Eski Nou Bizin Priye Zezi?
PA TRO lontan finn fer enn sondaz lor 800 zenn dan plis ki douz relizion. Ti demann zot si zot krwar ki Zezi reponn bann lapriyer. Plis ki 60 poursan ti dir ki zot sir ki Zezi reponn bann lapriyer. Me, enn tifi ladan ti rey nom Zezi lor sa lalis-la ek ti ekrir “Bondie” dan so plas.
Ki ou panse? Eski nou bizin priye Zezi ouswa Bondie?a Pou gagn repons sa kestion-la, avan tou anou gete kouma Zezi ti ansegn so bann disip pou priye.
ZEZI TI ANSEGN NOU POU PRIYE KISANNLA?
Zezi ti ansegn ek ti montre nou kisannla nou bizin priye.
Kan li’nn priye so Papa ki dan lesiel, Zezi inn donn nou enn lexanp pou swiv
SO LANSEGNMAN: Kan enn bann disip ti demann Zezi: “Segner, montre nou kouma priye,” Zezi ti reponn: “Kan zot priye, dir: Papa.” (Lik 11:1, 2) Pli lwin, dan so Sermon lor Montagn, Zezi ti ankouraz bann ki ti pe ekout li pou priye. Li ti dir: “Priye to Papa.” Li ti osi rasir zot kan li ti dir: “To Papa deza fini kone ki bon pou twa avan mem ki to dimann li.” (Matie 6:6, 8) So dernie lanwit lor later, Zezi ti dir so bann disip: “Tou seki zot demann mo Papa lor mo nom, li pou donn zot.” (Zan 16:23) Alor Zezi ti ansegn nou pou priye Bondie Zeova, so Papa ek anmemtan nou Papa.—Zan 20:17.
SO LEXANP: Zezi limem ti priye so Papa parey kouma li ti ansegn lezot pou fer. Li ti dir: “[Mo loue twa devan tou dimounn, NW] Papa, Segner lesiel ek later.” (Lik 10:21) Enn lot fwa ankor, “Zezi lev so lizie lao e li dir: ‘Papa, mo rann twa gras parski to finn ekout mwa.’” (Zan 11:41) Ek kan li ti pe mor, Zezi ti priye: “Papa, mo met mo lespri dan to lame.” (Lik 23:46) Kan li’nn priye so Papa ki dan lesiel—“Segner lesiel ek later”—Zezi inn les enn bon lexanp pou nou swiv. (Matie 11:25; 26:41, 42; 1 Zan 2:6) Eski se koumsa ki bann premie disip ti konpran so bann linstriksion?
KISANNLA BANN PREMIE KRETIEN TI PRIYE?
De-trwa semenn apre ki Zezi ti mont dan lesiel, so bann disip ti gagn persekision ek zot bann lennmi ti menas zot. (Zistwar Bann Apot 4:18) Biensir zot ti priye pou gagn led—me kisannla zot ti priye? “Avek enn sel leker zot tou ti priye Bondie” “dan nom Zezi [so] serviter” pou ki Li kontign ed zot. (Zistwar Bann Apot 4:24, 30) Alor, bann disip ti swiv bann linstriksion ki Zezi ti donn zot lor lapriyer. Zot ti priye Bondie, pa Zezi.
Plizir lane apre, lapot Pol ti dekrir kouma li ek so bann konpagnon ti priye. Kan li ti ekrir so bann konpagnon Kretien, li ti dir: “Dan lapriyer ki nou fer pou zot, nou remersie toultan Bondie, Papa nou Segner Zezi Kris.” (Kolosien 1:3) Pol ti osi ekrir so bann konpagnon Kretien: “Dan nom nou Segner Zezi Kris, dir mersi Bondie Papa toultan ek pou tou kiksoz.” (Efezien 5:20) Dapre sa bann parol-la, nou trouve ki Pol ti ankouraz lezot pou priye “Bondie Papa” pou tou kitsoz—me biensir, dan nom Zezi.—Kolosien 3:17.
Parey kouma bann premie Kretien, nou kapav montre ki nou kontan Zezi kan nou ekout konsey ki li’nn donn nou lor lapriyer. (Zan 14:15) Kan nou priye zis nou Papa ki dan lesiel, bann parol ki ena dan Psom 116:1, 2 pou ena plis sans pou nou. Sa Psom-la dir: “Mo kontan Zeova parski Li tann mo lavwa . . . mo pou kriye Li tanki mo vivan.”b
a Dapre Labib, Bondie ek Zezi zot pa egal. Pou gagn plis ransegnman, get sapit 4 dan liv Ki la Bible enseigné vrai-mem? pibliye par bann Temwin Zeova. Sa liv-la
b Pou ki Bondie aksepte nou lapriyer, nou bizin fer bann zefor sinser pou viv dapre so bann prinsip. Pou gagn plis ransegnman, get sapit 17 dan liv Ki la Bible enseigné vrai-mem?