Bann Zizman Bondie—Eski Bondie Touletan Donn Ase Lavertisman?

ENN meteorolog pe obzerv enn zimaz radar ki an mouvman. Li trouv enn siklonn bien danzere ki pe vinn bien vit lor enn landrwa kot ena boukou dimounn. Li gagn traka pou sekirite sa bann dimounn-la, alor li fer tou seki li kapav pou averti zot avan ki li tro tar.

Dan mem fason, azordi Zeova pe averti tou bann dimounn lor later ki ena enn “siklonn” ki pe vini. Ek sa siklonn-la li pli danzere ki tou kitsoz ki zot kapav tande dan bann biltin meteo. Kouma Bondie pe averti bann dimounn? Ek kifer nou kapav sir ki Li pe donn bann dimounn ase letan pou prepar zot? Pou gagn repons sa bann kestion-la, anou get sertin lavertisman ki Zeova ti done dan lepase.

BONDIE TI DONN BANN LAVERTISMAN ALAVANS

Nou kapav konpar zizman Bondie ar enn “siklonn.” Dan lepok Biblik, Zeova ti avoy bann “siklonn” lor bann dimounn ki ti dezobeir so bann komannman volonterman. Me sak fwa, Li ti averti zot avan. (Prov. 10:25; Zer. 30:23) Dan sak sitiasion, Zeova ti averti sa bann dimounn-la bien alavans, ek Li ti dir zot ki bann sanzman zot ti bizin fer pou viv an-akor avek so volonte. (2 Ler. 17:12-15; Ne. 9:29, 30) Anplis, pou ed bann dimounn fer bann sanzman ki bizin, souvan Zeova ti servi so bann fidel serviter lor later pou anons so bann zizman ek pou ed zot konpran ki zot bizin azir deswit.​—Amos 3:7.

Noe ti enn parmi bann dimounn ki Bondie ti servi pou anons so zizman. Bann dimounn dan so lepok ti bien imoral ek violan. Me avek kouraz ek pandan boukou lane, Noe ti averti zot konsernan Deliz ki ti pou ena lor later antie. (Zen. 6:9-13, 17) Li ti osi dir zot seki zot ti bizin fer pou gagn lavi sov. Se akoz sa ki plitar ti apel Noe “enn predikater lazistis.”​—2 Pier 2:5.

Malgre tou bann zefor ki Noe ti fer, bann dimounn ki ti viv dan so lepok pa ti pran kont lavertisman Bondie. Zot ti montre ki zot pa ti ena lafwa. Ki konsekans sa finn ena? Zot ti mor kan Deliz ti “vini” ek ti “balye zot tou.” (Mat. 24:39; Ebre 11:7, NW) Kan zot ti pre pou mor, zot pa ti kapav dir ki Bondie pa ti averti zot.

Dan lezot sitiasion, Zeova ti averti bann dimounn enn tigit letan avan ki so zizman koumanse. Mem sa, Li ti fer sir ki bann dimounn ki ti konserne par sa sitiasion-la gagn ase letan pou prepar zot. Par exanp, kan Zeova ti amenn Dis Ple lor ansien Lezip, sak fwa Li ti donn bann lavertisman alavans. Enn lexanp se kan Zeova ti avoy Moiz ek Aaron pou averti Faraon ek so bann serviter konsernan setiem ple, setadir enn lagrel ki ti pou fer bann gran dega. Bondie ti pou avoy lagrel landemin sa lavertisman-la. Alor, eski Bondie ti donn zot ase letan pou rod enn plas pou kasiet ek pou protez zot? Labib dir: “Bann serviter Faraon ki ti ena lakrint pou parol Zeova bien vit ti kasiet zot bann serviter ek zot bann zanimo pou protez zot, me bann ki pa ti pran kont parol Zeova ti les zot bann serviter ek zot bann zanimo dan karo.” (Ex. 9:18-21) Li kler ki Zeova ti donn zot ase lavertisman, se akoz sa ki bann ki ti pran kont sa lavertisman-la zot pa ti soufer otan ki lezot.

Faraon ek so bann serviter osi ti gagn enn lavertisman avan diziem ple. Selman, zot ti azir dan enn fason bien bet parski zot pa ti pran kont sa lavertisman-la. (Ex. 4:22, 23) Ki konsekans sa finn ena? Zot ti trouv zot bann garson premie-ne mor. Sa ti vremem bien tris! (Ex. 11:4-10; 12:29) Eski zot ti gagn ase letan pran kont sa lavertisman-la? Wi! Moiz pa ti tarde pou averti bann Izraelit konsernan diziem ple ki ti pou vini ek li ti donn zot bann instriksion lor kouma pou sov zot fami. (Ex. 12:21-28) Komie dimounn ti ekout sa lavertisman-la? Dapre sertin estimasion, anviron trwa milyon dimounn, parmi ti ena bann Izraelit ek osi “enn gran pep tou sort kalite dimounn,” setadir bann ki pa ti Izraelit ek bann Ezipsien, ti reisi sape pandan zizman Bondie ek ti kit Lezip.​—Ex. 12:38.

Parey kouma sa bann lexanp-la montre, Zeova touletan fer sir ki bann dimounn gagn ase letan pou pran kont so bann lavertisman. (Det. 32:4) Ki kitsoz ti pous Bondie pou fer sa? Lapot Pier ti explike ki Zeova “pa anvi ki personn mor, me Li anvi ki tou dimounn repanti.” (2 Pier 3:9, NW) Wi, Bondie ti gagn traka sa bann dimounn-la. Li ti anvi ki zot repanti ek fer bann sanzman ki bizin avan ki Li amenn so zizman.​—Iza. 48:17, 18; Rom. 2:4.

PRAN KONT BANN LAVERTISMAN BONDIE AZORDI

Azordi osi, ena enn lavertisman bien inportan ki pe anonse partou lor later ek tou dimounn bizin pran kont sa lavertisman-la. Kan Zezi ti lor later, li ti anonse ki sa lemond-la ti pou detrir pandan enn “gran detres.” (Mat. 24:21, NW) Konsernan sa zizman ki ti pou arive la, Zezi ti donn enn profesi. Dan sa profesi-la, li ti dekrir an detay bann kitsoz ki so bann disip ti pou fer fas ek bann kitsoz ki zot ti pou trouve amezir ki gran detres koste. Li ti koz lor bann gran levennman ki pe arive partou lor later azordi.​—Mat. 24:3-12; Lik 21:10-13.

An-akor avek sa profesi-la, Zeova pe ankouraz tou dimounn pou servi Li ek obeir Li. Li anvi ki bann dimounn ki obeir Li profit enn pli bon lavi depi asterla mem ek osi bann benediksion ki pou ena dan lemond nouvo dan lavenir. (2 Pier 3:13) Pou ankouraz bann dimounn pou ena lafwa dan so bann promes, Zeova pe fer zot konn enn mesaz ki sov lavi, setadir “Bonn Nouvel Rwayom Bondie.” Zezi ti predir ki sa mesaz-la ti “pou anonse partou dan lemonn, kouma enn temwagnaz pou tou bann nasion.” (Mat. 24:14) Bondie inn organiz so bann vre serviter pou rann “temwagnaz,” ouswa anons sa mesaz-la dan anviron 240 pei. Zeova anvi ki enn maximum dimounn pran kont so lavertisman ek zot pa detrir pandan sa “siklonn” ki pe vini la, setadir pandan so zizman ki zis.​—Sof. 1:14, 15; 2:2, 3.

Alor, eski Zeova donn bann dimounn ase letan pou pran kont so bann lavertisman? Wi. Kouma nou finn trouve, Zeova touletan donn bann dimounn ase letan. Parkont kestion ki pli inportan se: Eski bann dimounn pou pran kont lavertisman Bondie pandan ki ankor ena letan? Antan ki bann mesaze Bondie, anou kontign ed pli boukou dimounn pou ki zot pa detrir kan pou ena lafin sa lemond-la.