Aide lezot pou “obeir avek zot leker”
1. Ki Jéhovah pé demann bann ki adore Li?
1 Pou ki Jéhovah accepté nou l’adoration, li bien important ki nou obeir Li. (Deut. 12:28; 1 Pierre 1:14-16) Bientot, jugement Bondié pou vinn “lor bann ki pa konn [Li] ek lor bann ki pa obeir la bonne nouvelle.” (2 Thess. 1:8) Couma nou kapav aide bann dimoune pou “obeir avek zot leker” l’enseignement ki ena dan Parole Bondié?—Rom. 6:17.
2. Kifer li important pou aide lezot gagne enn la-foi solid?
2 Kan aide lezot pou ena la foi ek l’amour: Dan la Bible, ena enn grand lien entre l’obeissance ek la foi. L’apotre Paul ti koz lor “l’ordre ki sa Bondié eternel-la finn donné, pou favorise l’obeissance par la foi.” (Rom. 16:26) Hébreux chapitre 11 cite plusieurs l’exemple bann dimoune ki ti ena la foi ek beaucoup parmi zot ti obeir l’ordre ki Jéhovah Li-mem ti donne zot. (Héb. 11:7, 8, 17) Parkont, desobeissance li associé avek enn mank la foi. (Jean 3:36; Héb. 3:18, 19) Nou bizin developpe bann capacité pou servi la Bible bien, pou aide lezot pou developpe enn qualité la foi ki pou pousse zot pou obeir.—2 Tim. 2:15; Jacq. 2:14, 17.
3. (a) Ki lien ena entre l’obeissance ek l’amour? (b) Couma eski nou kapav aide bann ki pé etudié la Bible developpe l’amour pou Bondié?
3 L’obeissance, li aussi lié avek l’amour pou Bondié. (Deut. 5:10; 11:1, 22; 30:16) Premier Jean 5:3 dire: “Ala seki vedir l’amour pou Bondié: nou bizin suive so bann commandement; ek pourtant so bann commandement pa lourd.” Couma eski nou kapav aide bann ki pé etudié la Bible pou developpe l’amour pou Jéhovah? Pendant l’etude, rod bann l’occasion ki pou faire etudiant-la augmente so reconnaissance pou bann qualité ki Jéhovah ena. Montré ou bann sentiment profond ki ou ena ou-mem pou Bondié. Aide etudiant-la pou reflechi couma li kapav developpe enn relation personnel avek Jéhovah. Mais pli important ki tou, l’amour pou Jéhovah pou pousse lezot—ek nou aussi—pou obeir Li avek nou leker.—Mat. 22:37.
4. (a) Kifer nou l’exemple important? (b) Ki nou bizin faire pou cultive “enn leker obeissant”?
4 Par nou l’exemple: Enn fason bien efficace pou encourage lezot pou obeir la bonne nouvelle, c’est par nou l’exemple. Seulement nou bizin touletan contigné faire zeffort pou kapav cultive “enn leker obeissant.” (1 Rois 3:9; Prov. 4:23) Ki sa vedir? Nourri ou leker avek la nourriture spirituel grace a enn l’etude la Bible regulier ek assisté bann reunion. (Ps. 1:1, 2; Héb. 10:24, 25) Frequente bann ki servi Jéhovah avek tou zot leker. (Prov. 13:20) Participe regulierement dan predication avek enn desir sincere pou aide bann dimoune ki dan ou territoire. Prié Jéhovah pou Li guide nou, pou nou developpe enn bon leker. (Ps. 86:11) Rejette bann kitsoz ki kapav pourri nou leker, par exemple bann divertissement immoral ek violent. Rod bann kitsoz ki pou faire nou vinn pli proche ar Bondié ek ki pou faire nou relation avek Li vinn pli solid.—Jacq. 4:7, 8.
5. Couma bann ki obeissant gagne benediction?
5 Ena bien longtemps, Jéhovah ti donne so peuple garanti ki zot ti pou gagne beaucoup benediction si zot ti ecoute so la-voix. (Deut. 28:1, 2) Zordi aussi li pareil. Jéhovah, donne enn quantité benediction “bann ki obeir Li couma enn chef.” (Actes 5:32) Alors, anou aide lezot pou obeir avek zot leker, grace a nou l’enseignement ek par nou l’exemple.