“Heureux enn dimoune ki contigne supporte bann l’epreuve”
1 Tou bann chrétien bizin faire face ar bann l’epreuve. (2 Tim. 3:12) Nou kapav gagne tou sort qualité l’epreuve: maladie, problem l’argent, tentation pou faire seki pa bon, persecution ou-soit lezot kitsoz encore. Satan servi sa bann l’epreuve-la pou faire nou ralenti, faire nou neglige nou ministere, ek mem arrete servi Bondié. (Job 1:9-11) Couma nou kapav gagne la joie kan nou supporte bann l’epreuve?—2 Pierre 2:9.
2 Prepare ou-mem pou gagne bann l’epreuve: Jéhovah finn donne nou so Parole la verité ek ladan ena aussi recit la vie Jésus ek so bann l’enseignement. Kan nou tann bann parole Jésus ek kan nou applik zot, nou pose enn base solid ek coumsa nou prepare-nou pou bann l’epreuve. (Luc 6:47-49) Nou gagne la force aussi grace a bann lezot disposition—nou bann frere ek soeur dan congregation, bann reunion, ek bann publication ki basé lor la Bible ki nou gagné avek l’esclave fidel et avisé. Nou kapav prié Bondié quantité ki nou envie, ek profite sa don ki Li’nn donne nou-la.—Mat. 6:13.
3 Jéhovah finn donne nou aussi enn l’espoir. Kan nou ena enn la-foi solid dan bann promesse Jéhovah, nou l’espoir vinn “couma enn l’ancre bateau pou nou nâme, li sur ek en mem temps li solid.” (Héb. 6:19) Dan lepok biblik, jamais enn bateau ti quitte le port sans enn l’ancre, mem kan ti ena beau temps. Si enn tempete ti levé enn coup, bann dimoune ti kapav jette l’ancre, ek sa ti pou empeche bateau-la al crase lor roche. Li pareil pou nou aussi. Si nou developpe la foi dan bann promesse Bondié asterla, sa pou aide nou reste stable kan nou gagne bann problem. Bann difficulté kapav arrivé enn sel coup, sans ki nou attann. Mem si bann dimoune dan Lystres ti bien apprecié l’activité Paul ek Barnabas dan commencement, situation ti changé bien vite kan bann Juif ki ti opposé ti vini.—Actes 14:8-19.
4 L’endurance faire gagne la joie: Kan nou contigne preché malgré bann persecution, sa donne nou la paix l’esprit. Nou content ki nou parmi bann ki digne pou gagne deshonneur a cause Christ. (Actes 5:40, 41) Kan nou supporte bann l’epreuve, sa aide nou pou developpe pli bien bann qualité couma l’humilité, l’obeissance, ek l’endurance. (Deut. 8:16; Héb. 5:8; Jacq. 1:2, 3) Sa aprann nou pou compte lor Jéhovah, pou ena confiance dan so bann promesse ek pou rod so protection.—Prov. 18:10.
5 Nou koné ki bann l’epreuve zot temporaire. (2 Cor. 4:17, 18) Bann l’epreuve donne nou l’occasion pou montré ki quantité nou content Jéhovah. Kan nou enduré dan bann l’epreuve, nou kapav reponn bann accusation Satan. Alors, fodé pa nou baisse lé-bras! “Heureux enn dimoune ki contigne supporte bann l’epreuve, parski kan li vinn enn dimoune approuvé, li pou gagne couronne la vie.”—Jacq. 1:12.