Enseigne bann ki ena l’humilité pou marche dan chemin Bondié
1. Faire bann disciple, ki sa impliké?
1 Bann dimoune ki ti vive dan premier siecle ti dire concernant bann disciple Jésus ki zot ti suive “sa Chemin-la.” (Actes 9:2) Kan enn dimoune suive vrai religion chrétien, c’est tou so fason vive ki impliké. (Prov. 3:5, 6) Alors, kan nou conduire bann l’etude, li pa assez ki nou partage zis la connaissance exact lor bann l’enseignement la Bible. Nou bizin aussi aide nou bann l’etude pou marche dan chemin Jéhovah.—Ps. 25:8, 9.
2. Ki kapav pousse enn dimoune ki pé etudié la Bible pou observe bann commandement Bondié?
2 L’amour pou Jéhovah ek pou Jésus: Li bien difficile pou bann dimoune imparfait faire zot pensée, zot l’attitude, zot langage, ek zot conduite vinn en accord avek volonté Bondié, pa vrai? (Rom. 7:21-23; Éph. 4:22-24) Mais, l’amour pou Bondié ek pou so Garson pousse bann ki ena l’humilité pou faire sa. (Jean 14:15; 1 Jean 5:3) Couma nou kapav aide nou bann l’etude pou cultive sa l’amour-la?
3. Couma eski nou kapav aide bann ki pé etudié pou cultive l’amour pou Jéhovah ek Jésus?
3 Aide ou l’etude pou aprann pou li kapav koné ki qualité Bondié Jéhovah été. Enn frere ti expliké: “Bann dimoune pa kapav content enn kikenn ki zot pa koné. Alors depuis commencement l’etude-mem, mo montré zot nom Bondié dan la Bible, ek mo rod bann l’occasion pou mette l’accent lor bann qualité Jéhovah.” Kan nou faire ressorti l’exemple Jésus, li enn bon fason pou faire ou l’etude aprann ki qualité Bondié Jéhovah été. (Jean 1:14; 14:9) En plus, servi bann question revision ki ena a la fin chaque chapitre livre Ki la Bible enseigné?, pou aide ou l’etude reflechi lor bann qualité extraordinaire ki Bondié ek so Garson ena.
4. (a) Kifer eski beaucoup l’etude trouve sa difficile pou preché? (b) Couma eski nou kapav aide nou bann l’etude pou commence preché?
4 Enseigné par ou l’exemple: En tant ki enseignant ek guide, nou montré lezot seki vedir marche dan chemin Bondié par nou bann action. (1 Cor. 11:1) Par exemple, la plupart etudiant pa habitué approche enn dimoune ki zot pa koné pou partage zot bann croyance avek li. Alors, nou bizin aide zot developpe l’amour, la foi, ek courage ki necessaire pou participe dan predication ek faire bann disciple. Kitfois nou pou bizin patience ek nou bizin aussi koné couma nou pou faire sa. (2 Cor. 4:13; 1 Thess. 2:2) Si nou envie guide nou bann l’etude, sa pou motive nou pou accompagne zot ek soutenir zot kan zot commence preché.
5. Couma enn bon l’exemple kapav aide bann l’etude pou trouvé ki sa vedir suive bann commandement Bondié?
5 Par ou prop l’exemple ou kapav montré ou bann l’etude lezot l’aspect important dan fason vive enn chrétien. Kan ou visite enn dimoune ki malade ou-soit kan ou bien accueil bann ki vinn reunion, ou bann l’etude trouve l’amour en action. (Jean 15:12) Kan ou participe dan nettoyage la Salle du Royaume, ou-soit ou faire kitsoz pou aide lezot, ou pé montré zot couma pou servi lezot. (Jean 13:12-15) Kan zot trouve ou amenn enn la-vie simple, zot comprend ki sa vedir ‘contigne rod le royaume, avant tou kitsoz.’—Mat. 6:33.
6. Ki resultat nou gagné kan nou aide lezot pou servi Jéhovah?
6 Enseigne lezot Parole Bondié ek faire bann disciple, sa implik enn quantité zeffort. Mais li vrai-mem enn grand la-joie pou trouve bann ki ena l’humilité “contigne marche dan la verité.”—3 Jean 4.