Program Konstriksyon Lasal DiRwayom Pe Progrese
1 An 1983, ti pas enn lanons dan bann Lasanble Distrik “Unis grâce au Royaume” ki ti ena an Amérique. Ti anonse ki ti pu kre enn fon spesyal pu finans konstriksyon ek renovasyon bann Lasal DiRwayom an Amérique ek Canada. Sa lane la, personn pa ti pu dir ki kantite Zeova ti pu beni sa laranzman ki ti’nn kumanse la. Me apre, nu finn kumans truv laverite ki ena dan Psom 92:4 ki dir: “A Zeova, to finn fer mwa kontan par seki to finn fer; mo pu sant avek lazwa akoz bann travay ki to’nn fer.”
2 Zordi, nu byin kontan kan nu truv seki pe realize. Partu dan lemond, ena enn program konstriksyon Lasal DiRwayom ki pe al byin vit. Nu kapav dir ki dan enn sertenn fason, nu tu ena privilez pu pran par dan sa travay la. Nu fer sa kan nu donn larzan an kontribisyon, ki li buku uswa tigit. Kumsa, nu ed pu konstrir plis lasal partu dan lemond, kot bann dimunn kapav ador Zeova. Ena usi buku frer ki volonter pu donn zot lekipman, zot letan, zot bann kapasite, ek zot talan dan sa bann proze la. Wi, si sa proze la pe reysi, se parski Zeova pe gid nu, Li pe ed nu ek Li pe byin beni tu bann zefor ki nu tu, nu pe fer ansam.—Psom 127:1.
3 Buku filyal finn fer mem laranzman ki ti fer dan bann kongregasyon an Amérique. Dan buku peyi, bann kongregasyon finn met enn bwat kontribisyon pu Fon pu Lasal DiRwayom. Me an Amérique, Nu Minister DiRwayom Mars 1997 ti mansyonn enn ti sanzman. Li dir: “Depi ki Lasosyete finn kre Fon pu Lasal DiRwayom an 1983, bann frer finn byin kontribye avek tu zot leker. Sa finn permet bann kongregasyon pran bann loan pu konstrir bann Lasal DiRwayom. Dan l’Amérique, anviron 2,700 kongregasyon finn profit sa laranzman la, parski san sa, buku kongregasyon pa ti pu kapav konstrir bann nuvo Lasal DiRwayom uswa fer bann renovasyon neseser. Asterla, byin bizin servi enn parti sa fon la pu pret larzan bann kongregasyon dan bann peyi pov. Lasosyete ek bann kongregasyon ki pe servi u bann kontribisyon, apresye buku seki u pe fer pu kontiyn sutenir sa laranzman la.”
4 Sa anons la ti kuma enn invitasyon pu partisip dan enn program konstriksyon Lasal DiRwayom ki pe al byin vit. Fon pu Lasal DiRwayom ti pu permet bann kongregasyon lokal gayn larzan prete, me an mem tan sa ti pu enn led usi pu bann frer dan bann lezot peyi. Enn lot lartik, sa fwa la dan Nu Minister DiRwayom Ut 1997 ti dir: “Ena enn gran bezwin Lasal DiRwayom dan lemond antye. Zis pandan dernye lane servis, 3,288 nuvo kongregasyon finn forme. Laplipar sa bann kongregasyon la truv an Afrique, an Asie, an Amérique centrale, Amérique du Sud, ek an Europe de l’Est.”
5 Ki bann rezilta ki finn gayne depi sa? L’Annuaire 2001 dir: “Grasa sa metod la, dan 30 peyi finn fini mont 453 Lasal DiRwayom ek ena 727 batiman ki pankor fini. Lasosyete finn atir latansyon lor linportans pu fer bann plan Lasal DiRwayom ki pu servi kuma model pu sak peyi ki servi bann materyo ek bann metod lokal. Par egzanp dan Kenya, zot servi ros, dan Togo zot servi brik, ek dan Cameroun zot servi bann blok beton ki apre, zot krepi. Dan sa fason la, bann frer lokal pe gayn vit bann kapasite neseser pu okip bann responsabilite dan bann konstriksyon lokal.”
6 Nu kapav truve ki Zeova pe beni sa program la kan nu get seki pe pase an Afrique. Kan u get foto detrwa sa bann Lasal DiRwayom ki finn konstrir la, mazinn lefe ki sa bann konstriksyon la finn ena lor travay bann Temwin Zeova. Wi, sa finn ena enn lefe lor linite ki nu bann frer ena dan lemond antye. Sa finn ena enn lefe lor bann dimunn dan landrwa, ek lasistans dan bann reynion kongregasyon finn ogmante. Kuma u finn remarke, sa sipleman la pe atir latansyon lor bann Lasal DiRwayom ki’nn konstrir an Afrique. Me, dan bann lezot nimero Nu Minister DiRwayom, nu pu truve kuma program konstriksyon Lasal DiRwayom pe progrese dan lezot landrwa dan lemond.
[Zimaz lor paz 3]
REPIBLIK SANT AFRIKIN
Bimbo, Bangui
Begoua, Bangui
[Zimaz lor paz 4]
Ukonga, Tanzanie
[Zimaz lor paz 4]
Accra, Ghana
[Zimaz lor paz 4]
Salala, Libéria
[Zimaz lor paz 4]
Karoi, Zimbabwe
[Zimaz lor paz 4, 5]
Allada, Bénin—ansyin Lasal
Allada, Bénin—nuvo Lasal
[Zimaz lor paz 5]
Kpeme, Togo
[Zimaz lor paz 5]
Sokodé, Togo
[Zimaz lor paz 4, 5]
Fidjrosse, Bénin
[Zimaz lor paz 6]
Lyenga, Zambie—ansyin Lasal
[Zimaz lor paz 6]
Lyenga, Zambie—nuvo Lasal
[Zimaz lor paz 6]
Kinshasa, Congo
[Zimaz lor paz 6]
Musambira, Rwanda