounn ki’nn tom dan pornografi, souvan kasiet seki zot pe fer. Zot fer bann kitsoz anba-anba ek zot tronp lezot. Akoz sa, boukou santi zot tousel, gagn onte, trakase, gagn depresion ek fer koler. Dan sertin ka, zot rod mem swisid zot. Serge ki ti download bann zimaz pornorgrafik lor so telefonn portab preske toulezour, dir: “Touletan mo ti dan refleksion ek mo ti dezespere. Mo ti santi mwa kouma enn nanye ditou, mo ti osi santi mwa koupab, tousel ek pieze. Mo ti santi mwa telman zene ek per, ki mo pa ti al rod led.”

Mem si enn dimounn gagn kontak avek pornografi pou enn ti moman ouswa par aksidan, sa kapav ena bann move lefe. Pandan enn komite ki ti ena dan l’États-Unis, Dr. Judith Reisman, enn gran serser lor pornografi, ti dir: “Bann zimaz pornografik res dan nou lespri ek sanz nou fason panse. Mem si [enn dimounn] get sa bann zimaz-la pou enn ti moman ouswa par aksidan, sa les enn tras dan so memwar [ki] difisil ouswa inposib pou efase.” Susan, ki ena 19 an ek ki ti gagn kontak avek pornografi lor bann sit Internet, dir: “Sa bann zimaz-la inn res grave dan mo lespri. Parfwa, san ki mo atann, zot nek aparet. Mo ena linpresion ki zame mo pou kapav efas zot net.”

SO KONSEKANS: Pornografi fer bann dimounn vinn esklav ek li detrir zot.​—2 Pierre 2:19.

Ki lefe pornografi ena lor bann fami?

SEKI BANN EXPER DIR: “Bann maryaz ek bann fami kase akoz pornografi.”​—Le piège de la pornographie (an Anglais), par Wendy ek Larry Maltz.

Pornografi detrir bann maryaz ek bann fami kan li

• Diminie konfians, relasion intim, ek lamour ki ena dan enn fami.​—Proverbes 2:12-17.

• Fer bann dimounn vinn egois, kree distans lor plan afektif, ek fer bann konzwin nepli satisfe avek zot kamarad.​—Éphésiens 5:28, 29.

• Ogmant bann panse imoral ek bann dezir pou ena bann relasion sexiel malsin.​—2 Pierre 2:14.

• Pous bann ki ena kontak avek pornografi pou obliz zot konzwin gagn bann relasion sexiel degoutan avek zot.​—Éphésiens 5:3, 4.

• Ankouraz bann dimounn pou vinn infidel lor plan afektif ek fizik.​—Matthieu 5:28.

Labib demann bann konzwin pou pa “fer tret” sakenn avek so kamarad. (Malaki 2:16) Kan enn dimounn vinn infidel se koumadir li pe fer tret avek so konzwin. Sa kapav detrir enn maryaz ek amenn separasion ek divors. Ek kan enn maryaz kase, se bann zanfan ki soufer.

Pornografi kapav osi afekte bann zanfan dan enn fason pli direk. Brian, ki nou’nn site avan, dir: “Kan mo ti ena anviron di-z-an ek mo ti pe zwe kouk kasiet, mo ti tom par aksidan lor bann magazinn pornografik mo papa. Mo ti koumans get sa bann magazinn-la an kasiet, mem si mo pa ti vremem kone kifer mo ti atire ar sa bann zimaz-la. Se koumsa ki mo’nn koumans sa move labitid-la ek sa inn kontigne ziska ki mo vinn enn adilt.” Bann letid montre ki pornografi kapav inflians bann adolesan ek fer zot koumans gagn bann relasion sexiel pli boner, ek osi pou sanz-sanz partner, gagn bann relasion sexiel agresif, ek vinn instab lor plan afektif ek psikolozik.

SO KONSEKANS: Pornografi detrir lamour ki ena ant bann dimounn ek amenn douler ek soufrans.​—Proverbes 6:27.

Ki Labib dir lor pornografi?

PAROL BONDIE DIR: “Alor, detrir net bann manb zot lekor . . . konsernan fornikasion, inpirte, bann dezir sexiel, bann dezir ki fer ditor, ek bann lanvi exazere, ki enn idolatri.”​—Colossiens 3:5.

An de-trwa mo nou kapav dir ki Jéhovahc ena laenn pou pornografi. Sa pa vedir ki Bondie konsider bann relasion sexiel kouma enn size tabou. Se Li ki’nn kree nou bann organn sexiel avek lobzektif ki bann konzwin servi sa pou fer plezir zot kamarad, rapros zot lor plan afektif, ek ena privilez pou gagn bann zanfan.​—Jacques 1:17.

Alor, kifer nou kapav dir avek konviksion ki Jéhovah ena laenn pou pornorgrafi? Anou get de-trwa rezon.

• Li kone ki pornorgrafi kapav detrir lavi bann dimounn.​—Éphésiens 4:17-19.

• Li kontan nou ek Li anvi protez nou kont bann kitsoz ki kapav fer nou ditor.​—Isaïe 48:17, 18.

• Jéhovah anvi protez bann maryaz ek bann fami.​—Matthieu 19:4-6.

• Li anvi ki nou res prop lor plan moral ek ki nou respekte drwa lezot.​—1 Thessaloniciens 4:3-6.

• Li anvi ki nou respekte nou bann organn reprodiksion ek servi zot dan enn bon fason.​—Hébreux 13:4.

• Jéhovah kone ki pornografi reflet enn fason panse deforme, egois, ek satanik ki bann dimounn ena lor sex.​—Genèse 6:2; Jude 6, 7.

SO KONSEKANS: Pornografi gat lamitie ki enn dimounn ena avek Bondie.​—Romains 1:24.

Me selman, Jéhovah ena enn gran konpasion pou bann dimounn ki anvi libere ar pornografi. Labib dir: “Jéhovah ena mizerikord ek konpasion, Li pa ankoler vit ek Li ena lamour fidel an abondans. Parski Li konn bien kouma nou finn forme, Li rapel ki nou finn fer ar lapousier.” (Psaume 103:8, 14) Li invit bann dimounn inb pou tourn ver Li pou zot “gagn mizerikord ek trouv faver ki personn pa merite pou gagn led dan ler ki bizin.”​—Hébreux 4:16; get lankadre “Libere ar Pornografi.”

Plizir milye dimounn inn aksepte led Bondie. Eski so led marse? Get seki Labib dir konsernan sertin dimounn ki’nn aret zot bann move pratik: “Finn pirifie zot, . . . finn fer zot vinn sin, . . . finn deklar zot [kouma bann dimounn] ki drwat o nom nou Segner Jésus Christ ek avek lespri nou Bondie.” (1 Corinthiens 6:11) Parey kouma lapot Paul, sa bann dimounn-la kapav dir: “Pou tou kitsoz mo ena kouraz gras-a [Bondie] ki donn mwa lafors.”​—Philippiens 4:13.

Susan, ki’nn libere ar pornografi, dir: “Se zis Jéhovah ki kapav ed ou pou libere ar pornografi. Si ou demann Li so led ek so direksion, Li pou kapav pirifie ou lor plan moral. Li pa pou abandonn ou.”