Ena “enn grand compassion”
1. Ki kitsoz bann dimoune bien bizin zordi?
1 Azordi enn quantité dimoune pé bien bizin ki aide zot avek enn grand compassion, ek sa jamais finn arrivé avant dan l’Histoire. Bann condition dan le monde pé deterioré ek a cause sa bann dimoune senti zot malheureux, deprimé ek zot dan enn grand desespoir. Bann million dimoune bizin l’aide, ek nou en tant ki chretien nou kapav montré ki nou ena enn l’interet sincere pou nou prochain. (Mat. 22:39; Gal. 6:10) Couma nou kapav montré sa l’interet sincere-la?
2. Ki pli bon fason nou kapav montré compassion envers lezot?
2 Enn travail ki nou faire avek compassion: A part Bondié, pena personne ki kapav donne nou enn vrai reconfort ki durable. (2 Cor. 1:3, 4) Jéhovah encourage nou imite Li kan nou manifesté “enn grand compassion,” ek Li finn donne nou enn mission: visite nou bann prochain ek faire zot konn la bonne nouvelle lor so Royaume. (1 Pierre 3:8) Kan nou participe dan sa travail-la dan enn fason actif, sa c’est meilleur fason kot nou kapav reconforte “bann dimoune ki ena enn grand chagrin dan zot leker,” parski Royaume Bondié c’est sel l’espoir pou l’humanité ki pé souffert. (Is. 61:1) Jéhovah ena compassion pou so peuple, ek a cause sa bientot Li pou tire tou mechanceté ek Li pou etabli enn nouveau le monde ki juste.—2 Pierre 3:13.
3. Couma nou kapav considere bann dimoune pareil couma Jésus?
3 Considere bann dimoune couma Jésus ti considere zot: Mem kan li ti preche avek bann grand la foule, Jésus pa ti trouve zot zis en tant ki enn groupe, mais li ti considere sakenn personnellement couma enn dimoune ki ti bizin enn l’aide spirituel. Zot ti couma bann brebis ki pa ti ena berger pou guide zot. Jésus so leker ti touché par seki li ti trouvé, ek li ti senti-li poussé pou enseigne zot avek patience. (Marc 6:34) Si nou considere bann dimoune pareil couma Jésus ti faire, sa pou pousse nou pou montré enn vrai compassion pou zot personnellement. Zot pou kapav trouve sa par fason ki nou kozé ek par bann expression lor nou figure. Predication pou vinn nou priorité, ek nou pou adapté nou bann parole ar besoin chaque dimoune.—1 Cor. 9:19-23.
4. Kifer nou bizin cultive compassion?
4 Enn grand la foule bann dimoune dan tou nation pé reagir dan enn fason positif ar message lor Royaume Bondié ek ar l’interet sincere ki pé manifesté envers zot. A mesure ki nou contigne cultive compassion, nou pou honore Jéhovah, nou Bondié ki ena compassion, ek sa pou faire Li plaisir.—Col. 3:12.