Deux ti piece l’argent ki ena tigit valeur

Enn fason important ki nou kapav soutenir bann l’interet Royaume Bondié, c’est kan nou faire bann contribution pou travail predication ki pé faire dan le monde entier. Mais ki arrivé si nou pena beaucoup kass?

Enn jour Jésus ti trouve enn veuve bien misere mette deux ti piece l’argent ki ena tigit valeur dan tresor temple. “Dan sa tigit ki li ti ena-la, li finn mette tou seki li ti ena pou li vive,” parski li ti content Jéhovah. (Marc 12:41-44) Jésus ti mentionne sa, alors sa montré ki so contribution ti ena enn grand valeur devant lizié Bondié. Dan mem fason, bann chretien dan premier siecle pa ti pensé ki c’est zis bann chretien riche ki ti ena responsabilité pou faire bann contribution pou soutenir travail predication. L’apotre Paul ti cite l’exemple bann Macédonien ki, mem si zot “ti bien misere . . . ti contigne [suppliyé] . . . pou gagne privilege pou donne avek tou zot leker.”​—2 Cor. 8:1-4.

Alors, si nou kapav donne zis ‘deux ti piece l’argent ki ena tigit valeur,’ nou bizin rappel ki kan ajoute tou sa bann ti contribution-la ensam, sa faire beaucoup. Kan nou donne avek tou nou leker sa faire plaisir nou Papa ki dan le ciel ki bien genereux, parski “Bondié content enn dimoune ki donne avek la joie.”​—2 Cor. 9:7.