Enn Liv ki Nou Kapav Konpran

Labib se enn liv bien ansien. Inn gagn apepre 3,500 an finn koumans ekrir Labib. Sa ti pase dan lepok ki lanpir Shang ti pe dirize dan la Chine, ek apepre dis siek avan ki relizion Boudis ti pran nesans dan l’Inde.​—Get lankadre “De-Trwa Ransegnman lor Labib.”

Enn liv pou itil pou bann dimounn si zot konpran seki ena ladan ek si sa konsern zot. Ek Labib li koumsa. Li reponn bann kestion pli inportan ki ena dan lavi ek bann dimounn satisfe ar so bann repons.

Par exanp, eski ou’nn deza poz oumem sa kestion-la: ‘Kifer nou existe?’ Depi plizir siek bann dimounn pe rod repons sa kestion-la ek zot ankor pe rode. Pourtan de premie sapit dan liv Zenez, premie liv Labib, reponn sa kestion-la. Liv Zenez explike ki “o-koumansman,” setadir plizir milyar lane dan lepase, liniver inn koumans existe. Parmi finn ena bann galaxi, bann zetwal ek later. (Zenez 1:1) Apre, li dekrir tigit-tigit kouma later inn vinn enn plas kot kapav reste, kouma diferan form lavi inn koumans existe, parmi ena bann imin ek osi kifer inn fer tousala.

NOU KAPAV KONPRAN LI

Labib donn bann konsey pratik ki kapav ed nou regle nou bann problem. Ek so bann konsey fasil pou konpran. Anou get de rezon kifer.

Premierman, Labib inn ekrir dan enn fason kler, direk ek atiran. Labib pa servi bann expresion difisil, me bann mo ki nou kapav konpran ek ki kree bann zimaz dan nou lespri. Li servi bann mo ki nou abitie tande pou explik bann lide konplike.

Anou get bann lexanp ki Zezi ti servi. Pou tous leker bann dimounn, li ti servi boukou lexanp ki sinp ek ki baze lor bann laktivite toulezour. Laplipar sa bann lexanp-la trouv dan Sermon lor Montagn. Ek nou kapav lir sa sermon-la dan sapit 5 a 7 dan liv Matie dan Labib. Enn ekrivin apel sa Sermon-la “enn diskour pratik.” Dapre li, lobzektif sa diskour-la se “pa pou ranpli nou latet ar enn kantite lide, me pou gid nou dan nou bann aksion.” Sa pou pran ou anviron 15 a 20 minit pou lir sa bann sapit-la, ek ou pou etone pou trouve ki kantite bann parol Zezi zot sinp ek pwisan.

Deziemman, Labib se pa enn liv kot ena bann fos zistwar. Okontrer, enn ansiklopedi, The World Book Encyclopedia, dir ki enn gran parti Labib “koz lor bann dimounn bien renome ek bann dimounn sinp” ek lor zot “bann difikilte, zot lesperans, zot bann erer ek zot bann viktwar.” Bann dimounn ek bann levennman ki mansione dan Labib zot reel. Alor li pli fasil pou nou met nou dan plas sa bann dimounn-la ek konpran bann levennman ek bann leson ki nou kapav aprann ladan.​—Romin 15:4.

DISPONIB POU TOU DIMOUNN

Pou ki ou konpran enn liv, fode li’nn ekrir dan enn lang ki ou kone. Azordi, ninport kotsa ou reste ouswa ki ou nasionalite, sirman Labib disponib dan enn lang ki ou kapav konpran. Anou gete kouma finn fer sa travay extraordiner la.

Tradiksion. O-koumansman, Labib ti ekrir dan lang Ebre, Arameen, ek Grek. Akoz sa, zis enn tigit dimounn ti kapav lir li. Me pou ki Labib disponib dan lezot lang, bann tradikter inn fer boukou zefor pou tradir sa liv-la. Azordi, gras-a zot travay, Labib disponib an-antie ouswa an parti dan anviron 2,700 lang. Savedir ki plis ki 90 poursan bann dimounn lor later kapav lir omwin enn parti Labib dan zot lang.

Piblikasion. Text orizinal Labib ti ekrir lor bann materyo ki pouri avek letan kouma lapo ek papiris. Pou kontign transmet mesaz ki ena dan Labib, bann dimounn inn kopie ek rekopie Labib avek boukou presizion. Selman, sa bann kopi-la ti kout bien ser. Alor, pa boukou dimounn ti kapav aste zot. Me kan Gutenberg ti invant lapres, inn gagn plis ki 550 an, inn kapav inprim pli boukou Labib. Dapre enn estimasion, inn distribie plis ki sink milyar Labib, an-antie ouswa an parti.

Akoz sa bann rezon-la, pa kapav konpar okenn lot liv relizie ar Labib. Li kler ki nou kapav konpran Labib. Selman, li pa touletan fasil pou konpran seki ena ladan. Me ou kapav gagn led. Kotsa? Ek kouma sa kapav ed ou? Ou pou gagn repons sa bann kestion-la dan prosin lartik.