La Nuritir Spirityel dan Ler Ki Bizin
1. Kuma eski Ézékiel 36:29 pe realize zordi?
1 “Mo pu fer la grin puse an abondans, ek mo pa pu fer zot konn la faminn,” se seki Suverin Senyer Jéhovah finn dir. (Ézék. 36:29) Sa bann parol profetik-la aplik ar lepep Bondye zordi. Dan enn sans sinbolik, Jéhovah finn fer la grin puse an abondans pu so lepep. Kuma Li pe fer sa? Li donn la nuritir dan ler ki bizin atraver bann lasanble distrik.
2. Kuma eski Jéhovah ti servi bann lasanble distrik pu donn la nuritir spirityel dan ler ki bizin?
2 An 1931, dan lasanble ki ti fer dan Columbus, l’Ohio, Jéhovah ti fer so bann serviter adopte enn nuvo non, setadir Temwin Jéhovah. (Is. 43:10-12) An 1935, la grand ful dan Révélation 7:9-17 ti idantifye. An 1942, Frer Knorr, ti fer diskur, “Lape—Eski Li Pu Dirab?” Sa diskur-la ti relans laktivite predikasyon dan lemond antye, ek swit a sa, ti form l’École biblique de Guiléad. Mem si sertin lasanble distrik ti plis memorab ki lezot, sakenn sa bann lasanble-la ti furni enn nuritir spirityel ki ris ek dan ler ki bizin.—Ps. 23:5; Mat. 24:45.
3. Ki nu bizin fer si nu’le profit festin spirityel ki nu gayne dan lasanble distrik?
3 Eski U Pe Nuri U Byin? Li kapav arive ki ena enn kantite manze otur nu ek purtan nu mal nuri. Kifer? Parski nu pa fer zefor pu manze. (Prov. 26:15) Li parey lor plan spirityel. Pandan sertin lasanble distrik, nu finn remarke ki buku mars-marse pu nanyin, uswa zot koz avek lezot pandan program. Se vre ki, profit la konpayni fraternel li enn laspe inportan nu lasanble. Me, se selman avan ek apre bann sesyon ki nu kapav fer sa. (Eccl. 3:1, 7) Si nu pa res dan nu plas pu ekute, nu kapav rat enn pwin byin inportan. Detanzantan, li kapav arive ki bann frer ki okip diferan servis dan lasanble bizin diskite ant zot pandan sesyon. Me sinon, zot bizin donn legzanp ek res atantif pandan program. Tu dimunn bizin fer li enn devwar pa mank nanyin dan sa nuritir spirityel ki nu gayne-la.—1 Cor. 10:12; Phil. 2:12.
4. Kuma eski nu kapav montre nu rekonesans pu la nuritir spirityel ki Jéhovah donn nu an abondans?
4 Eski nu pa kontan ki Jéhovah pe donn nu la verite spirityel en abondans, alors ki dan la Kretyinte, zot pe mank manze ek zot pe nuri zot avek bann fos doktrinn? (Is. 65:13, 14) Enn fason ki nu kapav ‘montre nu rekonesans,’ se kan nu konsider lasanble kuma enn lokazyon pu les Jéhovah anseyn nu. (Col. 3:15) Olye u aret u lor lorater, konsantre plito lor mesaz ki li pe transmet, ek konsider sa kuma enn mesaz nu “Gran Instrikter” Jéhovah. (Is. 30:20, 21; 54:13) Donn tu u latansyon. Pran not bann pwin inportan. Sak swar, reviz bann pwin inportan ki u’nn aprann dan la zurne. Aplik seki u aprann.
5. Ki bann rezon pu nu rezwir, lasanble distrik donn nu?
5 Avan Harmaguédôn deklanse, sak lasanble ki organize, ki li dan enn kan refizye, dan enn peyi kot ena lager, uswa dan enn peyi kot ena lape, se enn viktwar lor Satan! Nu form enn sel fami ki byin ini, ek nu atas buku linportans ar bann lokazyon ki nu gayne pu reyni dan bann lasanble distrik. (Ézék. 36:38) Nu sir ki ankor enn fwa, Jéhovah pu donn nu, dan so lamur, enn kantite “manze dan ler ki bizin.”—Luc 12:42.
[Lankadre lor paz 4]
Montre Lapresyasyon pu Manze Ki Jéhovah Donn Nu
◼ Ekut byin
◼ Not bann pwin-kle
◼ Sak swar, reviz bann pwin-for ki ti’nn devlope dan la zurne
◼ Aplik seki u aprann