Aprann ar Bann Proklamater Ki Ena Plis Lexperyans

Dan kongregasion, nou bien apresie bann proklamater ki ena enn gran lexperyans. Sertin pe servi Zeova avek fidelite depi bien lontan. Ena lezot ki’nn devlop sertin kapasite mem si zot pa tro lontan dan laverite. Tou sa bann proklamater-la inn temwin kouma Zezi inn diriz kongregasion dan bann dernie zour. Zot trouv sa bien parski travay predikasion ek lansegnman pe kontign ogmante. (Mat. 28:19, 20) Kan zot inn partisip dan sa laktivite-la, zot inn gagn “pwisans extraordiner” ki Bondie done pou fer fas ar bann difikilte ouswa leprev. (2 Kor. 4:7) Alor, ena boukou pou aprann ar zot. Kan donn zot lokazion, sa bann frer ek ser-la kontan pou ansegn lezot seki zot inn aprann. (Ps. 71:18) Alor, nou bizin rod bann lokazion pou aprann avek zot. Kouma nou kapav fer sa?

Dan Nou Minister. Bann nouvo proklamater ouswa bann ki ena mwins lexperyans bizin formasion pou zot vinn pli efikas dan zot minister. Zot kapav aprann boukou kan zot obzerv bien kouma bann proklamater ki ena lexperyans fer. (Get paragraf trwa anba soutit “Ed Bann ki Ena Mwins Lexperyans” dan lartik “Res Touzour Zele dan To Minister,” dan Latour Degard 15 Fevriye 2015.) Kouma sa finn ed twa kan to’nn travay avek bann proklamater koumsa?

Eski to kapav demann enn proklamater ki bien kalifie pou akonpagn twa dan minister? Si sa proklamater li aze ouswa pa kapav deplase, kitfwa detanzantan to kapav fer enn to bann letid kot li. Apre letid, demann li bann konsey lor fason to kapav amelior twa.

Pas Letan Avek Zot: To kapav aprann pou konn plis bann proklamater ki ena lexperyans kan to pas letan avek zot. Par exanp, eski to kapav invit enn parmi zot pou asiste to ladorasion an fami ek fer enn ti interview avek li? Si se enn proklamater aze ouswa ki pa kapav deplase, eski to kapav fer to ladorasion an fami kot li? Demann li kouma li’nn konn laverite. Ki bann benediksion li’nn gagne? Ki bann progre li’nn trouve? Ki lazwa li’nn gagne depi ki li servi Zeova?

Li bon nou konpran ki sa bann proklamater-la ena bann limit. Alor nou bizin realist. Kitfwa zot pa pou kapav ed nou kantite ki nou, nou pe atann. Parey kouma nou tou, sakenn ena enn don. (Rom. 12:6-8) Sertin bien aze ek akoz sa zot pa kapav pas boukou letan avek nou. Malgre sa, nou kapav aprann boukou ar zot parski pandan lontan zot inn servi Zeova avek fidelite.