Led pou Konpran Labib

Fer koumadir ou’nn al vizit enn lot pei pou premie fwa. Tou kitsoz nouvo pou ou: bann dimounn, kiltir, manze ek larzan ki servi dan sa pei-la. Kitfwa ou santi ou inpe gos ek sa li normal.

Kitfwa ou pou ena mem santiman kan ou lir Labib premie fwa. Amezir ou pe lir, ou retourn dan lepase, dan enn lemond ki ou pa konn ditou. Laba, ou zwenn enn pep ki apel bann Filistin, ou trouv bann koutim bizar kouma “desir linz,” ou aprann ki ena enn manze ki apel lamann ek ena enn lamone ki apel drachme. (Exod 16:31; Zozie 13:2; 2 Samiel 3:31; Lik 15:9) Tousala kapav enn konfizion pou ou. Parey kan ou al vizit enn lot pei, eski ou pa pou kontan ki enn kikenn ed ou pou konpran bann kitsoz?

LED DAN LEPASE

Depi ki’nn koumans ekrir bann lekritir sakre dan 16^e siek Avan Nou Lepok, bann dimounn inn gagn led pou konpran seki ena ladan. Par exanp, Moiz, premie gid nasion Izrael “ti koumans explik” seki ena dan bann Lekritir sakre.​—Deteronom 1:5.

Anviron dis siek apre, ti ankor ena bann ansegnan kalifie pou ed bann dimounn konpran bann Lekritir. An 455 Avan Nou Lepok, boukou Zwif, parmi ti ena bann zanfan, ti rasanble lor enn plas piblik dan Zerizalem pou ekout bann ansegnan lir for sa bann mem Lekritir sakre la. Me sa bann ansegnan-la ti fer plis ki sa. “Zot ti ed lepep pou konpran seki zot ti pe lir.”​—Neemia 8:1-8.

Sink-san-z-an plitar, Zezi Kris osi ti fer parey. Bann dimounn ti pli konn li kouma enn ansegnan. (Zan 13:13) Li ti ansegn bann gran lafoul, me osi bann dimounn an partikilie. Enn fwa, kan li ti fer diskour Sermon lor Montagn devan enn gran lafoul, Labib dir ki “lafoul ti etone par so lansegnman.” (Matie 5:1, 2; 7:28) Dan printan 33 Nou Lepok, pandan ki Zezi ek de so bann disip ti pe marse pou al dan enn vilaz pre ar Zerizalem, Zezi “ti explik [zot] Lekritir.”​—Lik 24:13-15, 27, 32.

Bann disip Zezi osi ti ansegn Parol Bondie. Par exanp, enn zour kan enn fonksioner Etiopien ti pe lir enn pasaz dan bann Lekritir, Filip, enn disip, ti al ver li ek ti demann li: “Eski to konpran saki to pe lir?” Etiopien-la ti reponn: “Kouma mo pou konpran, si personn pa explik mwa?” Lerla Filip ti explik li sa pasaz-la.​—Zistwar Bann Apot 8:27-35.

LED ZORDI

Parey kouma sa bann ansegnan dan lepase-la, zordi osi bann Temwin Zeova partisip dan enn program lansegnman lor Labib dan 239 pei. (Matie 28:19, 20) Semenn apre semenn, zot ed plis ki nef milyon dimounn pou konpran Labib. Boukou sa bann dimounn-la pa Kretien. Sa bann leson Labib la zot gratis ek dimounn-la kapav etidie kot limem ouswa dan enn lot landrwa ki apropriye. Sertin kontan pou etidie par telefonn ouswa par Internet.

Pou kone kouma ou kapav gagn enn leson gratis lor Labib, nou ankouraz ou pou kontakte enn Temwin Zeova. Ou pou trouve ki ou kapav konpran Labib ek ki li enn liv “ki servi pou ansegne, repran, korize, fer grandi dan lazistis,” pou ki ou ‘kalifie ek ekipe pou fer bon travay.’​—2 Timote 3:16, 17.