Lamor ek Rezireksion Zezi—Seki Sa Reprezante pou Ou

Bondie pa’nn kree bann dimounn pou mor

“Ek Zeova ti pran li ek ti met li dan zardin Edenn pou kiltiv zardin-la ek pou pran li swin. Ek osi Zeova ti donn lord sa zom-la: ‘To kapav manz frwi tou bann pie ki ena dan zardin, kantite ki to anvi. Me, konsernan pie konesans bon ek move, fode pa ki to manz so frwi, parski zour ki to manz sa, vremem to pou mor.’”​—Zenez 2:15-17.

Bondie ti met premie zom, Adan, dan zardin Edenn, enn paradi lor later kot ti ena boukou kreatir vivan ek bann zoli plant. Ti ena bann pie frwi kot Adan ti kapav manz kantite frwi li anvi. Selman, Zeova ti defann Adan manz frwi enn pie an partikilie. Zeova ti averti li ki si li fer sa, li pou mor.

Eski Adan ti konpran sa lord-la? Li ti kone ki ete lamor parski li’nn trouv bann zanimo mor. Si Bondie ti kree Adan pou mor apre, lord ki Bondie ti donn li pa ti pou vremem ena sans. Okontrer, Adan ti kone ki si li ti obeir Bondie ek pa manz frwi sa pie-la, li ti pou viv pou touletan, setadir li pa ti pou mor.

Sertin krwar ki sa pie-la ti reprezant bann relasion sexiel, me sa li inposib. Zeova ti anvi ki Adan ek so madam, Ev, “gagn boukou zanfan” ek “ranpli later ek ena kontrol lor li.” (Zenez 1:28) Sa linterdiksion-la ti aplik ar enn vre pie. Zeova ti apel sa pie-la “pie konesans bon ek move” parski li ti reprezant drwa ki Bondie ena pou deside ki kitsoz bon ek ki kitsoz move pou bann dimounn. Si Adan pa ti manz frwi sa pie-la, li pa ti pou zis montre so lobeisans me osi ki li ena rekonesans anver Bondie ki’nn kree li ek ki’nn beni li an abondans.

Adan ti mor parski li ti dezobeir Bondie

“Bondie dir Adan: ‘Parski to’nn . . . manz sa frwi ki mo ti defann zot [la], . . . to pou bizin transpire pou to gagn to dipin, ziska ki to retourn dan later, parski se ladan ki to finn sorti. Parski to finn fer avek lapousier ek to pou revinn lapousier.’”​—Zenez 3:17, 19.

Adan ti manz frwi ki Bondie ti defann li ek Bondie ti konsider so dezobeisans kouma enn kitsoz grav. Par so rebelion, Adan ti montre dan enn fason kler ki li pa ti pran kont tou bann kitsoz ki Zeova ti fer pou li. Kan li’nn manz sa frwi-la, Adan inn rezet Zeova, ek li’nn swazir pou amenn enn lavi indepandan. Ek sa ti pou amenn bann move konsekans.

Parey kouma Zeova ti anonse, Adan ti mor. Bondie ti form Adan “avek lapousier later” ek ti dir ki li ti pou “revinn lapousier.” Savedir ki Adan pa ti pran enn lot form ni li ti al dan enn lot lemond. Kan Adan ti mor li pa ti ena lavi, parey kouma lapousier pena lavi.​—Zenez 2:7; Ekleziast 9:5, 10.

Nou mor parski nou bann desandan Adan

“Par enn zom pese finn vinn dan lemonn, e lamor finn rantre par pese, e lamor finn tous tou dimoun, parski tou finn fer pese.”​—Romin 5:12.

Dezobeisans Adan​—ouswa pese​—finn ena bann gran konsekans. Kan Adan ti fer pese, li pa ti perdi enn lavi ki bann dimounn azordi an zeneral ena, setadir viv 70 ouswa 80 an. Me li’nn perdi posibilite pou viv pou touletan. Anplis, li’nn vinn inparfe ek li’nn transmet so linperfeksion ar tou so bann desandan.

Nou tou nou bann desandan Adan. Akoz li, nou’nn erit enn lekor inparfe ki ena tandans pou fer pese ek ki finalman mor. Pol ti dekrir bien nou kondision. Li ti ekrir: “Mo enn dimounn avek enn lekor mortel ek finn vann mwa kouma enn esklav pese. Mo enn dimounn dezespere! Kisannla pou delivre mwa ar sa lekor ki’nn kondane pou konn sa lamor-la?” Apre sa Pol ti reponn so prop kestion: “Mo remersi Bondie par Zezi Kris nou Segner!”​—Romin 7:14, 24, 25, NW.

Zezi ti donn so lavi pou ki nou kapav viv pou touletan

“Bondie finn avoy so Garson kouma Sover lemonn.”​—1 Zan 4:14.

Zeova finn pran enn dispozision pou liber nou ar konsekans pese ek lamor. Kouma? Li ti avoy so Garson ki Li bien kontan lor later pou ne kouma enn dimounn parfe parey kouma Adan. Me Zezi pa ti azir kouma Adan. “Li pa finn fer okenn pese.” (1 Pier 2:22) Parski li ti parfe, Zezi pa ti kondane amor ek li ti pou kapav viv pou touletan kouma enn imin parfe.

Selman, Zeova ti permet ki Zezi mor dan lame so bann lennmi. Trwa zour apre so lamor, Zeova ti resisit li kouma enn lespri pou ki, dan ler ki bizin, li retourn dan lesiel. Laba, Zezi ti prezant Bondie valer so sakrifis parfe pou reaste seki Adan ti’nn perdi pou limem ek pou so bann desandan. Zeova inn aksepte sa sakrifis-la, ek sa permet bann ki ena lafwa dan sakrifis Zezi gagn lavi eternel.​—Romin 3:23, 24; 1 Zan 2:2.

Alor Zezi ti reaste seki Adan ti’nn perdi. Li’nn mor pou ki nou kapav viv pou touletan. Labib dir: “Zezi . . . finn soufer lamor. Par lagras Bondie [faver ki personn pa merite], li finn gout lamor pou tou dimounn.”​—Ebre 2:9.

Sa dispozision-la fer nou trouv pli bien bann kalite Zeova. So prinsip lazistis pa permet bann dimounn inparfe liber zotmem ar pese ek lamor. Selman dan so lamour ek so mizerikord, Zeova inn dispoze pey enn pri for pou respekte so prop prinsip​—Li’nn donn so prop Garson kouma enn ranson.​—Romin 5:6-8.

Zezi ti resisite ek lezot osi pou resisite

“Lekris finn resisite depi bann mor, limem premie resisite. Parey kouma lamor finn arive par enn zom, parey rezireksion finn arive par enn zom. Tou bann dimoun mor parski zot lie par Adam [Adan, NW]; dan Lekris tou pou gagn lavi.”​—1 Korintien 15:20-22.

Nou kone ki Zezi ti viv ek ti mor, me ki prev nou ena ki li’nn resisite? Enn bann prev ki nou ena se ki apre so rezireksion, Zezi ti aparet ar plizir dimounn dan diferan lokazion ek diferan plas. Enn zour li ti aparet ar plis ki 500 dimounn. Lapot Pol ti koz lor la dan let ki li ti avoy bann Korintien. Li ti ekrir ki sertin sa bann temwin-la ti ankor vivan, pou fer konpran ki zot ti pou kapav temwagn lor seki zot inn trouve ek tande.​—1 Korintien 15:3-8.

Seki inportan, kan Pol ti ekrir ki Kris ti “premie” parmi bann ki’nn resisite, li ti pe montre ki apre pou ena ankor lezot ki pou resisite. Zezi limem ti dir ki ler pou vini kot “tou dimoun ki dan tom” pou “sorti.”​—Zan 5:28, 29.

Pou viv pou touletan, nou bizin ena lafwa an Zezi

“Bondie finn telman kontan lemonn, ki li finn donn so Sel Garson pouki tou dimoun ki krwar dan Li, pa mor me gagn lavi eternel.”​—Zan 3:16.

Premie liv Labib explike kouma lamor inn existe ek kouma bann dimounn inn perdi Paradi. Dernie liv Labib koz lor lepok kot Bondie pou detrir lamor ek pou refer later vinn enn paradi. Lerla bann dimounn pou kapav viv bien pou touletan. Revelasion 21:4 dir: “Pa pou ena . . . lamor.” Pou montre ki nou kapav fer konfians sa promes-la, verse 5 dir: “Sa bann parol la zot sir ek vre.” Zeova kapav akonpli tou seki Li promet.

Eski ou krwar ki “sa bann parol la zot sir ek vre”? Alor, nou ankouraz ou pou aprann plis lor Zezi, ek ena lafwa an li. Si ou fer sa, ou pou gagn faver Zeova. Ou pa pou zis gagn so bann gran benediksion depi asterla, me ou pou ena osi lespwar pou viv pou touletan lor later ki pou vinn enn paradi, kot “pa pou ena ni lamor, ni dey, ni lamantasion, ni douler.