Eski ou paré pou faire face ar enn catastrophe naturel?
1. Kifer li bon ki nou prepare-nou pou bann catastrophe?
1 Toulé-l’année dan le monde, dimoune par million affecté par bann tremblement de terre, bann tsunami, bann gros la-pluie la mousson, bann cyclone, bann tornade ek bann inondation. Parmi sa bann dimoune-la ena aussi nou bann frere ek soeur. Bann catastrophe naturel, zot arrive enn sel coup sans ki nou attann ek zot kapav affecté n’importe kisannla parmi nou. Alors li bon ki nou prepare-nou a l’avance.—Prov. 21:5.
2. Kifer nou bizin donne bann ancien nou l’adresse ek nou numero telephone ki a-jour?
2 Avant enn catastrophe: Parfois bann l’autorité kapav averti nou concernant bann danger ki pé menacé. Li important ki nou prend compte sa bann l’avertissement-la. (Prov. 22:3) Dan bann situation coumsa, bann ancien pou essaye contacté tou bann ki dan zot congregation pou aide zot pou faire bann preparation ki bizin. Apré enn catastrophe, bann ancien pou faire tou zot possible pou contacté tou bann ki frequente zot congregation pou guetté si zot bien ek pou guetté si zot bizin l’aide. Bann ancien kapav perdi beaucoup lé-temps si bann renseignement ki zot ena pou contacté bann proclamateur pa a-jour. Alors li important ki bann proclamateur donne secretaire congregation ek zot surveillant l’etude de livre zot l’adresse ek zot numero telephone ki a-jour.
3. Si nou reste dan enn l’endroit kot ena plus danger, couma nou kapav coopere avek bann ancien?
3 Si enn congregation situé dan enn l’endroit kot ena plus danger, bann ancien kapav demann bann proclamateur pou donne nom ek numero telephone enn parent proche ou-soit enn camarade ki pa reste dan sa region-la ek ki zot pou kapav contacté dan enn cas urgence. Sa pou permette bann ancien trouve pli facilement bann dimoune ki’nn bizin quitte sa l’endroit ki’nn affecté-la. Li possible ki bann ancien pou envie etabli enn plan lor seki la congregation pou faire dan cas ena enn urgence. Par exemple zot kapav faire enn la-liste simple bann kitsoz ki bien important ki tou dimoune bizin ena kot zot, zot kapav decidé couma zot pou faire pou ki bann frere ek soeur kapav quitte sa l’endroit-la si bizin, ek aussi couma zot pou kapav aide bann ki ena bann besoin special. Li important ki nou tou, nou cooperé avek bann l’arrangement ki bann ancien inn faire avek amour.—Héb. 13:17.
4. Ki nou bizin faire si gagne enn catastrophe dan nou l’île?
4 Apré enn catastrophe: Ki ou bizin faire si gagne enn catastrophe dan ou l’île? Assure-ou ki ou famille proche ena tou seki zot bizin lor plan physik. Si possible, aide aussi bann lezot ki dan problem. Faire maniere contacté ou surveillant l’etude de livre ou-soit enn lot ancien pli vite possible. Ou bizin contacté enn ancien mem si ou bien ek ou pa bizin l’aide. Si ou bizin l’aide, garde confiance ki ou bann frere pé faire tou zeffort ki zot kapav pou aide ou. (1 Cor. 13:4, 7) Pa blié ki Jéhovah konn ou situation; compte lor Li pou soutenir ou. (Ps. 37:39; 62:8) Rod tou l’occasion pou donne lezot enn soutien spirituel ek moral. (2 Cor. 1:3, 4) Reprend ou program activité theocratik pli vite possible.—Mat. 6:33.
5. Couma nou, en tant ki chrétien, nou reagir kan nou pense bann catastrophe ki pé menace le monde?
5 Alors ki tou bann dimoune dan la peur a cause bann catastrophe ki pé menace le monde, nou kapav guette l’avenir avek l’espoir. Bientot tou bann catastrophe pou zis enn kitsoz ki ti’nn ena dan le passé. (Rév. 21:4) Entre-temps, nou kapav faire tou seki raisonnable pou prepare-nou pou bann moment difficile ek contigne garde nou zèle dan predication la bonne nouvelle.