Swiv Lexanp Bann Profet—Tsephania
1. Dan ki kontex Tsephania ti servi Jéhovah kouma profet, ek kouma li enn bon lexanp pou nou zordi?
1 Nou dan lamwatie setiem siek A.N.L. Kot pase bann dimounn pe ador Baal dan Juda. Move Lerwa Amôn inn fek mor, so bann serviter inn touy li, ek asterla, se Yoshiya, enn zenn Lerwa ki pe regne. (2 Chron. 33:21–34:1) Se dan sa kontex-la ki Jéhovah finn servi Tsephania pou anons So mesaz zizman. Mem si kitfwa Tsephania ti enn manb fami rwayal Juda, li’nn anons mesaz kondanasion Jéhovah exakteman kouma li ti ete ar bann ki ti pe diriz sa nasion-la. Li pa’nn esey kase-ranze zis pou diminie lintansite sa mesaz-la. (Tseph. 1:1; 3:1-4) Nou osi parey, nou fer zefor pou imit kouraz Tsephania ek nou pa les nou bann lien familial afekte nou ladorasion pou Jéhovah. (Mat. 10:34-37) Ki mesaz Tsephania inn anonse, ek ki rezilta sa finn ena?
2. Ki nou bizin fer pou nou sape kan zour koler Jéhovah vini?
2 Rod Jéhovah: Se zis Jéhovah ki kapav sap enn kikenn kan zour so koler vini. Ala kifer, Tsephania ti ankouraz bann abitan Juda pou rod Jéhovah, rod lazistis, ek rod limilite pandan ki ankor ena letan. (Tseph. 2:2, 3) Zordi osi li parey. Parey kouma Tsephania, nou ankouraz lezot pou rod Jéhovah, me nou osi nou bizin azir. Nou osi nou bizin bien deside pou pa “vir ledo ar Jéhovah” zame. (Tseph. 1:6) Nou rod Jéhovah kan nou etidie so Parol an profonder ek kan nou priye pou gagn so direksion. Nou rod lazistis kan nou amenn enn lavi pir lor plan moral. Nou rod limilite kan nou aprann pou soumet ek kan nou obeir deswit bann linstriksion ki lorganizasion Jéhovah donn nou.
3. Kifer nou bizin gard enn latitid pozitif dan nou minister?
3 Bann Rezilta Pozitif: Mesaz Tsephania ti tous omwin sertin abitan dan Juda. Me sa mesaz-la ti tous enn kikenn ankor plis—enn zenn garson ki ti apel Yoshiya. Li ti koumans rod Jéhovah kan li ti ankor enn ti garson. Plitar, li ti fer enn gran kanpagn kont lidolatri ki ti ena dan pei. (2 Chron. 34:2-5) Zordi, mem si ena de-trwa lagrin Rwayom ki tom dan bor semin, dan enn plas kot ena boukou ros, ouswa dan pikan, ena de-trwa osi ki tom lor enn bon later ek raport bann frwi. (Mat. 13:18-23) Nou ena konfians ki Jéhovah pou kontign beni bann zefor ki nou pe fer pou sem bann lagrin Rwayom avek zel.—Ps. 126:6.
4. Kifer nou bizin ‘atann Jéhovah’?
4 Sertin dimounn dan Juda ti panse ki zame Jéhovah pou azir. Pourtan, Jéhovah ti afirme ki so gran zour deryer laport. (Tseph. 1:12, 14) Se zis bann dimounn ki rod proteksion ar Jéhovah ki pou gagn delivrans. (Tseph. 3:12, 17) Amezir ki nou ‘pe atann Jéhovah,’ anou servi nou gran Bondie dan lazwa ek dan linite!—Tseph. 3:8, 9.