Enn Kavalri Pe Atake—Sa Konsern U
1, 2. Kuma eski bann serviter Bondye zordi, zot inplike dan realizasyon vizyon profetik ki truv dan Révélation 9:13-19?
1 “Sizyem anz-la finn sonn so tronpet.” Zis apre, ‘de myriad myriad bann larme kavalri’ finn sorti, ek zot finn fer enn tapaz kuma loraz. Se pa enn larme ordiner. “Latet sa bann seval-la zot kuma latet bann lyon.” Dife, lafime ek suf pe sorti dan zot labus, ek zot “lake parey kuma bann serpan.” Sa latak sinbolik-la devaste tu lor so pasaz. (Rév. 9:13-19) Eski u kone kuma realizasyon sa vizyon profetik extraordiner-la konsern u?
2 Bann res oints ek zot konpaynon, lezot brebi, pe travay dan linite pu proklam zizman Bondye. Rezilta: Zot pe devwal konpletman ki la Kretyinte finn mor lor plan spirityel. Anu egzaminn de laspe sa vizyon profetik-la ki montre kifer bann serviter Bondye zot byin efikas dan zot minister.
3. Ki formasyon u finn gayne pu prese dan enn fason efikas?
3 Forme ek Ekipe pu Proklam Mesaz Bondye: Lekol Minister Teokratik ek bann lezot reynion, finn form bann serviter Bondye pu pres avek lasirans. Parey kuma Jésus ek so bann disip, zot usi zot finn al partu kot ena dimunn, pu rod bann ki diyn. (Mat. 10:11; Marc 1:16; Luc 4:15; Actes 20:18-20) Sa metod Biblik pu prese-la, li vremem efikas!
4. Ki zuti buku proklamater ena pu ed zot fer zot travay?
4 Bann minis Kretyin pe akonpli misyon ki Jéhovah finn donn zot, setadir la predikasyon. Zot finn distribye par milyar la Bib, liv, brosir ek magazinn. Nu kapav gayn sa bann piblikasyon-la dan preske 400 lang. Zot koz lor enn kantite size ek zot servi bann metod ki pu atir diferan kalite dimunn. Eski u servi sa bann piblikasyon-la dan enn fason efikas?
5, 6. Ki kitsoz ki montre ki bann serviter Jéhovah ena So sutyin?
5 Direksyon ek Sutyin Bondye: Dapre sa vizyon profetik-la, nu truve usi ki laktivite reprezante par sa latak sinbolik-la, li ena sutyin Bondye. (Rév. 9:13-15) Laktivite predikasyon lor later antye pe akonpli grasa lespri Bondye, pa par sazes uswa puvwar bann dimunn. (Zek. 4:6) Jéhovah pe servi bann anz pu diriz sa travay-la. (Rév. 14:6) Donk, grasa zefor so bann Temwin lor later ek usi So sutyin, Jéhovah pe atir bann dimunn ki ena limilite.—Jean 6:45, 65.
6 Personn pa kapav aret bann serviter Bondye. Kifer? Se parski zot inn byin forme ek zot inn byin ekipe pu prese, ek zot ena led bann anz ki pe gid zot dan sa laktivite-la. Donk, anu kontiyn fer nu par dan lakonplisman sa gran vizyon profetik-la.