Enseigne lezot pou content Jéhovah
1. Ki kitsoz finn faire certain vinn proche ar Jéhovah?
1 Eski ou rappel premier fois ki ou ti tann koz lor Jéhovah? Ki kitsoz ki ti attire ou vers Li? Beaucoup dimoune ki ena enn leker sincere pou dire ou ki zot finn vinn proche ar nou Createur kan zot finn gagne enn connaissance lor so bann qualité, surtout so compassion ek so l’amour. Personne pa finn manifesté sa bann qualité-la plus ki Li.—1 Jean 4:8.
2, 3. Couma nou kapav servi livre Ki la Bible enseigné? pou aide bann etudiant la Bible pou augmente zot l’amour pou Jéhovah?
2 “Sa c’est nou Bondié”: Livre Ki la Bible enseigné? montré bien l’amour ki Jéhovah ena pou nou ek necessité pou nou ena enn relation personnel avek Li. Couma nou kapav servi sa livre-la pou enseigne lezot pou augmente zot l’amour pou Bondié? Kan nou koz lor enn nouveau point, nou kapav pose bann question ki pou faire etudiant-la reflechi. Par exemple: “Ki sa l’enseignement-la aprann nou lor Jéhovah?” ou-soit “Couma sa point-la montré ki Jéhovah Li-mem pli bon Papa ki n’importe kisannla ti pou content gagné?” Kan nou enseigne enn etudiant dan sa fason-la, sa kapav aide li pou commence developpe enn relation avek Jéhovah ki pou dure toute longue so la vie.
3 Kan nou aide bann etudiant la Bible pou comprend ki kan zot gagne enn connaissance lor sa Bondié ki vivant-la, li vrai-mem enn grand privilege. Lerla, zot pou reconette ki “sa c’est nou Bondié,” couma Isaïe dire. (Is. 25:9) Kan nou explik Parole Bondié nou bizin mette l’accent lor sa point-la: couma bann dimoune pou gagne bann benediction kan Jéhovah so bann projet pou realisé grace a so gouvernement royal dirigé par Christ Jésus.—Is. 9:6, 7.
4, 5. Ki sa vedir ena l’amour pou Jéhovah?
4 Preuve ki montré nou l’amour pou Jéhovah: Nou koné ki pou nou content Jéhovah avek tou nou leker, tou nou nâme ek tou nou l’esprit, sa vedir plus ki zis ena bann sentiment fort pou Li. Nou bizin ena mem fason pensé ki Jéhovah ek reste attaché ar sa fason pensé-la. (Ps. 97:10) Nou montré l’amour pou Bondié kan nou obeir tou so bann commandement ek kan nou contigné faire “bann action ki montré ki [nou] conduite [li] saint ek ki [nou] ena l’attachement pou Bondié,” mem kan nou bizin faire face ar bann difficulté ek l’opposition.—2 Pierre 3:11; 2 Jean 6.
5 Parski nou content Bondié, c’est enn plaisir pou faire so volonté. (Ps. 40:8) Enn etudiant la Bible bizin bien comprend ki tou bann commandement ki Bondié inn donné, c’est pou di-bien eternel so bann serviteur. (Deut. 10:12, 13) Kan enn dimoune vive en accord avek direction ki Jéhovah inn donné, li montré ki li bien apprecié tou bann kitsoz extraordinaire ki Bondié inn faire. Aide etudiant-la pou comprend ki kan li suive bann principe juste ki Jéhovah inn donné, sa pou empeche li gagne beaucop probleme.
6. Ki benediction enn dimoune kapav gagné parski li content Jéhovah?
6 Benediction ki bann ki content Bondié gagné: Jéhovah bien interessé avek bann dimoune humble ki content Li, ek Li faire zot konn “bann kitsoz profond ki concerne Bondié.” (1 Cor. 2:9, 10) Kan zot ena enn connaissance coumsa concernant projet Jéhovah, zot pou trouve bien ki l’avenir ena devant zot ek zot pou ena enn l’espoir sur. (Jér. 29:11) Bann ki content Jéhovah kapav profite so bonté extraordinaire. (Ex. 20:6) A cause sa grand l’amour ki Bondié ena pou zot-la, l’esperance la vie eternel ena beaucoup valeur pou zot.—Jean 3:16.
7. Ki ou ressenti kan ou enseigne lezot pou content Jéhovah?
7 Plus nou konn nou Papa ki dan le ciel, plus nou pou ena kitsoz pou partage avek lezot. (Mat. 13:52) C’est enn grand l’honneur pou enseigne lezot, surtout nou bann zenfant, pou zot content Jéhovah! (Deut. 6:5-7) Anou tou, ensam avek nou bann etudiant, contigne donne beaucoup louange Jéhovah pendant ki nou profite ‘l’abondance so bonté.’—Ps. 145:7.