Pli Bon Konparezon ki Ou Kapav Fer

ESKI ou dir ki ou enn Kretien? Si wi, ou form parti dan plis ki de milyar dimounn lor later ki dir zot bann disip Kris. Sa reprezant apepre 1 abitan lor 3. Azordi, ena plizir milye relizion ki dir zot Kretien, me zot ena diferan doktrinn ek diferan lopinion. Alor ou bann krwayans kapav bien diferan ar lezot ki dir zot Kretien. Eski seki ou krwar li vremem inportan? Wi, si ou anvi swiv seki Labib ansegne.

Ti apel bann premie disip Kris, bann “Kretien.” (Zistwar Bann Apot 11:26) Pa ti bizin lezot nom pou idantifie zot parski ti ena enn sel relizion Kretien dan sa lepok-la. Antan ki group, zot ti swiv bann lansegnman ek bann instriksion Zezi Kris, Fondater Vre Relizion Kretien. Me ki ou kapav dir lor ou legliz? Eski ou panse ki li ansegn seki Kris ti ansegne ek seki so bann premie disip ti krwar? Kouma ou kapav konn sa? Ena enn sel fason. Se kan ou konpar seki ou legliz ansegne avek bann lansegnman Labib.

Reflesi lor la: Zezi Kris ti ena enn gran respe pou bann Lekritir ki li ti konsider kouma Parol Bondie. Li pa ti aksepte kan bann dimounn ti diminie valer lansegnman Labib pou donn plis valer tradision bann zom. (Mark 7:9-13) Nou kapav dir san okenn dout ki bann vre disip Zezi ti baz zot krwayans lor Labib. Alor, sak Kretien bizin demann limem: “Eski bann lansegnman mo legliz zot an-akor avek bann lansegnman Labib?” Pou reponn sa kestion-la, kifer ou pa konpar seki ou legliz ansegne avek seki Labib ansegne vremem?

Zezi ti dir ki nou ladorasion pou Bondie bizin baze lor laverite, ek sa laverite-la trouv dan Labib. (Zan 4:24; 17:17) Ek lapot Pol ti dir ki pou nou gagn lavi sov, nou bizin ena “enn konesans exakt lor laverite.” (1 Timote 2:4, NW.) Alor li bien inportan ki nou bann krwayans baze lor bann verite ki sorti dan Labib ek ki exakt. Kifer? Parski nou delivrans depann lor la!

KOUMA KONPAR NOU BANN KRWAYANS AVEK LABIB

Nou invit ou pou lir sa sis kestion ki ena anba la ek get bann repons ki Labib done. Verifie bann verse Labib ki’nn site ek reflesi lor bann repons-la. Apre, demann oumem: ‘Ki diferans ena ant bann lansegnman mo legliz ek seki Labib ansegne?’

Sa ti kwiz-la pou ed ou fer pli bon konparezon ki ou kapav fer. Eski ou anvi konpar lezot lansegnman ou legliz avek seki Labib ansegne? Bann Temwin Zeova pou kontan ed ou examinn bann verite bien kler ki ena dan Labib. Ou kapav demann enn Temwin enn letid Labib ki gratis ouswa vizit nou sit jw.org/mfe.

1 KESTION: Kisannla Bondie?

REPONS: Zeova, Papa Zezi, Limem Bondie Tou-Pwisan ki’nn kree tou kitsoz ek Li eternel.

SEKI LABIB DIR:

“Dan lapriyer ki nou fer pou zot, nou remersie toultan Bondie, Papa nou Segner Zezi Kris.”—Kolosien 1:3.

“Segner Bondie [“Zeova,” NW], to merit resevwar laglwar, ek loner ek pwisans parski tomem ki finn kre tou kitsoz.”—Revelasion 4:11.

Get osi Yoel 2:32; 1 Timote 1:17.

2 KESTION: Kisannla Zezi Kris?

REPONS: Zezi li premie Garson Bondie. Bondie ti kree Zezi, alor li ena enn koumansman. Zezi soumet li ar Bondie ek li fer So volonte.

SEKI LABIB DIR:

“Mo Papa pli gran ki mwa.”—Zan 14:28.

“[Zezi] reflet Bondie ki invizib, limem premie-ne dan tou kreasion.”—Kolosien 1:15, NW.

Get osi Matie 26:39; 1 Korintien 15:28.

3 KESTION: Ki ete lespri sin?

REPONS: Lespri sin se lafors ki Bondie servi pou realiz so volonte. Lespri sin pa enn dimounn. Bann dimounn kapav gagn lespri sin ek li fortifie zot.

SEKI LABIB DIR:

“Kan Elizabet tann lavwa Marie, tibaba la bouze dan so vant. Elizabet ti ranpli avek Lespri Sin.”—Lik 1:41.

“Zot pou gagn enn lafors kan Lespri Sin pou desann lor zot.”—Zistwar Bann Apot 1:8.

Get osi Zenez 1:2; Zistwar Bann Apot 2:1-4; 10:38.

4 KESTION: Ki ete Rwayom Bondie?

REPONS: Rwayom Bondie se enn gouvernman ki trouv dan lesiel. Zezi limem Lerwa dan Rwayom Bondie. Biento volonte Bondie pou fer partou lor later gras-a sa Rwayom-la.

SEKI LABIB DIR:

“Lerla setiem anz soufle so tronpet, e ti ena bann lavwa bien for dan lesiel ki ti dir, ‘Asterla rwayom lemonn finn rant anba pouvwar [“Rwayom,” NW] Bondie nou Segner ek so Mesi. Li pou regne pou touzour.’”—Revelasion 11:15.

Get osi Daniel 2:44; Matie 6:9, 10.

5 KESTION: Eski tou bann bon dimounn al dan lesiel?

REPONS: Non. Bondie inn swazir enn ti group dimounn fidel, ki apel “ti troupo,” pou al dan lesiel. Ansam avek Zezi, zot pou dirize kouma lerwa lor limanite.

SEKI LABIB DIR:

“Pa gagn per, ti troupo, parski Bondie kontan pou donn zot so Rwayom.”—Lik 12:32.

“Zot pou vinn pret pou Bondie ek Kris, e zot pou regn avek li.”—Revelasion 20:6.

Get osi Revelasion 14:1, 3.

6 KESTION: Ki volonte Bondie pou later ek pou bann dimounn?

REPONS: Kan Rwayom Bondie pou dirize, later pou vinn enn paradi ek bann dimounn fidel pou profit enn lasante parfe, lape ek lavi pou leternite.

SEKI LABIB DIR:

“Bon dimounn pou erit later e zot pou viv enn lavi prosper ek pezib.”—Psom 37:10, 11.

“Li pou souy tou zot larm. Pa pou ena ni lamor, ni dey, ni lamantasion, ni douler. Tousa . . . finn disparet.”—Revelasion 21:3, 4.

Get osi Psom 37:29; 2 Pier 3:13.