Montré ki Ou Éna l’Esprit Pionnier
1. Couma enn kikenn manifesté l’esprit pionnier?
1 Tou proclamateurs, ki zot éna possibilité pou servi antan ki pionnier asterla ou-soit non, kapav manifesté l’esprit pionnier. Zot tou vraiment envie obéir l’ordre ki zot finn gagné pou prêché ek faire bann disciples. (Mat. 28:19, 20; Actes 18:5) Zot intéresse zot ar tou dimoune ek zot faire bann sacrifices pou accompli zot ministère. (Mat. 9:36; Actes 20:24) Bann serviteurs Jéhovah disposé pou faire tou séki zot kapav pou aide lézot konn la vérité. (1 Cor 9:19-23) Anou examine l’exemple enn kikenn ki finn manifesté sa l’esprit-la. C’est Philippe, l’évangélisateur.
2. Couma bann anciens ek bann assistants ministériel kapav imite l’exemple Philippe dans la prédication?
2 Prêché ek Enseigné: Dans premier siècle Philippe ti éna bann grand responsabilité dans congrégation. (Actes 6:1-6) Mais avant tou, li ti enn bon prédicateur la bonne nouvelle. (Actes 8:40) Pareil couma Philippe, zordi bann anciens ek bann assistants ministériel occupe bann responsabilités dans la congrégation. En même temps, zot kapav manifesté l’esprit pionnier kan avec enthousiasme zot prend la tête dans la prédication. Kan zot faire sa, zot fortifié spiritualité la congrégation!—Rom. 12:11.
3. Couma nous kapav manifesté l’esprit pionnier kan nous pé faire face ar bann l’épreuves?
3 Zis après la mort Étienne, bann Chrétiens ti konn enn grand persécution ki’nn boulverse zot la-vie. Mais, Philippe ti contigne prêché, ek li ti joué enn rôle bien important dans la prédication avec bann Samaritains. (Actes 8:1, 4-6, 12, 14-17) Nous kapav imite so l’exemple kan nous contigne prêche la bonne nouvelle même si nous pé faire face ar bann l’épreuves, ek kan nous prêche avec tou dimoune ki nous joinde, sans faire préférence.—Jean 4:9.
4. En tant ki enseignant, ki l’exemple Philippe finn laissé?
4 Philippe ti enn bon enseignant Parol Bondié. Nous kapav trouve sa bien kan nous lire couma li ti aide l’eunuque Éthiopien pou vinn enn disciple Jésus. (Actes 8:26-38) Kan nous développe nou capacité pou servi la Bible ek kan nous ‘raisonne avec bann dimoune lor bann l’Écritures,’ c’est enn l’autre moyen kot nous montré ki nous manifesté l’esprit pionnier. (Actes 17:2, 3) Pareil couma Philippe, nous aussi nous faire zeffort pou prêche la bonne nouvelle partout kot éna dimoune ek dans n’importe ki l’occasion approprié.
5. Ki kapav aide bann parents Chrétiens pou développe l’esprit pionnier dans léker zot bann zenfants?
5 Dans la Famille ek Dans la Congrégation: Péna doute ki bon l’attitude ek bon l’exemple Philippe finn éna enn l’effet positif lor so bann tifilles. (Actes 21:9) Pareil couma Philippe, bann parents Chrétiens ki mette bann l’intérêts du Royaume en premier dans zot la-vie, zot encourage zot bann zenfants pou faire pareil. Même si enn parent li fatigué après enn semaine travail, mais li trouve le temps pou prêche avec zèle, sa kapav éna enn bon l’effet durable lor so zenfant.—Prov. 22:6.
6. Couma nous kapav montré ki nous apprecié bann pionniers dans nou congrégation?
6 Philippe ti manifesté l’hospitalité envers Paul ek Luc, bann Chrétiens zélé ki ti pé travail dur dans zot service pou Jéhovah. (Actes 21:8, 10) Azordi, couma eski nous kapav montré ki nous apprécié ek soutenir sa bann frères ek soeurs ki zélé dans zot service-la? Kitfois nous kapav propose pou travail avec bann pionnier enn gramatin ou-soit enn l’après-midi kot péna beaucoup ki participe dans la prédication. (Phil. 2:4) Nous kapav aussi invite zot kot nous pou nous encourage nou camarade. Oui, même dans ki situation nous trouve nous, anou faire zeffort pou manifesté l’esprit pionnier.