REPONS POU BANN KESTION BIBLIK

Eski Bondie ekout tou bann lapriyer?

Bondie ekout bann dimounn dan tou nasion. (Psaume 145:18, 19) So Parol, Labib, ankouraz nou pou koz ar Li lor ninport ki kitsoz ki konsern nou. (Philippiens 4:6, 7) Me selman, ena sertin lapriyer ki Bondie pa kontan. Par exanp, Li pa kontan kan nou repet bann lapriyer ki nou finn aprann par-ker.​—Lir Matthieu 6:7.

Jéhovah pa kontan osi lapriyer bann dimounn ki rezet volonterman so bann lalwa. (Proverbes 28:9) Par exanp, dan lepok Biblik, Bondie ti refiz ekout lapriyer bann Israélite ki ti komet bann krim. Li kler, ena sertin kitsoz ki nou bizin fer pou ki Bondie ekout nou.​—Lir Isaïe 1:15.

Ki nou bizin fer pou ki Bondie ekout nou?

Pou nou koz ar Bondie dan lapriyer nou bizin ena lafwa. (Jacques 1:5, 6) Nou bizin ena konviksion ki Li existe ek ki Li pran nou swin. Nou kapav fortifie nou lafwa kan nou etidie Labib, parski vre lafwa li baze lor bann prev ek promes ki trouv dan Parol Bondie.​—Lir Hébreux 11:1, 6.

Kan nou priye nou bizin sinser ek inb. Mem Garson Bondie, Jésus, ti inb kan li ti priye. (Luc 22:41, 42) Alor, olie ki nou dir Bondie ki Li bizin fer, nou bizin esey konpran ki Li pe demann nou fer. Se kan nou lir Labib ki nou pou konn sa. Lerla nou pou kapav priye an-akor avek volonte Bondie.​—Lir 1 Jean 5:14.