Anu Gard Nu Lasal DiRwayom dan enn Bon Leta

1. Kifer eski ena enn Lasal DiRwayom?

¹ Dan lemond antye ena plis ki 94,000 kongregasyon bann Temwin Zeova. Laplipar kongregasyon rasanble dan enn Lasal DiRwayom pu etidye Labib ek pu profit konpayni bann frer ek ser. Sa lasal la se enn sant lokal kot nu al ador vre Bondye.

2. Kifer eski li inportan ki nu gard Lasal DiRwayom prop ek prezantab?

² Enn Program Netwayaz Regilye: Travay ki fer pu gard Lasal DiRwayom dan enn bon leta, li form enn parti byin inportan dan nu servis sakre. Liv Notre ministère, paz 61 dir: “Bann frer bizin konsider kuma enn privilez posibilite ki zot ena pu kontribye pu antretenir Lasal DiRwayom. Zot fer sa pa zis lor plan materyel, me usi kan zot port zot volonter pu gard lasal prop, prezantab, ek dan enn bon leta. Ki li andan uswa andeor, Lasal DiRwayom bizin reprezant byin lorganizasyon Zeova.” Pwiski nu servi lasal plizir fwa par semenn, li inportan ki nu netway li regilyerman ek ki nu gard li dan enn bon leta. Suvan, se bann frer ek ser ki reyni dan enn Lasal DiRwayom ki port zot volonter pu fer sa bann kitsoz la. Parey kuma dan lepok lontan, zordi usi bann serviter Zeova bizin fer zefor pu “refer ek repar” landrwa kot zot ador Bondye.—2 Kro. 34:10.

3. Kuma eski organiz program netwayaz Lasal DiRwayom, ek kisannla kapav partisipe?

³ Lor tablo bizin ena enn program netwayaz Lasal DiRwayom pu sak semenn. Tu bann grup letid liv, sakenn so tur, bizin netway lasal sak semenn, ek swiv enn lalis bann kitsoz ki bizin fer. Tu bann ki kapav, bizin partisip dan privilez ki zot ena sak semenn pu gard Lasal DiRwayom prop ek prezantab. Anba sirveyans zot bann paran, bann zanfan usi kapav partisipe. Kumsa bann paran pu montre zot lapresyasyon pu sa privilez la. Li byin inportan ki ena enn bon korperasyon sirtu kan plis ki enn kongregasyon servi enn Lasal DiRwayom. Kumsa, sa travay netwayaz la, ki enn laspe byin inportan nu ladorasyon, pa tom zis lor ledo sertin dimunn.

4. Ki bizin fer pu ki kongregasyon kone ki bann travay bizin fer kan netway Lasal DiRwayom?

⁴ Dan plas kot gard bann prodwi ek bann lekipman pu netwayaz, kapav afis enn lalis bann kitsoz ki bizin fer. Lor sa lalis la bizin ena bann kitsoz ki fer tulesemenn. Par egzanp: Pas aspirater, netway bann vit, swiy bann kontwar, devid bann pubel, pas mop, netway bann laglas, netway bann vantilater (si ena), ek netway zardin. Ena sertin kitsoz ki bizin fer mwin suvan, kuma par egzanp pas prodwi lor bann meb an dibwa ek netway bann sez uswa bann ban afon, lav bann rido ek netway bann glob ek bann tib lalimyer. Bizin gard tu bann prodwi dan enn plas kot bann zanfan pa gayn akse. Bizin ekrir lor la ki prodwi ena ladan ek explike kuma servi sak prodwi.

5. Ki kantite inportan sekirite li inportan, ek ki bann kitsoz ki bizin tyeke regilyerman? (Get lankadre lor paz 4.)

⁵ Li byin-byin inportan ki ena sekirite dan Lasal DiRwayom. (Det. 22:8) Dan lankadre ki ena lor paz 4, u pu truv enn lalis sertin bann kitsoz ki bizin tyeke regilyerman pu evit bann aksidan.

6. Kuma eski organiz travay lantretyin Lasal DiRwayom?

⁶ Gard Lasal DiRwayom dan enn Bon Leta: Kolez ansyin ena responsabilite pu diriz travay pu gard Lasal DiRwayom dan enn bon leta. An prinsip se enn ansyin uswa enn serviter ministeryel ki deziyne pu diriz sa travay la. Li organiz enn program regilye pu lantretyin Lasal DiRwayom ek li asir li ki lasal res prop ek dan enn bon leta ek ki ena tu seki bizin. Li inportan ki pena okenn kitsoz danzere dan lasal uswa dan lakur. Kan de uswa plis ki de kongregasyon servi enn sel lasal, bann kolez ansyin pu etabli enn komite ki okip Lasal DiRwayom. Sa komite la pu fer bann laranzman pu organiz bann travay pu okip lantretyin batiman ek terin. Komite la pu travay anba direksyon tu bann kolez ansyin ki servi sa lasal la.

7. (a) Ki kitsoz ki fer tulelane pu asire ki Lasal DiRwayom res dan enn bon leta? (b) Ki bann kitsoz ki bizin pran kont ase suvan? (Get lankadre lor paz 5.)

⁷ Sak lane bizin inspekte Lasal DiRwayom an detay. Bann ansyin zot responsab pu fer bann laranzman ki bizin pu okip afon ninport ki kitsoz ki bizin pran kont. Kitfwa pu invit bann proklamater pu ede pu fer bann reparasyon ek bann travay lantretyin ki bizin. Zot tu bizin fer enn zefor pu repar mem bann ti kitsoz ek bizin pa tarde pu pran kont bann kitsoz ki bizin latansyon.

8. Kan eski bann ansyin kapav kontakte Comité de construction régional konsernan bann problem lantretyin?

⁸ Si bann ansyin truve ki zot bizin konsey uswa led pu fer bann reparasyon dan Lasal DiRwayom, zot kapav kontakte Comité de construction régional. Kitfwa sa kapav konsern lantretyin moket, reparasyon bann sistem klimatizasyon uswa vantilasyon, ek truv solisyon pu bann problem mwazi dan batiman.

9. Ki bizin fer kan bizin led enn kontrakter?

⁹ Servi Fon Kongregasyon Byin: Se bann volonter ki fer laplipar travay dan Lasal DiRwayom ek dan lakur. Bann zefor ek sakrifis ki zot fer montre zot lamur, ek zot led diminye bann depans. Si bann ansyin truve ki li neseser zot kontakte enn kontrakter pu fer enn sertin travay, par egzanp pu fann pestisid, zot pu sey gete ki kontrakter kapav fer sa travay la dan enn meyer pri. Dabor, zot pu prepar enn rapor detaye lor sa travay ki bizin fer la ek bann materyo ki bizin. Zot pu al get sa bann diferan konpayni uswa kontrakter la pu kone komye sa pu kute. Apre ki bann konpayni la finn fini fer zot pri ek enn resi komye sa pu kute, bann ansyin kapav swazir ki konpayni uswa kontrakter pe ofer zot enn pli bon pri. Bizin swiv sa fason fer la, mem si enn frer finn propoz pu fer travay la uswa pu furni bann materyo ki bizin pu enn sertin pri.

10. Ki bizin fer si ena enn gran reparasyon uswa renovasyon dan lasal?

¹⁰ Gran Reparasyon Uswa Renovasyon: Kan komite ki okip lasal truve ki bizin fer enn gran travay an rapor avek lantretyin Lasal DiRwayom, sa komite la kapav demann kolez ansyin ki zot bizin fer. Si bann ansyin truve ki bizin fer enn gran reparasyon uswa renovasyon uswa ki bizin led lezot kongregasyon, bann ansyin pu kontakte Comité de construction régional. Sa bann frer kalifye ek ki ena lexperyans la pu donn zot bann bon sigzesyon ek pu gid zot dan zot travay. Si ena enn gro depans pu fer, bizin gayn enn sif egzak komye sa pu kute ek prepar enn rezolisyon pu kongregasyon.—Get Nu Minister DiRwayom Fevriye 1994, an Franse, Réponses à vos questions.

11. Kuma eski nu kapav montre nu lapresyasyon pu privilez ki nu ena pu asiste bann reynion dan lasal?

¹¹ Wi, nu byin apresye gran privilez ki nu ena pu nu reyni dan Lasal DiRwayom! Zame nu pu anvi negliz nu bann reynion uswa konsider zot kuma bann kitsoz ki pena valer. Nu tu nu kapav kontribye pu ki sa dispozisyon ki’nn pran pu ankuraz nu la, vinn enn sikse. Kuma? Se kan nu partisip plin-plin dan lantretyin nu Lasal DiRwayom. Sa fer vre ladorasyon vinn ankor pli gran ek sa donn non Zeova laglwar. Anu determine pu gard landrwa kot nu ador Zeova dan enn bon leta.

[Lankadre lor page 4]

Enn Lalis Bann Kitsoz Ki Konsern Sekirite

◻ Bizin met bann laparey teyn dife dan enn plas kot tu dimunn kapav gayn akse. Bizin tyek zot tulelane.

◻ Bizin gard stor ek twalet prop, an ord ek fode pa gard bann kitsoz ki kapav pran dife vit ladan, uswa bann kitsoz personel ek salte.

◻ Bizin egzaminn twa ek dalo ek netway zot regilyerman.

◻ Bizin fer ansort ki bann lale ek parking byin eklere ek ki pena nanyin ki kapav fer kikenn glise uswa tonbe.

◻ Bizin tyek ek repar bann instalasyon elektrik ek bann vantilater.

◻ Bizin repar bann plas kot delo swinte pu anpes gayn mwazi.

◻ Kan pena personn dan batiman, bizin ferm li akle.

[Lakadre lor page 5]

Lantretyin Lasal ek Terin

◻ Deor: Eski twa, miray, bann lafnet, ek lanseyn ki devan lasal zot dan enn bon leta?

◻ Lakur: Eski lakur prop? Eski bann lale, bann baraz, ek parking dan enn bon leta?

◻ Andan: Eski moket, rido, bann instalasyon elektrik ek plonbri, miray, ek bann bife kot gard piblikasyon zot byin prezantab?

◻ Lekipman: Eski bann lalimyer, sistem sonorizasyon, sistem klimatizasyon, ek bann vantilater mars byin?

◻ Twalet: Eski zot prop ek zot mars byin?