Kouma Nou Kapav Ed Bann Dimounn Ki Bizin Led?
FRANÇOIS, enn ansien ki res dan enn pei pov rakonte: “Apre ki ti anons rezilta enn eleksion, boukou dimounn pa ti dakor ek lerla ti ena enn revolision, ek sa ti fors plizir milye Temwin Jéhovah pou kit zot pei. Manze ek medsinn ti vinn bien rar, ek seki ti reste ti bien ser. Bann labank ti ferme ek bann masinn kot ti kapav tir kas, ti vid ouswa ti nepli marse.”
Bann frer dan biro nasional bann Temwin Jéhovah deswit ti koumans donn larzan ek bann kitsoz neseser pou bann Temwin ki ti vinn kasiet dan bann Lasal kot fer renion, partou dan pei. Bann group rival ti blok bann semin, me parski toule-de group ti kone ki bann Temwin pa partisip dan lager, zot ti les nou transpor pase.
François kontign rakonte: “Kan nou ti pe al dan enn Lasal kot fer renion, bann zom arme ti tir lor nou vann. Selman, bann bal pa ti tous nou. Kan nou ti trouv enn solda pe galoup dan nou direksion avek so zarm dan so lame, nou ti degaze met aryer, nou ti fer demi tour. Nou ti bien rekonesan anver Jéhovah ki nou ti ankor vivan. Landemin, sa 130 frer ki ti dan Lasal la ti reisi trouv enn plas kot zot ti an sekirite. Sertin ti vinn dan biro nasional ek nou ti okip zot lor plan spiritiel ek materyel, ziska lafin revolision.”
Apre sa, François dir: “Plitar, biro nasional ti gagn plizir let ki bann frer partou dan pei ti ekrir pou dir ki kantite zot ti rekonesan. Kan zot ti trouve kouma zot bann frer dan lezot plas ti vinn ed zot, sa ti ogmant zot konfians an Jéhovah.”
Kan ena bann katastrof natirel ouswa ki bann zom finn provoke, nou pa dir nou bann frer ek ser ki bizin led ki zot bizin “sof zot bien ek manz bien.” (Jacq. 2:15, 16) Okontrer, nou rod enn fason pou donn zot seki zot bizin. Se seki ti arive dan premie siek kan ti ena enn lafaminn, “bann disip ti deside pou avoy bann sekour pou ed bann frer ki ti res Judée.”—Actes 11:28-30.
Antan ki bann serviter Jéhovah, nou bien anvi ed bann dimounn ki ena problem, lor plan materyel. Selman, bann dimounn ena osi bann bezwin spiritiel. (Mat. 5:3) Pou ed sa bann dimounn-la lor plan spiritiel, Jésus ti donn lord so bann disip pou fer lezot disip. (Mat. 28:19, 20) Sakenn parmi nou, nou konsakre boukou letan, lafors, ek seki nou ena, pou fer bann disip. Antan ki enn lorganizasion, nou servi enn parti larzan ki nou gagne kouma bann don, pou ed lezot lor plan materyel. Me nou servi bann donasion sirtou pou favoriz bann aktivite ki an rapor avek Rwayom Bondie ek pou fer konn bonn nouvel. Koumsa, nou montre nou lamour pou Bondie ek pou nou prosin.—Mat. 22:37-39.
Bann ki soutenir laktivite bann Temwin Jéhovah dan lemond antie, kapav sir ki pe servi zot donasion dan pli bon fason posib. Eski ou kapav ede pou soulaz ou bann frer ek ser ki bizin led? Eski ou anvi soutenir laktivite pou fer bann disip? Si wi, “pa refiz fer di-bien pou bann dimounn ki merite, sak fwa ki [ou] trouve ki [ou] kapav fer sa.”—Prov. 3:27.