Enn Nuvo Dispozisyon pu Biblyotek Lasal DiRwayom
Depi byin lontan, bann kongregasyon dan lemond antye pe tir profit grasa biblyotek ki ena dan zot Lasal DiRwayom. Avan ti apel Li biblyotek pu Lekol Minister Teokratik. Dan lepase, li ti neseser ki sak kongregasyon ena so prop biblyotek. Me azordi, ena plizir kongregasyon ki servi enn sel Lasal. Anplis ena sertin kongregasyon ki servi enn lot lang. Akoz sa, li pli bon ki ena enn sel biblyotek ki byin azur pu sak lang, dan sak Lasal DiRwayom. Dan bann gran Lasal DiRwayom kot ena plizir ti lasal ansam, sak lasal bizin ena enn biblyotek pu sak lang.
Nu espere ki grasa sa dispozisyon la, bann kongregasyon pu gayn plis plas dan zot lasal, ek zot pu fer mwins depans. Anplis, kan fer de biblyotek vinn enn sel, ena pli sans ki bann kongregasyon gayn enn pli bon biblyotek. Si zame ena bann liv an dub, kapav ramas zot ek servi zot plitar kan konstrir bann nuvo Lasal DiRwayom. Si ena enn kompyuter avek Watchtower Library lor CD-ROM dan enn Lasal, sa li kapav enn zuti byin efikas pu sertin.
Pu ena enn frer ki pu responsab sak biblyotek. Li pli bon ki sa frer la li enn sirveyan Lekol Minister Teokratik. Tigit par tigit, li bizin azut bann piblikasyon ki apropriye dan sa biblyotek la. Andan, lor kuvertir sak liv, li pu ekrir uswa li pu met enn stanp dan enn fason byin prop, pu indike ki sa liv la, li pu biblyotek Lasal DiRwayom. Omwin enn fwa par an, li bizin tyeke ki pena okenn liv ki manke. Li bizin usi gete ki tu liv dan enn bon leta. Tu sa bann piblikasyon la bizin res dan biblyotek Lasal DiRwayom, fode pa nu amenn zot kot nu.
Tu bann frer ek ser dan kongregasyon kontiyn apresye biblyotek ki ena dan zot lasal. Sakenn parmi nu kapav montre ki nu apresye sa dispozisyon la. Kuma? Se kan nu pran swin sa biblyotek la, ek kan nu servi li pu rod “konesans Bondye.”—Prov. 2:5.