Enn Travay Ki Amenn Rekonfor
1 Mesaz ki ena dan Labib amenn enn rekonfor pu tu bann ki aksepte li ek aplik li dan zot lavi. (Psom 19:7, 8) Sa ed zot pu libere ar bann fos lanseynman ek bann move pratik. Ek li ofer zot enn lesperans sir pu lavenir. Me, se pa zis bann ki gayn sa bon nuvel la ki tir profi. Bann ki partaz sa bann lanseynman rekonfortan ki sorti dan Labib la, zot usi zot gayn rekonfor.—Prov. 11:25.
2 Gayn Lafors Grasa Nu Minister: Zezi ti dir ki tu bann ki aksepte pu vinn so disip ek pran sa zug la pu “gayn sulazman pu zot nam.” (Mat. 11:29) Pran zug Zezi inplik usi responsabilite pu prese ek fer bann disip. Limem li ti truve ki kan li ti rann temwaynaz, sa ti donn li lafors. Sa ti kuma manze pu li. (Zan 4:34) Kan li ti avoy so 70 disip pu prese, bann disip la ti gayn enn gran lazwa kan zot ti truve ki Zeova pe sutenir zot.—Lik 10:17.
3 Zordi usi parey. Buku Kretyin gayn lafors kan zot partisip dan laktivite predikasyon. Enn ser dir: “Laktivite predikasyon li rekonfortan parski li donn mo lavi enn sans ek enn bi. Kan mo partisip dan predikasyon, mo bliye mo bann problem personel ek bann difikilte tulezur.” Enn lot predikater byin zele dir: “Predikasyon . . . fer Zeova vinn enn kikenn ki reel pu mwa zur apre zur. Li donn mwa lape ek enn sertin satisfaksyon ki mo pa ti pu kapav gayne dan okenn lezot fason.” Wi, li vremem enn gran privilez pu “travay ansam avek Bondye”!—1 Kor. 3:9.
4 Zug Zezi Li Dus: Li vre ki Zezi ankuraz bann Kretyin pu “lite,” me li pa demann nu pu fer plis ki seki nu kapav. (Lik 13:24) Dayer, avek buku lamur li invit nu pu ‘vinn anba so zug avek li.’ (Mat. 11:29, not anba paz) Bann ki bizin fer fas ar sertin sityasyon difisil, kapav sir ki zot servis ki zot pe fer avek tu zot leker, mem si li pa buku, fer Bondye byin plezir.—Mark 14:6-8; Kol. 3:23.
5 Wi, li vremem enn sulazman pu servi enn Bondye ki apresye seki nu fer pu so non! (Ebre 6:10) Anu tuzur kontiyne fer zefor pu donn Li tu seki nu kapav.