“Aksepte Sa”
1 Enn fwa, kan Zezi ti pe koz lor maryaz ar so bann disip li ti dir ki lavi selibater li ‘enn don.’ Apre sa li ti dir: “Seki kapav aksepte sa, aksepte li.” (Mat. 19:10-12) Plizir lane plitar, lapot Pol ti ekrir konsernan bann lavantaz enn lavi selibater ek li ti ankuraz lezot pu swiv so legzanp, setadir res selibater. (1 Kor. 7:7, 38) Buku zordi finn ‘aksepte’ pu res selibater ek zot pe profit bann lavantaz sa kalite lavi la. Ki sertin sa bann lavantaz la sa?
2 Servi “San Distraksyon”: Pol ti konpran ki enn lavi selibater ti pu permet li servi Zeova “san distraksyon.” Zordi usi parey. Enn frer selibater kapav fer zefor pu gayn privilez pu asiste l’École de formation ministérielle. An prinsip, enn kikenn ki selibater li pli lib pu fer servis pyonye, pu aprann enn nuvo lang, pu al dan enn landrwa kot bizin led, pu servi dan Betel, uswa pu li disponib pu bann lezot privilez spesyal dan servis pu Zeova. Li kapav ena plis letan ek plis lokazyon pu etidye afon ek medite ek koz ar Zeova avek tu so leker. Normalman, enn kikenn ki selibater kapav ofer limem plis pu ed lezot. Tu sa bann laktivite la dan “lavantaz personel” sa dimunn la.—1 Kor. 7:32-35; Akt 20:35.
3 Sa kalite servis san distraksyon pu Bondye la, amenn bann gran benediksyon. Apre ki li’nn pas 27 an dan Kenya, enn ser selibater ekrir: “Mo ti ena enn kantite kamarad ek ti ena buku travay! Nu ti fer bann kitsoz ansam ek nu ti vizit nu kamarad. . . . Mo ti lib ek mo ti kapav al kot mo anvi parski mo ti selibater. Akoz sa mo’nn kapav res byin okipe dan mo minister ek sa ti fer mwa gayn enn gran lazwa.” Li azute: “Avek letan, mo relasyon avek Zeova ti vinn pli solid.”
4 Aksepte Sa: Zezi ti dir ki seki bizin pus enn kikenn pu kiltiv sa don pu res selibater se “akoz rwayom ki dan lesyel.” (Mat. 19:12) Parey kuma ninport ki don, fode enn kikenn servi byin so lavi selibater pu li gayn lazwa ek bann byinfe. Buku selibater finn arive konpran linportans pu aksepte sa don la. Kuma? Se kan zot finn profit bann lavantaz ki zot finn gayne parski zot pa finn marye ek kan zot finn kont lor Zeova pu gayn so sazes ek so lafors.