“Ki Zot Lalimyer Briye”
1 Lemond ki otur nu li dan marenwar lor plan moral ek spirityel. Lalimyer laverite pe fer nu dekuver “bann travay” dan marenwar “ki pa donn okenn rezilta.” Kumsa, nu kapav evit sa bann kitsoz ki kapav fer nu tonbe la. Akoz sa mem, lapot Pol finn ankuraz bann Kretyin: “Kontiyn mars kuma bann zanfan lalimyer.”—Efezyin 5:8, 11.
2 Ena enn bel diferans ant “frwi lalimyer” ek marenwar ki ena dan lemond. (Efezyin 5:9) Pu nu kapav raport sa bann frwi la, nu bizin donn bon legzanp dan nu lavi Kretyin, setadir vinn bann dimunn ki Zezi aksepte. Nu bizin usi montre bann kalite, par egzanp, ena enn leker antye, sinser, ek ena enn gran dezir pu laverite. Nu bizin raport sa bann frwi la dan nu lavi tulezur ek dan nu minister.
3 Briye dan tu lokazyon: Zezi ti dir so bann disip: “Ki zot lalimyer briye devan bann zom.” (Matye 5:16) Parey kuma Zezi, nu reflekte lalimyer Zeova kan nu pres Rwayom Bondye ek kan nu fer konn so bann lintansyon. Nu briye kuma lalimyer kan nu vizit bann dimunn kot zot ek kan nu fer konn laverite dan travay, dan lekol, ar nu bann vwazin, uswa sak fwa ki nu ena lokazyon pu fer li.—Filipyin 2:15.
4 Zezi ti dir ki sertin ti pu ayir lalimyer. (Zan 3:20) Alor, nu pa dekuraze mem si mazorite dimunn refiz ki “lalimyer bon nuvel extraodiner konsernan Kris” ekler zot. (2 Korintyin 4:4) Zeova lir dan leker bann dimunn ek Li pa anvi ki parmi so pep ena bann dimunn ki pena enn kondwit drwat.
5 Kan nu swiv bann simin Zeova ek kan nu zwir lalimyer spirityel, nu kapav reflekte sa lor lezot. Si zot rekonet atraver nu kondwit ki nu “ena lalimyer lavi,” alor zot usi, zot pu kapav santi zot puse pu fer bann sanzman pu ki zot fer zot lalimyer briye.—Zan 8:12.
6 Kan nu les nu lalimyer briye, nu donn nu Kreater laglwar, ek nu ed bann ki sinser pu konn Li, ek kumsa zot gayn lespwar lavi pu tuletan. (1 Pyer 2:12) Pwiski nu ena lalimyer, anu servi li pu montre lezot simin, pu zot sorti dan marenwar spirityel ek fer bann travay lalimyer.