Servi la Bible bien
1. Kifer la Bible li bien utile?
1 Kan nou servi Parole Bondié bien, sa aide nou pou annonce ek pou enseigne la verité dan enn fason clair ek pou denonce bann fausse l’enseignement ek tradition bann zom.—2 Tim. 2:15; 1 Pierre 3:15.
2. Ki pou aide nou trouve bann verset la Bible pli facilement?
2 Konn la Bible pli bien: Pareil couma enn zouti, plus nou travail avek li, plus nou konn servi li pli bien. Kan ou lire la Bible en entier, sa aide nou gagne enn l’idée general lor theme la Bible. Sa aide nou aussi pou rappel bann verset ek pou trouve zot pli facilement. A mesure ki ou connaissance lor la Bible augmenté, ou pou koz sa avek lezot avek plus zele ek conviction, ki li dan temoignage informel ou-soit dan predication.—1 Thess. 1:5.
3, 4. (a) Cite bann fason ki pou aide nou pou konn la Bible pli bien. (b) Eski ou finn servi lezot fason pou ou kapav konn la Bible pli bien?
3 Prend l’habitude pou ouvert ou la Bible ek suive ladan pendant bann reunion la congregation. Kan ou faire ou l’etude personnel ek dan ou preparation pou bann reunion, guette bann verset ki’nn cité ek medite lor zot application. Beaucoup finn trouvé ki kan zot rod bann verset directement dan la Bible au lieu ki zot guette sa lor enn computer ou-soit lor enn papier kot zot finn fini imprime tou verset, li pli facile plitar pou zot trouve sa bann verset-la kan zot dan ministere.—Jean 14:26.
4 Certain famille finn organise enn moment pou aprann par coeur bann verset la Bible. Certain servi bann ti carte kot zot ecrire zis livre, chapitre ek verset enn coté, ek lot coté texte-la entier. Sakenn son tour essaye rappel passage-la ou-soit dire kot sa li trouvé dan la Bible. Kan nou servi la Bible pou pratik bann presentation ek pou reponn enn objection ou-soit enn question, sa aide nou pou augmente nou capacité pou servi la Bible pli bien.
5. Kifer nou envie augmente nou capacité pou servi la Bible pli bien?
5 Pena lezot livre ki ena autant valeur ki la Bible. Zis sa livre-la tousel ki kapav faire bann dimoune vinn “sage pou . . . gagne la vie sauve.” (2 Tim. 3:15) Bann dimoune dan nou territoire pa konn bann tresor ki trouve dan la Bible. A cause sa, nou ena bann bon raison pou augmente nou capacité pou servi la Bible pli bien, pou montré zot seki ena dan la Bible vrai-mem.—Prov. 2:1-5.