Fer Konn Non Bondye
1. Kan bann dimunn aprann non personel Bondye, ki lefe sa kapav ena lor zot?
1 Kuma u ti reazir, premye fwa ki u ti aprann non Bondye? Buku ti reazir parey kuma sa madam la ki ti dir: “Kan premye fwa mo ti truv non Bondye dan Labib, mo ti plore. Mo ti telman tuse kan mo’nn aprann ki mo ti vremem kapav kone ek servi non personel Bondye.” Pu sa madam la, konn non Bondye ti enn pa byin inportan pu li aprann konn personalite Zeova ek pu li kapav devlop enn relasyon avek Li.
2. Kifer eski li byin irzan ki nu anseyn bann dimunn lor Zeova?
2 Kifer Bizin Fer Konn Sa Non La? Konn non Bondye vedir usi konn so bann kalite, so bann proze ek so bann aksyon. Nu bizin usi konn non Bondye pu nu kapav sape. Lapot Pol ti ekrir: “Tu bann ki fer apel ar non Bondye pu sove.” Pol rezonn avek bann ki pe ekut li: “Me kuma eski zot pu fer apel ar li?” Amwin ki bann dimunn dabor aprann lor Zeova ek ena lafwa an Li. Donk, li byin irzan ki bann Kretyin fer bann dimunn konn non Bondye ek seki sa non la reprezante. (Rom. 10:13, 14) Me, ena enn lot pli gran rezon kifer nu bizin fer bann dimunn konn non Bondye.
3. Sit rezon prinsipal nu predikasyon.
3 Dan bann lane 1920, grasa bann Lekritir, lepep Bondye ti konpran kestyon iniversel ki konsern usi seki Bondye pu fer pu montre ki Li ena drwa pu guverne ek pu fer so non vinn sin. Avan ki Zeova detrir bann move dimunn pu efas tu blam ki zot finn anpile enn lor lot lor so non, bizin ‘fer konn laverite lor Li dan lemond antye.’ (Izai 12:4, 5; Eze. 38:23) Donk, rezon prinsipal kifer nu prese se pu donn Zeova laglwar ek sanktifye so non devan tu dimunn. (Ebre 13:15) Lamur pu Bondye ek pu nu prosin pu pus nu pu partisip plin-plin dan sa travay ki Bondye finn donn nu lord pu fer la.
4. Kuma eski finn arive rekonet bann Temwin Zeova grasa non Bondye?
4 “Enn Lepep pu So Non”: An 1931 nu ti adopte non Temwin Zeova. (Izai 43:10) Depi sa, lepep Bondye finn telman fer konn non Bondye ki liv Proclamateurs, paz 124, fer sa remark la: “Partu dan lemond, si enn kikenn servi non Zeova, tutswit bann dimunn rekonet li kuma enn Temwin Zeova.” Eski se kumsa ki bann dimunn konn u? Apresyasyon pu bonte Zeova bizin pus nu pu ‘beni so non,’ ek koz lor Li sak fwa ki nu gayn enn lokazyon.—Psom 20:7; 145:1, 2, 7.
5. Kuma eski nu kondwit ena enn rapor avek privilez ki nu ena pu port non Bondye?
5 Antan ki “enn lepep pu so non,” nu bizin gard so bann prinsip. (Akt 15:14; 2 Tim. 2:19) Suvan, premye kitsoz ki bann dimunn remarke ar bann Temwin Zeova se zot bon kondwit. (1 Pyer 2:12) Zame nu pa pu anvi sali sa non la kan nu pa montre respe pu so bann prinsip uswa fer so ladorasyon pran dezyem plas dan nu lavi. (Lev. 22:31, 32; Mal. 1:6-8, 12-14) Okontrer, anu fer tu pu amenn enn lavi ki montre ki nu apresye privilez ki nu ena pu port non Bondye.
6. Ki privilez nu kapav profite zordi ek pu tuletan?
6 Zordi, nu pe truv sa deklarasyon Zeova la pe realize: “Depi soley leve ziska li kuse, mo non pu gran parmi bann nasyon.” (Mal. 1:11) Anu kontiyn fer konn laverite lor Zeova ek “beni so non ki sin pu tuletan, wi pu tuzur.”—Psom 145:21.