Gagne Satisfaction pou Travail Dur ki Ou Faire
1. Ki kapav diminué nou zele dan nou ministere?
1 Inn crée zom avek capacité pou ‘trouve bann bon kitsoz a cause travail dur ki li’nn faire.’ (Eccl. 2:24) Mais selman, kan nou pa reussi gagne bann bon resultat dan nou ministere, decouragement kapav faire nou perdi nou la joie ek diminué nou zele. Ki kapav aide nou pou garde enn l’attitude positif?
2. Kifer nou bizin realiste par rapport ar fason ki bann dimoune pou reagir ar nou ministere?
2 Ou Bizin Realiste dan Seki Ou Attann: Rappel ki malgré ki zis enn tigit dimoune ti bien reagir ar bann l’enseignement Jésus, pena doute ki so ministere ti gagne succès. (Jean 17:4) Dan so illustration lor sa missié ki seme bann la grain-la, Jésus ti predire ki la plupart dimoune pa pou accepté message lor Royaume Bondié, ki couma enn la grain. (Mat. 13:3-8, 18-22) Selman, bann zeffort ki nou contigne faire permette nou accompli beaucoup kitsoz.
3. Couma nou kapav “rapporte bann fruit” mem si nou trouvé ki tigit dimoune reagir bien ar nou predication?
3 Couma Nou Rapporte Beaucoup Fruit?: Dapré illustration Jésus, bann ki accepté la bonne nouvelle pou “rapporte bann fruit.” (Mat. 13:23) Apré ki enn pié di-blé poussé ek vinn grand, fruit ki li produire c’est pa bann ti pié di-blé, mais bann nouveau la grain. Alors, fruit ki bann Chretien ki gagne bann bon resultat produire li pa necessairement bann nouveau disciple, mais plus la grain lor Royaume Bondié, setadir kan nou koz plus lor Royaume Bondié. Sa bann resultat ki bien pli ‘bon-la’ faire nou gagne satisfaction, n’importe ki fason bann dimoune reagir. Nou pé aidé pou ki sanctifié nom Jéhovah. (Is. 43:10-12; Mat. 6:9) Nou pé profite privilege ki nou ena pou travail ensam avek Bondié. (1 Cor. 3:9) Ek sa qualité “fruit nou la levre[-la]” faire plaisir Jéhovah.—Héb. 13:15, 16.
4. Ki bann resultat, ki kitfois nou pa koné, nou ministere kapav produire?
4 En plus, sa travail dur ki nou pé faire-la kapav pé produire bann resultat ki nou pa pé trouvé. Li possible ki certain ti tann Jésus preché mais zot finn vinn so bann disciple selman apré ki Jésus ti fini so ministere lor la terre. Li pareil aussi pou bann la grain lor Royaume Bondié ki nou pé semé, kitfois zot pou commence prend racine ek germé dan leker enn dimoune bien apré, ek kitfois dimoune-la vinn dan la verité sans ki nou koné. Vrai-mem, nou ministere accompli enn quantité bon kitsoz. Alors, anou “contigne rapporte beaucoup fruit” ek montré ki nou bann disciple Jésus.—Jean 15:8.