Zenn, Prepar Zot pu Servis Betel

¹ Enn levennman extraordiner pe arive dan lane 778 A.N.L. Dan enn vizyon, profet Izai truv “Zeova pe asize lor enn tronn ot.” Lerla, Izai tann bann serafin atir latansyon lor laglwar Zeova. Zot pe dir: “Zeova bann larme, Li sin, sin, sin.” Sa ti devet vremem inpresyonan! Lerla, Zeova demande: “Kisannla mo pu avoye, ek kisannla pu al pu nu?” Pena okenn lexplikasyon lor kalite travay uswa lor seki sa dimunn volonter la pu gayne anretur. Kan mem sa, san ezite Izai reponn: “Ala mo la! Avoy mwa.”—Izai 6:1, 3, 8.

² Lepep Zeova ena sa mem lespri volonter la pu fer ninport ki kitsoz ki Li demann zot. (Psom 110:3) Eski u’si, u dispoze pu reponn avek enn lespri volonter, parey kuma Izai?

³ Pu sa, nu bizin ena enn gran dezir pu met bann lintere Rwayom premye dan nu lavi. Nu bizin ena dezir pu fer tu seki demann nu fer pu sutenir travay predikasyon ki pe fer lor later antye. (Matye 6:33) Enn kikenn ki servi kuma enn manb fami Betel ena enn privilez spesyal pu servi Zeova ar tu so leker. Dan ki fason?

⁴ Travay dan Betel: Travay dan Betel li enn gran travay, me an mem tan li donn satisfaksyon lor plan spirityel. Nu gayn buku lazwa kan nu kone ki nu pe donn tu nu lafors ek lenerzi pu sutenir travay predikasyon ek lanseynman. Servis Betel ed nu pu konn lorganizasyon Zeova plis an detay. Sa fer nu rapel ki enn ekrivin Psom ti ankuraz bann Izraelit pu konn byin Syon, sa plas kot Zeova ti pe dirize lor later.—Psom 48:12, 13.

⁵ Bann Benediksyon Servis Betel: Kuma eski bann ki servi dan Betel konsider zot privilez servis? Gete ki komanter bann zenn manb ek bann manb aze fami Betel finn fer. Enn ser ki manb fami Betel pandan trwazan dir: “Travay dan Betel finn fer mo bann relasyon avek Zeova vinn pli solid. Plis mo servi dan Betel plis mo aprann kuma Betel fonksyone; mo konesans lor personalite Zeova ogmante. Servis Betel finn fer mwa truve klerman ki Zeova servi bann dimunn—tu sort kalite dimunn. U pa bizin parfe pu Li aksepte u.

⁶ Enn zenn frer rakonte: “Mo rapel mo ti pe dir ar mo mem, ‘Kuma li ti pu bon pu rant dan lemond nuvo ek rakont bann zom fidel ki pu resisite ki olye galup deryer rises lemond, mo finn pas buku lane dan Betel. ”

⁷ Enn zenn frer reflesi lor formasyon ki li finn gayne: “Aprann konn mo mem ek bann domenn ki mo bizin amelyore, ek apre devlop sa bann kalite la, tusala ti enn gran benediksyon pu mwa. Asterla, mo santi ki mo pli kapav servi Zeova. Mo truve ki mo ena inpe plis pasyans, mo metriz mwa inpe plis, ek mo kapav montre plis lamur.

⁸ Enn ser mazinn bann benediksyon ki li pe kontiyn gayne ziska asterla: “Bann program spirityel dan Betel finn anseyn mwa plis lor Zeova ek lor fason ki mo kapav imit Li plis dan mo bann panse, mo bann aksyon ek mo santiman. Ek parski formasyon la li kontiyne, mo kontinye gayn bann benediksyon.

⁹ Enn frer ki finn pas 43 lane dan Betel, ek 59 banane antu dan servis aplintan rakonte: “Betel pa kuma enn monaster, kuma buku kapav panse. Nu fer buku kitsoz parski nu finn program nu lavi. . . . Pena enn zur kot mo pa finn kontan mo lazurne travay. Kifer? Parski letan nu donn nu mem net pu Zeova, nu gayn satisfaksyon ki ‘seki nu finn fer sa mem nu ti bizin fer.’”—Lik 17:10

¹⁰ Enn lot frer ki finn servi dan Betel pandan 62 banane, finn dir: “Mo krwar avek buku konviksyon ki avan paradi etabli lor later, Betel li meyer plas ki ena lor later zordi. Mo pena ditu regre ki mo finn fer karyer dan servis aplintan. Li finn vremem enn gran lazwa pu mwa pu temwin ek pu partisip dan gran progre ki lorganizasyon Zeova finn fer lor later! Avek led Zeova, mo determine pu kontiyn konsider Betel kuma mo lakaz ek pu kontiyn travay avek tu mo leker an faver bann lintere Rwayom.

¹¹ Sa bann manb fami Betel la finn mansyonn zis detrwa parmi enn kantite benediksyon ki u kapav gayne si u dispoze pu servi dan Betel. Me parey pu ninport ki privilez servis, u bizin dabor ranpli bann kondisyon pu kalifye u pu sa servis la. Ki bann kondisyon u bizin ranpli pu vinn enn manb fami Betel?

¹² Bann Kondisyon pu Servi dan Betel: Dan lankadre ki akonpayn sa lartik la, ena bann kondisyon neseser pu bann ki swete fer aplikasyon pu servis Betel. Avan tu, li inportan ki zot dispoze pu travay dir, ek ki zot pa bann ki “kontan plezir.” (2 Timote 3:4, 1 Korintyin 13:11) Bann manb fami Betel bizin bann zom ek bann fam spirityel ki finn devlop bann bon labitid letid ek ki finn form zot kapasite pu disern “diferans ant seki bon ek seki move.” (Ebre 5:14) Zot finn bizin montre zot matirite Kretyin dan tu domenn zot lavi, par egzanp dan domenn labiyman, laparans, lamizik ek divertisman. Bann manb fami Betel ki ena enn leker byin dispoze aksepte pu servi dan ninport ki servis kot bizin zot. Normalman, bann zenn gayn bann travay ki demann zefor fizik, kuma par egzanp preparasyon ek livrezon bann piblikasyon, lantretyin, okip bann lasam, netwayaz, lav linz, ek fer lakwizinn. (Proverb 20:29) Me, diferans ki ena avek bann travay dan lemond, seki sak travay ki fer dan Betel donn satisfaksyon parski li enn servis sakre ki donn Zeova laglwar.—Kolosyin 3:23.

¹³ Bann ki invite pu travay res enn minimem enn an dan Betel. Sa permet zot gayn formasyon pu vinn bann bon travayer. Kitfwa enn zur zot kapav fer Betel vinn zot lakaz. Lamur pu Zeova ki pus bann manb fami Betel pu met travay Rwayom avan zot lintere personel, ek sa fer Zeova plezir.—Matye 16:24.

¹⁴ Zenn—Prepar Zot Depi Asterla Mem pu Servis Betel: Preparasyon pu servis Betel kumans byin avan ki enn zenn gayn 19 an, laz minimem pu rant Betel. Ki bann zenn kapav fer pu prepar zot pu servis Betel? Zezi finn dir:“Kisannla parmi zot, si li anvi ranz enn latur, pa pu asize avan pu kalkil so depans?” (Lik 14:28) Pwiski preparasyon ek lorganizasyon zot byin inportan pu reysi enn proze konstriksyon, alor pareyman li byin inportan ki bann zenn get byin manyer zot pe konstrir zot lavenir dan servis Zeova! Depi boner mem zot bizin poz enn baz solid dan zot lavi pu zot kapav realiz zot bann lobzektif spirityel. Antan ki zenn, kuma eski u pe poz u fondasyon? Si u anvi servi dan Betel, u pu tir profi si u aplik sa bann sigzesyon la.

¹⁵ “Aksepte” Sa Privilez Servis Spesyal La: Kuma finn ekrir dan Matye 19:12, Zezi finn ankuraz so bann disip pu “aksepte” res selibater. Kifer? Pa pu bann rezon personel, me pu bann lintere ‘rwayom.’ Pol usi finn donn sa mem lankurazman la pu ki bann selibater fer enn “servis zele pu Senyer san okenn distraksyon.” (1 Korintyin 7:32-35) Malerezman, buku betelit fer proze maryaz boner, ek zot pa profit zot bann lane selibater pu servi plis dan Betel. Nu anvi ankuraz nu bann zenn frer pu servi zot lenerzi pu pran servis aplintan tank ki zot pena okenn responsabilite familyal. Lerla, si apre enn peryod letan zot anvi marye, zot pu vinn bann pli bon mari parski zot finn gayn plis lexperyans dan lavi ek dan minister Kretyin. Apre plizir lane servis dan Betel, sertin finn marye ek tulede, mari ek fam, finn kontiyn servi dan Betel. Si plitar zot gayn bann lezot privilez, kuma par egzanp vizit bann kongregasyon uswa servis misyoner, zot pa pu regret letan ki zot finn aksepte pu pas dan servis Betel.

¹⁶ Pa Les U Distrer par Bann Kitsoz Materyel: Li ti pu bon si sak zenn ti kapav demann li mem: ‘Ki mo lobzektif apre ki mo finn fini gayn mo sertifika lekol, fer enn karyer dan lemond travay, uswa servi Zeova aplintan?’ Byinsir, si nu swazir pu servi Zeova aplintan, nu pu bizin fer bann sakrifis. Me li parey pu travay dan lemond usi! Alafin, ki simin pu vremem fer u gayn bann benediksyon dirab? Zezi finn reponn sa kestyon la klerman. Dan Matye 6:19-21, nu lir seki li finn dir: “Aret ramas pu zot mem bann trezor lor later, la kot lapusyer ek laruy kapav fini li, ek la kot bann voler kapav rantre ek kokin. Okontrer, ramas pu zot bann trezor dan lesyel, kot ni lapusyer, ni laruy pa kapav gat li, ek kot bann voler pa kapav rantre ek kokin parski kot to trezor ete, la mem to leker pu ete.” Anu veye ki nu leker pa pus nu zame pu fer enn karyer dan lemond uswa pu rod bann kitsoz materyel, dan plas servi Zeova ar tu nu leker. Nu tu bizin rekonet ki enn bon relasyon avek Zeova, sa mem sel trezor ki vo lapenn nu rode pu nu fer so leker kontan. (Proverb 27:11) Kan nu met Zeova an premye dan nu lavi tank ki nu ankor zenn, nu montre ki kitsoz ena plis valer pu nu ek ki kantite linportans Rwayom Bondye li ena pu nu. Pa bliye, “benediksyon Zeova sa mem ki fer vinn ris, ek li pa azut okenn duler avek li.” (Proverb 10:22) Bann zenn ena lokazyon pu montre kot sa zot leker ete; zot kapav donn Zeova bann kitsoz ki ena buku valer pu tu seki Li finn donn zot. Pu tu bann ki ranpli bann kondisyon, servis Betel ofer zot sa privilez extraordiner la.

¹⁷ Bann Ki Servi dan Betel Bizin Prop lor Plan Moral: Enn ekrivin Psom finn dir: “Kuma eski enn zenn zan kapav pirifye so simin? Kan li fer atansyon dapre to parol.” (Psom 119:9) Fer atansyon dapre parol Zeova vedir evit tu seki ena enn rapor avek bann kitsoz malprop ki lemond Satan pe ofer zordi. Pornografi lor Internet, move kondwit moral avek enn kikenn lot sex, lamizik malsin, divertisman ki pa korek, ek abiz lalkol, ala detrwa pyez ki Satan servi pu anpes nu bann zenn realiz zot bann lobzektif spirityel. Bann zenn bizin byin determine pu zot kapav tini ferm kont sa bann taktik la. Si antan ki zenn u truv u pe tom dan enn sa bann pyez la, li bon ki u koz avek bann ansyin dan u kongregasyon ek regle sa bann problem la avan u fer enn aplikasyon pu servis Betel. Pu servi Zeova avek enn leker konple, li inportan ki nu ena enn konsyans prop.—1 Timote 1:5.

¹⁸ Aprann Viv Byin Avek Lezot: Aprann viv byin avek lezot sa li enn kondisyon inportan pu ki u reysi u servis dan Betel. Bann frer ek ser ki fer parti dan fami Betel Moris sorti dan diferan ran sosyal ek ekonomik. Mem si li vre ki sa varyete personalite la ogmant bote spirityel Betel, defwa sa kapav usi kre bann problem. Si u pe pans servis Betel, li bon ki u poz u mem sa kestyon la: ‘Eski mo ofanse vit kan lezot pa dakor ar mo lopinyon?’ Eski lezot adapte fasil ar mwa?’ Si u bizin amelyor u dan sa bann domenn la, kumans fer li depi asterla mem. Si u fer sa, u pu adapte u pli fasilman pu viv ek travay avek bann manb fami Betel.

¹⁹ Donk, travay dir pu devlop enn relasyon solid avek Zeova, kumsa u pu vinn enn kikenn spirityel. Gard enn bon program letid personel, ki pu permet u lir Labib tulezur. Res aktif dan travay predikasyon. Si u met tu sa bann kitsoz la an pratik, lezot pu truv byin u progre spirityel. (1 Timote 4:15) Wi, bann gran-gran benediksyon pe atann bann ki pe prepar zot depi asterla mem pu fer enn karyer dan servis aplintan!

²⁰ Paran, Form U Bann Zanfan: Ki bann paran kapav fer pu ankuraz zot bann zenn zanfan fer enn karyer dan minister aplintan? Zezi finn dir: “Ninport kisannla ki finn byin gayn linstriksyon pu vinn parey kuma so anseynan.” (Lik 6:40) Li normal ki enn zelev ki finn gayn enn bon formasyon pu montre bann mem kalite ki so anseynan. Bann paran Kretyin bizin gard sa prinsip la byin dan zot lespri kan zot form zot zanfan “pu devlop latasman pu Bondye.” (1 Timote 4:7) Pwiski bann zanfan ena tandans pu ena mem latitid ki zot paran lor bann kitsoz spirityel, li bon ki bann paran la demann zot mem: ‘Eski nu apresye personelman travay ki pe fer dan Betel pu favoriz vre ladorasyon Zeova? Eski nu rekonet ki Zeova beni travay ki fer dan Betel? Eski nu krwar ki enn lavi dan servis Zeova sa mem meyer karyer ki nu zanfan kapav swazir?’ Si nu montre ki nu apresye servis Betel ek travay ki pe fer laba, dusma-dusma nu pu devlop lapresyasyon pu servis Betel dan leker nu bann zanfan.

²¹ Elkana ek Ana ti ena enn profon lapresyasyon pu vre ladorasyon. Zot finn les enn bon legzanp pu bann paran Kretyin zordi. An Izrael, zis bann zom Izraelit ti oblize ‘paret devan vre Senyer, Zeova’ dan tabernak trwa fwa par an. Malgre sa, “lane apre lane,” Elkana avek tu so fami ti fer plis ki 30 kilomet—sirman zot ti marse—pu ofer sakrifis dan sant vre ladorasyon Zeova. (Egzod 23:17; 1 Samyel 1:3, 4, 9; 2:19) Li kler ki sa sef fami la ti anvi ki tu so fami ena mem lintere pu bann kitsoz spirityel, parey kuma li.

²² Ana ti montre lintere pu vre ladorasyon, parey kuma so mari. Li ti santi li dan lobligasyon pu sutenir vre ladorasyon dan tabernak. Ana ti fer serman ki si Zeova fer li gayn enn garson, li pu ofer li Zeova, pu li servi dan tabernak. (1 Samyel 1:11) Dapre Lalwa Moiz, enn mari ti ena drwa kennsel serman so fam. (Nomn 30:6-8) Me, Elkana ti dakor avek serman Ana, ek li finn montre ki li usi, li ti sutenir vre ladorasyon!—1 Samyel 1:22, 23.

²³ Eski lapresyasyon ek bon latitid Elkana ek Ana finn ena enn bon lefe lor Samyel? Wi, byinsir. Mem li ti enn zenn garson, Samyel finn pran kont volonterman ek fidelman bann travay ki li ti bizin fer. Li finn usi gayn formasyon pu lezot privilez dan servis Bondye. Lintere ki Elkana ek Ana ti ena pu servis ki Samyel ti pe fer dan tabernak pa ti fini enn fwa ki zot ti kone ki Samyel ti pe akonpli so servis dan tabernak. Non, zot finn kontiyn vizit li regilyerman pu ankuraz li ek ed li pu kontiyn so servis aplintan.—1 Samyel 2:18, 19.

²⁴ Wi, Elkana ek Ana finn les enn bon legzanp pu bann paran zordi! Si nu bann zanfan tann nu bann parol lapresyasyon pu privilez servis Betel ek si zot truv nu lespri sakrifis pu favoriz bann lintere Rwayom, zot usi zot pu devlop enn leker ki dispoze pu servi lezot. Buku paran pe reysi devlop sa bon lintere la dan leker zot zanfan. Enn tifi ki ena setan finn ekrir: “Kan mo vinn gran mo ti pu kontan al Betel, ek laba, mo ti pu kontan fer detrwa kitsoz: (1) Tip La Tour de Garde ek Réveillez-Vous ! lor masinn, (2) travay dan departman desin, (3) pliy bann linz. Anfin, ninport ki travay parmi sa trwa la! Mo pu satisfe!” Komye nu leker kontan kan nu truv nu bann zanfan devlop enn leker ki anvi servi!

²⁵ Zenn, mazine ki “lemond pe al fini ek so dezir usi, me seki fer volonte Bondye pu res pu tuzur.” (1 Zan 2:17) Kontiyn fixe bann lobzektif spirityel, par egzanp privilez pu servi dan Betel. Paran, imit legzanp bann fidel lontan ki ti ankuraz zot zanfan pu devlop latasman pu Bondye. (2 Pyer 3:11) Anu tu fer nu par pu ed nu bann zenn frer ek zenn ser pu fer tu zot posib pu servi nu Gran Kreater, parski kuma Labib dir, avek sa “ena promes pu lavi asterla ek pu lavi dan lavenir.”—1 Timote 4:8; Eklezyast 12:1.

[Lakadre lor paz 4]

Bann Kondisyon Neseser pu Servis Betel

● Batize omwin depi enn an

● Enn kikenn spirityel ki ena enn profon lamur pu Zeova ek pu so lorganizasyon

● Ena enn bon lasante spirityel, mantal, afektif ek fizik

● Abitan Moris uswa enn kikenn ki ena enn permi pu res tuletan Moris

● Bizin kapav lir, ekrir ek koz byin Angle

● 19-35 an