L’importance la priere
1. Ki nou bizin pou accompli nou ministere?
1 Nou pa kapav accompli nou ministere par nou-mem. Jéhovah donne nou la force pou faire sa travail-la. (Phil. 4:13) Li servi so bann ange pou aide nou trouve bann dimoune ki couma bann brebis. (Rév. 14:6, 7) C’est Jéhovah ki faire bann la grain la verité ki nou planté ek arrosé, poussé. (1 Cor. 3:6, 9) Li vrai-mem important ki bann ministre chretien compte lor nou Papa ki dan ciel par la priere!
2. Pou ki kitsoz nou kapav prié?
2 Pou nou-mem: Nou bizin prié a chaque fois ki nou preché. (Éph. 6:18) Pou ki kitsoz nou bizin prié? Nou kapav prié pou ena enn l’attitude positif lor nou territoire ek pou gagne courage. (Actes 4:29) Nou kapav demann Jéhovah dirige nou vers bann dimoune sincere avek ki nou kapav etudié la Bible. Si enn dimoune pose nou enn question, nou kapav faire enn ti la priere dan nou leker pou demann Jéhovah aide nou reponn sa dimoune-la couma bizin. (Neh. 2:4) Nou kapav prié aussi pou gagne sagesse, pou ki nou ministere reste nou priorité. (Jacq. 1:5) En plus, Jéhovah content kan dan nou la priere nou servi bann l’expression ki montré nou reconnaissance pou privilege ki nou ena ki nou so bann ministre.—Col. 3:15.
3. Couma la priere ki nou faire pou lezot, faire travail predication progressé?
3 Pou lezot: Nou bizin ‘prié aussi sakenn pou nou camarade.’ Nou kapav mem mentionne bann nom kan situation-la permette. (Jacq. 5:16; Actes 12:5) Eski enn probleme la santé empeche ou faire plus dan travail predication? Alors prié pou ou bann compagnon ki ena enn bon la santé. Jamais pa sous-estime seki ou bann la priere pou lezot, kapav realisé! Li bon aussi ki nou prié pou ki bann l’autorité d’accord ki nou faire nou travail predication, coumsa nou bann frere “kapav contigne vive trankil ek en paix.”—1 Tim. 2:1, 2.
4. Kifer nou bizin perseveré dan la priere?
4 Annonce la bonne nouvelle partout kot dimoune resté lor la terre, li enn grand travail ki nou pa kapav faire par nou prop la force. Si nou “perseveré dan la priere,” avek l’aide Jéhovah, nou pou reussi realise sa travail-la.—Rom. 12:12.