LARTIK KOUVERTIR | ESKI OU TI POU KONTAN ETIDIE LABIB?

Enn Program Letid Labib Pou Zot Tou

Bann Temwin Zeova bien renome pou zot travay predikasion an piblik. Me eski ou ti kone ki nou osi kondir bann letid Labib dan lemond antie?

A man having a Bible study at his place of employment

An 2014, plis ki 8,000,000 Temwin dan 240 pei ti kondir apepre 9,500,000 letid Labib sak mwa.a Ofet, kantite dimounn ki etidie Labib avek nou depas popilasion anviron 140 pei!

Pou fer sa travay lansegnman la, sak lane bann Temwin Zeova pibliye preske 1.5 milyar Labib, liv, magazinn, ek lezot piblikasion ki baze lor Labib—dan anviron 700 lang! Gran zefor ki zot pe fer pou pibliye sa bann liv-la permet bann dimounn etidie Labib dan lang ki zot anvi.

“Zame mo ti kontan aprann dan lekol, me sa letid-la ti extra interesan. Ek bann kitsoz ki mo ti aprann ti bien ankourazan!”—Katlego, Afrique du Sud.

“Gras-a sa kour-la mo’nn gagn repons tou mo bann kestion ek lezot kestion ankor.”—Bertha, Mexique.

“Ti fer sa letid Labib la kot mwa dan enn ler ki ti pli bon pou mwa. Ki mo ti bizin plis ki sa!”—Eziquiel, Brésil.

“Parfwa letid ti dir 15 a 30 minit—lezot fwa ti pli long—dapre seki ti pli bon pou mwa.”—Viniana, Australie.

“Sa kour-la ti gratis—ti extraordiner sa!”—Aimé, Bénin.

“Sa dimounn ki ti fer mo letid la ti ena boukou pasians ek li ti bien zanti. Nou ti vinn bien pros.”—Karen, Irlande du Nord.

“Boukou dimounn etidie Labib san ki zot vinn bann Temwin apre.”—Denton, Angleterre.

KESTION EK REPONS KONSERNAN LETID LABIB KI NOU PROPOZE

Kouma sa letid Labib la deroule?

Nou pran plizir size lor Labib ek nou examinn bann verse Labib ki koz lor la. Par exanp, Labib reponn bann kestion kouma: Kisannla Bondie? Kouma Li ete? Eski Li ena enn nom? Kotsa Li reste? Eski nou kapav vinn pros ar Li? Li pa touletan fasil pou kone ki verse Labib reponn sa bann kestion-la.

Pou ed bann dimounn gagn bann repons, normalman nou servi liv Ki la Bible enseigné vrai-mem?b ki ena 224 paz. Inn fer sa liv-la sirtou pou ed bann dimounn konpran bann lansegnman debaz ki ena dan Labib. Par exanp li koz lor Bondie, Zezi Kris, soufrans, larezireksion, lapriyer, ek boukou lezot size ankor.

Kan ek kotsa kapav fer enn letid?

Kapav fer letid-la dan ler ek plas ki pli bon pou ou.

Komie letan enn letid deroule?

Boukou dimounn konsakre anviron enn-er-tan sak semenn pou etidie Labib. Kantite letan ki sa letid-la deroule li varye. Nou pou adapte li ar ou program. Sertin etidie zis pandan 10 ouswa 15 minit sak semenn.

Komie sa kour-la koute?

Kour-la ek bann piblikasion ki servi pou etidie Labib zot gratis. Sa li an akor avek linstriksion ki Zezi ti donn so bann disip: “Zot finn resevwar tou kado, donn tou kado.”—Matie 10:8.

Komie tan sa kour-la dire?

Ou kapav kontign etidie tanki ou anvi. Dan liv Ki la Bible enseigné vrai-mem? ena 19 sapit. Ou kapav swazir sapit ki ou anvi etidie ouswa ou kapav etidie tou bann sapit-la, dapre ou kapasite.

Eski mo bizin vinn enn Temwin Zeova?

Non. Nou respekte drwa ki sak dimounn ena pou swazir dan ki li pou krwar. Selman, bann dimounn ki’nn gagn enn konesans debaz lor Labib pou kapav pran enn desizion ki baze lor seki zot finn aprann.

Kotsa mo kapav gagn plis linformasion?

Lor sit jw.org ena bann linformasion exakt konsernan krwayans ek laktivite bann Temwin Zeova.

Kouma mo kapav demann enn letid Labib?

Ranpli form ki ena lor sit www.pr418.com/mfe.
Ekrir lor enn bann ladres ki ena lor paz de dan sa magazinn-la.
Kontakte bann Temwin Zeova dan ou pei. Ou kapav rod “Association of Jehovah’s Witnesses” dan lanier telefonn.

a Normalman nou kondir enn letid Labib swa avek enn dimounn swa avek enn ti group dimounn.

b Pibliye par bann Temwin Zeova. Inn inprim plis ki 230 milyon kopi sa liv-la dan plis ki 260 lang.

ENN LED POU BANN FAMI

“Kan mo madam ti koumans etidie Labib, mo ti remarke ki li ti fer bann gran sanzman. Nou lavi fami ti ameliore. Mo ti anvi kone ki li ti pe aprann, alor mo’si mo’nn koumans etidie. Seki mo ti aprann ti fer mwa vinn enn pli bon dimounn. Kan nou finn etidie Labib, sa finn fer nou fami vinn pli pros.”—Eziquiel.

“Apre ki mo’nn koumans etidie Labib, mo’nn aret pran ladrog, bwar plis ki bizin, ek mo’nn aprann kontrol mo koler. Mo lakaz pli prop ek pli an-ord. Mo plis apresie mo fami ek mo kontan fer bann kitsoz ki rann zot ere. Mo pli ere aster.”—Karen.

“Sertin dimounn ti pe kritik mwa parski mo ti pe etidie Labib. Me mo mari ti soutenir mwa ek li ti dir mwa: ‘Mo pa kas latet ar seki dimounn dir. Kan mo pe trouv twa fer bann bon sanzman, samem pli inportan pou mwa. Kontign fer seki to pe fer.’ Nou lavi fami boukou pli bon zordi!”—Viniana.