Enn l’echange l’encouragement pou nou tou
1. Ki l’occasion special nou gagné kan bann surveillant itinerant visite nou congregation?
1 L’apotre Paul ti ecrire congregation Rome: “Mo bien envie trouve zot pou ki mo donne zot bann don spirituel, pou ki zot kapav tini ferme; ou-soit pou ki ena enn l’echange l’encouragement entre zot, pou ki sakenn gagne l’encouragement par la foi so camarade, par zot la-foi ek par mo la-foi toulé-deux.” (Rom. 1:11, 12) Pareil aussi zordi, kan bann surveillant itinerant visite nou, c’est enn l’occasion pou ena enn l’echange l’encouragement.
2. Kifer annonce visite surveillant circonscription a l’avance?
2 Congregation: En general, trois mois a l’avance, fini annoncé dan congrégation kan pou ena visite surveillant circonscription. Sa donne nou le temps pou organise nou program pou nou kapav profite sa visite-la maximum possible. (Éph. 5:15, 16) Si ou travail, kitfois ou pou kapav demann congé pou ou participe dan predication pendant la semaine. Certain faire bann l’arrangement pou zot kapav faire pionnier auxiliaire pendant mois ki ena visite surveillant. Si ou finn fini prevoir ki ou pa pou là pendant sa periode-la, eski ou kapav change ou program pou ki ou present sa semaine-la?
3. Ki nou encouragé pou faire pendant visite surveillant pou nou gagne l’encouragement?
3 But principal visite surveillant circonscription c’est pou donne nou enn l’encouragement personel ek forme nou dan predication. Eski ou kapav demandé pou travail avek surveillant, ou-soit avek so madame si li marié? Surveillant circonscription content pou travail avek different proclamateur, ek aussi avek bann ki ena moins l’experience ou-soit bann ki envie vinn pli efficace dan zot ministere. Nou tou nou kapav aprann beaucoup par so bann presentation dan predication ek applik bann suggestion ki li kapav donne nou. (1 Cor. 4:16, 17) Kan ou invite li pou mange avek ou, sa pou donne encore plus l’occasion pou ena enn l’echange l’encouragement. (Héb. 13:2) Ecoute bien so bann discours, parski zot bien adapté ar bann besoin la congregation.
4. Couma nou kapav encourage nou surveillant circonscription?
4 Surveillant circonscription: L’apotre Paul pa ti different avek bann lezot frere ki li ti servi. Li aussi li ti bizin faire face avek bann problem ek bann tracas, ek li ti content pou gagne l’encouragement. (2 Cor. 11:26-28) Kan bann frere dan congregation Rome ti aprann ki Paul, ki ti enn prisonnier, finalement ti pé vinn Rome, certain dan congregation ti faire enn voyage 74 kilometre pou al kot bazar Appius pou joinde li! “Kan li ti trouve zot, Paul ti remercié Bondié ek li ti prend courage.” (Actes 28:15) Ou aussi pareil, ou kapav encourage ou surveillant circonscription. Donne li enn “double l’honneur” kan ou soutenir so visite avek zele. (1 Tim. 5:17) Dire li ek montré li ki ou apprecié bann zeffort ki li faire pou ou. Li ek so madame pou gagne la joie kan zot pou trouve ou la-foi, ou l’amour, ek ou l’endurance.—2 Thess. 1:3, 4.
5. Kifer nou tou nou bizin l’encouragement zordi?
5 Kisannla parmi nou pa bizin l’encouragement dan sa ‘lepok critik ki difficile pou supporté-la’? (2 Tim. 3:1) Prend decision asterla-mem pou ou present ek participe plus possible pendant semaine special avek surveillant circonscription. Nou tou—ki nou bann surveillant itinerant ou-soit ki nou bann proclamateur dan congregation—nou kapav ena enn part dan sa l’echange l’encouragement ki donne la joie-la. Coumsa, nou pou aussi ‘contigne console-nou entre nou-mem ek fortifié sakenn nou camarade.’—1 Thess. 5:11.