Mazinn Bann Dimunn Aze Ki Fidel
1 Ana ti ena 84 an, ek malgre ki li ti enn vev ek li ti aze, “zame li pa ti absan dan tanp.” Zeova ti tuse par so fidelite ek Li ti donn li enn benediksyon spesyal. (Lik 2:36-38) Zordi, buku frer ek ser manifeste mem kalite latitid ki Ana, malgre bann sityasyon difisil ki zot bizin fer fas. Defwa sa bann dimunn fidel la santi zot dekuraze, parski zot bizin viv avek zot bann problem lasante, uswa zot nepli kapav fer bann kitsoz kuma avan, akoz zot laz. Anu get detrwa fason pratik kot nu kapav ankuraz zot ek ed zot pu gard enn bon program spirityel.
2 Reynion ek Predikasyon: Kan lezot propoz enn mwayin transpor avek lamur, li pli fasil pu buku dimunn aze asiste bann reynion regilyerman. Sa fortifye sa bann serviter ki lontan dan laverite la lor plan spirityel ek kongregasyon usi tir profi. Eski u’nn deza gayn lokazyon fer sa aksyon la?—Ebre 13:16.
3 Kan zot partisip regilyerman dan predikasyon sa fer bann vre Kretyin kontan ek zot satisfe. Me sa kapav difisil pu bann ki aze, ki malad ek ki feb. Eski li posib ki enn sa bann frer ek ser ki nu kontan la akonpayn nu dan ninport ki form predikasyon kuma enn “konpaynon”? (Rom. 16:3, 9, 21) Kitfwa u kapav invit li kan u donn temwaynaz par telefonn uswa kan u al fer enn vizit ubyin enn letid. Si sa dimunn aze la pa kapav kit so lakaz, eski enn letid kapav vinn kot li pu etidye?
4 Letid ek Frekantasyon: Detanzantan, sertin invit enn dimunn aze uswa enn dimunn andikape pu asiste zot letid familyal, defwa zot mem fer letid la kot sa bann dimunn la. Enn mama ti amenn so de ti zanfan kot enn ser aze pu fer zot letid dan liv Recueil d’histoires bibliques. Zot tu ti ankuraze par sa moman ki zot ti pase ansam la. Sa kalite dimunn la kontan kan invit zot pu enn repa uswa pu enn lot lokazyon kot zot kapav zwenn lezot dimunn. Si sa bann dimunn andikape la tro feb pu fer bann long vizit, kitfwa u kapav telefonn zot uswa pas kot zot pu fer enn ti lektir, priye ar zot, ubyin partaz avek zot enn lexperyans ankurazan.—Rom. 1:11, 12.
5 Zeova byin kontan bann dimunn aze ki fidel. (Ebre 6:10, 11) Nu kapav imit Li kan nu montre ki nu byin apresye zot ek kan nu ed zot pu gard enn bon program spirityel.