Dieu nous parle par Jérémie
1. Ki livre nou pou etudié dan l’etude biblik la congregation?
1 Pena doute ki pendant l’assemblée district 2010, “Reste proche ar Jéhovah!,” nou ti extra content kan nou ti gagne sa livre-la! Li mette l’accent lor bann leson ki pou utile dan nou la vie toulé-jour ki basé lor livre Jérémie ek Lamentations. (Rom. 15:4) Finn faire sa livre-la pou ki nou kapav etudié li dan l’etude biblik la congregation, ek a partir semaine 5 novembre 2012 nou pou commence examine sa.
2. Ki bienfait nou pou gagné kan nou examine bann livre Jérémie ek Lamentations?
2 Li utile zordi: Jérémie, ki finn ecrire sa livre ki porte so nom-la, ti prophetisé pendant enn lepok difficile dan Juda. Dan commencement, li pa ti senti li assez qualifié pou sa mission ki li ti gagné-la. (Jér. 1:6) Li ti gagne persecution ar bann connaissance ek kitfois ar so famille ki ti reste Anathoth, la ville kot li sorti. (Jér. 11:21, 22) Nou comprend kifer parfois Jérémie ti senti-li decouragé. (Jér. 20:14) A mesure ki nou accompli nou mission pou “faire bann disciple parmi bann dimoune dan tou bann nation,” souvent nou aussi nou faire face ar bann mem difficulté ek nou ena mem sentiment ki Jérémie. (Mat. 28:19) Kan nou pou examine seki li finn ecrire, sa pou aide pou preché avek confiance ek zele.
3. Mentionne certain caracteristik livre Jérémie.
3 Bann caracteristik sa livre-la: Bann verset important ki pou bizin lire, zot en italik. Apré chaque portion ki nou pou examiné chaque semaine ena enn ou-soit deux question important en caractere gras ki mette l’accent lor bann point important dan sa partie-la. Pendant revision, frere ki faire l’etude pou pose sa bann question-la l’auditoire. Toute longue sa livre-la ena bann joli zimage. Pena doute ki l’assistance pou envie faire bann commentaire lor la.
4. Couma nou pou kapav tire maximum profit kan nou pou examine livre Jérémie?
4 Pou ki ou kapav tire maximum profit, prepare ou livre a l’avance. Rod bann point ki ou kapav servi dan ou la vie toulé-jour ek dan ou ministere ek participé. Grace a benediction Jéhovah, Jérémie ti accompli so mission avek la joie ek contentement. (Jér. 15:16) Nou sur ki kan nou pou examine sa nouveau publication-la, sa pou aide nou pou accompli nou ministere dan mem fason.