Bann Lasanble—Enn Moman pu Rezwir!
1 Bann lasanble bann Temwin Zeova zot bann lokazyon pu rezwir buku! Pandan plis ki san banane, sa bann rasanbleman la finn amenn lakrwasman ki nu truve dan nu lorganizasyon. Kumansman, nu ti enn ti grup, me nu finn truve kuma Zeova finn byin beni nu travay dan lemond antye. Dan nu lepok modern, nu premye rasanbleman ti fer an 1893 dan Chicago, Illinois. Parmi 360 dimunn ki ti prezan, 70 finn pran batem pu montre zot langazman ar Zeova. Lane dernyer dan bann diferan Lasanble Distrik “Bann Ki Met Parol Bondye an Pratik” ki ti ena dan lemond antye, finn ena antu 9,454,055 asistan ek 129,367 ki ti pran batem. Nu ena vremem rezon pu nu rezwir!
2 Pandan tu lepok bann Izraelit, Zeova finn anseyn so pep sirtu atraver bann rasanbleman. Dan lepok Ezra ek Neemya, lepep ti ekut bann pret lir Lalwa “depi gramatin ziska midi.” (Neemya 8:2, 3) Lepep ti dan “enn gran lazwa” parski dan sa lokazyon la zot ti plis konpran Lalwa. (Neemya. 8:8, 12) Nu’si nu rezwir parski bann lasanble zot enn bon lokazyon kot Zeova donn nu enn bon linstriksyon ek enn nuritir spirityel “dan ler ki bizin,” atraver so “esklav saz ek fidel.” (Matye 24:45) Pwiski Zezi finn dir ki sak dimunn bizin viv ar “tu parol ki sorti dan labus Zeova,” bann lasanble zot inportan pu nu lasante spirityel.—Matye 4:4.
3 Li Vo Lapenn Nu Fer Tu Zefor pu Asiste: Nu tu nu bizin fixe lobzektif pu prezan pu Lasanble Distrik sa lane la, ki ena tem “Bann Anseynan Parol Bondye.” Nu bizin pran bann dispozisyon pu nu ariv boner tulezur ek reste ziska dir “Amenn!” dan lapriyer final. Byinsir, pu nu arive fer sa, nu pu bizin aranz byin nu program. Kitfwa li kapav difisil pu gayn konze dan nu travay. Me nu bizin ferm, olye nu dir nu gete ki arive. Si nu bizin lozman, uswa enn mwayin transpor, nu bizin fer bann laranzman depi boner. Wi, ninport ki zefor nu pu bizin fer, li pu vo lapenn!
4 Kan bann serviter Zeova asiste enn lasanble, zot pa kont bann benediksyon Zeova an term larzan. Get bann legzanp bann ki ti deside pu asiste Lasanble Internasyonal “Volonte Bondye” dan New York City an 1958. Enn frer finn ferm so biznes konstriksyon pandan de semenn pu li kapav vinn donn kudmin ek pu asiste lasanble. Enn frer dan bann Iles Vierges finn vann sink arpan later pu ki sis dimunn, li ek tu so fami kapav asiste lasanble. Enn zenn kup finn vann zot bato moter pu ki zot kapav amenn zot trwa zanfan, ki ena ant de mwa ek setan, lasanble. Dan Kaliforni (Californie), trwa prop frer finn gayn menas ki si zot absan zot travay, zot pu perdi li letan zot returne. Purtan, sa pa finn anpes zot asiste sa lasanble memorab la.
5 Zeova Rekonpans Nu Gro Zefor: Zeova truv bann zefor so pep ek Li beni zot pu sa. (Ebre 6:10) Par egzanp: an 1950, dan Lasanble “Lakrwasman Teokratik”, bann asistan finn ekut enn diskur markan ki ti ena tem, “Ban Nuvo Sistem ki pu Egziste.” Frer Frederick Franz ti motiv lintere tu dimunn kan li finn demann zot: “Eski bann asistan ki prezan isi dan sa lasanble internasyonal la, ti pu kontan kone ki zordi parmi nu ena plizir ki ena privilez pu vinn bann fitir prins dan nuvo later?” Zordi, plis ki sinkant an pli tar, nu tuzur pe rezwir ki nu finn gayn sa lexplikasyon kler lor Psom 45:16 la.
6 Enn sef fami ki finn asiste lasanble distrik lane dernyer, finn ekrir: “Frer, zame zot pa pu kapav mazine komye sa lasanble la finn sap nu lavi. Mo fami finn demenaze pu al viv dan lavil akoz problem travay, me nu spirityalite finn sufer. . . . Nu finn negliz nu bann devwar Kretyin. Nu finn mem aret al reynion ek al prese. . . . Sa lasanble la finn redonn nu lafors, ek nu finn rekumans fixe nu bann lobzektif spirityel ek organiz nu pu ki nu kapav realiz sa bann lobzektif la.”
7 Zeova pe furni nu manze spirityel ki nu bizin. Li pe dres enn latab byin garni dan nu bann lasanble. Si nu apresye sa dispozisyon la, nu pu dir mem parol ki Korney ti dir kan lapot Pyer ti vizit li: “Dan sa moman la, nu tu prezan devan Bondye pu tann tu bann kitsoz ki Zeova finn donn twa lord pu dir.” (Akt 10:33) Anu fixe lobzektif pu rezwir nu par ‘nu prezans devan Bondye’ pandan tu bann sesyon Lasanble Distrik sa lane la, “Bann Anseynan Parol Bondye.”