L’École de Formation Ministérielle—Enn Grand la-Porte Ki Donne Accès à l’Activité
1 Par moyen prophète Jérémie, Jéhovah ti prédire: “Mo pou donne [mo peuple] bann bergers ki pou vrai-même prend zot soin. Zot népli pou peur, ek enn parmi zot pa pou manqué.” (Jér. 23:4) Zordi, sa travaille berger-la pé accompli parmi bann dimoune de toute nations, par plusieurs dizaines milliers anciens ki’nn établi dans bann congrégations. Mais zot gagne aussi l’aide enn groupe jeune frères ki, comparé ar bann gouttes la rosée, pé offert zot-même volontairement dans service Jéhovah. (Ps. 110:3) Vraiment, sa bann frères humble-la zot enn bénédiction pou bann congrégations! Oui, étant donné ki Jéhovah pé contigne rassemblé so peuple, encore toujours bien bizin bann zom qualifié ki disposé pou servi zot bann frères.
2 Justement, finn prévoir l’École de Formation Ministérielle pou forme bann anciens ek assistants ministériel célibataire pou assume plus responsabilités. Depuis création sa l’école-la en 1987, finn organise 999 classes kot plus ki 22,000 zélèves, dans environ 140 filiales, finn kapav suive sa cours-la. Pou sa bann frères-la, sa l’école-la li vrai-même “enn la-porte ki donne accès à l’activité.”—1 Cor. 16:9.
3 L’Objectif Sa l’École-La: L’objectif sa l’école-la, c’est forme bann frères qualifié, pou ki zot kapav assume bann responsabilités, partout kot éna enn besoin dans l’organisation. Sa l’école-la faire zot vinn pli efficace pou prend la tête dans la prédication, pou prend soin troupeau Bondié, ek pou enseigné dans la congrégation. Après zot diplômes, bann zélèves-la al servi couma pionniers spécial ou-soit surveillants itinérant dans zot pays-même, ou-bien à l’étranger. Lézot affecté dans zot propre congrégations ou-soit dans territoires zot filiale, là kot éna plus besoin.
4 Pendant sa cours huit semaines-la, bann étudiants-la étudié la Bible bien en profondeur. Zot analyse enn grand quantité l’enseignements Biblique, ki bien-sûr inclure aussi responsabilités bann bergers ek bann instructions couma réglé bann problèmes ki enn Chrétien gagné. Zot aprann séki la Bible enseigné dans domaine administration, judiciaire, ek organisation. Zot gagne enn formation spécialisé en tant ki orateurs public, et zot gagne enn l’aide personnalisé pou accélère zot progrès spirituel.
5 Conditions Requises: Li normal ki conditions requises pou assisté sa l’école-la, zot bien élevé. Bann candidats-la bizin pé servi couma ancien ou-soit assistant ministériel depuis au moins deux ans de suite. Zot bizin célibataire ek zot bizin éna entre 23 à 50 ans. Zot bizin konn lire ek écrire, ek bien à l’aise avec langue dans lequel cours-la pou dirigé. Zot la-santé bizin bon, sans suive okenn traitement ou-soit régime spécial. Bien-sûr, bann pionniers permanent éna la priorité.
6 Bann ki porte zot volontaire, bizin disposé ek bizin kapav al servi kot envoye zot. Zot bizin éna même l’attitude ki Isaïe ki ti offert li-même avec tou so léker pou accompli enn mission spécial. Li ti dire: “Moi mo là. Envoye moi.” (Is. 6:8) Isaïe finn manifesté aussi l’humilité toute longue so la-vie. Pareillement, bann frères ki assisté sa l’école-la bizin motivé par l’amour pou zot bann frères ek enn désir pou servi zot, ek non pas par enn désir pou mette zot-même en avant ou-soit pou gagne enn fonction spécial. Évidemment, après enn bon formation coumsa, bann frères diplômé-la bizin applique séki zot inn aprann pou faire lézot tire profit.—Luc 12:48.
7 Bienfaits: Pendant sa huit semaines formation intense-la, bann zélèves-la “nourri zot avec bann paroles de la foi ek avec enn joli l’enseignement.” (1 Tim. 4:6) Donc, zot bien équipé pou aide ek pou encourage bann frères dans bann congrégations ek circonscriptions kot zot affecté. Dans beaucoup l’endroits kot finn envoye bann diplômés École de Formation Ministérielle, l’activité prédication finn augmenté, bann proclamateurs, surtout bann jeunes, finn fixé l’objectif pou vinn pionniers, ek beaucoup nouveaux dans la congrégation finn gagne plus l’attention personnel.
8 Eski ou enn ancien ou-soit enn assistant ministériel ki célibataire ek ki éna entre 23-50 ans? Kifer eski ou pa rempli enn application pou l’École de Formation Ministérielle? Eski ou enn jeune frère ki pé réfléchi lor ou bann futur objectifs dans ou service pou Jéhovah? Eski ou kapav vive enn la-vie simple, sans laisse ou distraire par lézot kitsoz, pou ou kapav passe par sa “la-porte ki donne accès à l’activité”-la? Beaucoup la joie ek satisfaction pé atann ou en retour. Oui, École de Formation Ministérielle apporte bann bienfaits, pa zis pou bann ki suive sa cours-la, mais aussi pou tou bann congrégations dans le monde entier.
[l’encadré page 3]
Séki Sa Formation-La Finn Apporte Zot
“Sa finn vraiment améliore mo façon prêché, ek sa finn aide moi pou mieux servi la Bible pou assume mo rôle de berger avec sagesse.”
“Grâce à sa l’école-la, mo éna beaucoup plus l’assurance kan mo assume mo bann responsabilités dans la congrégation.”
“Sa cours-la finn change mo la-vie beaucoup; mo éna enn l’autre vision lor la théocratie ek lor l’organisation Bondié.”
“Sa formation-la finn aide moi pou trouve l’importance pou offer mo-même pou al servi kot éna plus besoin.”1y