Zenn—Zet enn Bon Baz pu Lavenir
1. Kifer bann zenn Kretyin bizin devlop enn lafwa solid?
1 Dan u lespri, ki pli inportan? Eski u plis interese ar bann kitsoz prezan, uswa eski u plis interese ar lavenir ek seki Bondye inn promet? (Mat. 6:24, 31-33; Lik 8:14) Nu bizin enn lafwa solid pu les bann promes Bondye inflyans seki nu fer, parey kuma legzanp Abraam ek Moiz montre nu. (Ebre 11:8-10, 24-26) Kuma eski u kapav devlop sa kalite lafwa-la ek zet “enn bon baz pu lavenir”?—1 Tim. 6:19.
2. Ki nu aprann ar legzanp lerwa Yosiya?
2 Rod Zeova: Si u ek u fami ena bann bon labitid spirityel ansam, sa li byin bon. Me sa pa vedir ki li otomatik ki u pu gayn enn lafwa solid. Pu u truv “konesans Bondye,” u bizin rod Zeova personelman. (Pro. 2:3-5; 1 Kro. 28:9) Se seki zenn lerwa Yosiya ti fer. Li ti grandi dan enn lanvironnman ki pa ti favoriz so krwasans spirityel. Me malgre sa, kan li ti ena 15 an, “li finn kumans rod Bondye ki David so anset ti pe priye.”—2 Kro. 34:3.
3. Kuma bann zenn Kretyin kapav rod Zeova zordi?
3 Kuma u kapav rod Zeova? Kan u egzaminn avek atansyon seki u krwar ek ‘verifye pu umem’ si sa vremem laverite. (Rom. 12:2) Par egzanp, eski u kapav explik seki Labib dir konsernan disan? Eski u kapav pruve ki Rwayom Bondye inn kumans reyne dan lesyel an 1914? Li inportan ki u gayn “enn konesans egzak lor laverite,” pu ki u kapav zet enn bon baz pu lavenir.—1 Tim. 2:3, 4.
4. Kuma bann proklamater ki pa batize kapav montre ki zot pe progrese?
4 Kan Yosiya ti rod Zeova, sa ti donn bann bon rezilta. Avan mem li ariv laz 20 an, avek kuraz li ti anlev fos ladorasyon dan so peyi. (2 Kro. 34:3-7) Li parey pu u. Se u bann aksyon ki pu montre ki u pe fer progre. (1 Tim. 4:15) Si u enn proklamater ki pa batize, fer zefor pu amelyor kalite u predikasyon. Pa kontant u zis ofer piblikasyon. Fixe lobzektif pu servi Labib, pu rezonn avek dimunn, ek pu kiltiv lintere bann dimunn ki u zwenn. (Rom. 12:7) Sa pu ed u pu grandi lor plan spirityel.
5. Ki posibilite bann Kretyin batize ena pu fer plis dan zot minister?
5 Donn Zeova Seki U Ena Meyer: Kan u pran batem pu montre u langazman ar Zeova, u vinn enn minis ki Bondye inn ordone. (2 Kor. 3:5, 6) Sa uver semin pu u kapav servi Zeova aplintan. U kapav fer pyonye, servi dan Betel, servi kuma misyoner, uswa dan konstriksyon internasyonal. U kapav usi aprann enn lot lang uswa al servi dan enn landrwa kot ena pli gran bezwin.
6. Kuma eski nu tu, nu kapav zet enn bon baz pu lavenir?
6 Byinsir, li pa posib pu nu tu partisip dan sa bann privilez servis-la. Me sakenn parmi nu kapav donn Zeova seki li ena meyer. (Mat. 22:37) Ninport ki u sityasyon, santre u lavi lor u servis pu Zeova. (Psom 16:5) Kan u fer sa, u pu zet enn bon baz pu lavenir.